ពិសេសណាស់! ពោតបង្កាត់ពូជថ្មី អាចបរិភោគឆៅ និងល្អសម្រាប់សុខភាព
វៀតណាម ៖ អ្នកវិទ្យាសាស្ត្រវៀតណាមមួយក្រុម បានបង្កាត់ពូជពោតផ្អែមពិសេស ដែលអាចបរិភោគ
វៀតណាម ៖ អ្នកវិទ្យាសាស្ត្រវៀតណាមមួយក្រុម បានបង្កាត់ពូជពោតផ្អែមពិសេស ដែលអាចបរិភោគ
វៀតណាម ៖ អ្នកវិទ្យាសាស្ត្រវៀតណាមមួយក្រុម បានបង្កាត់ពូជពោតផ្អែមពិសេស ដែលអាចបរិភោគឆៅបានដោយពុំចាំបាច់ចម្អិន។ នេះបើយោងតាមប្រភពពីសារព័ត៌មានវៀតណាម VnExpress ចេញផ្សាយកាលពីថ្ងៃទី១៤ ខែឧសភា ឆ្នាំ២០២៣ កន្លងទៅ។
លោក Nguyen Van Ha មកពីវិទ្យាស្ថានស្រាវជ្រាវ និងអភិវឌ្ឍន៍រុក្ខជាតិនៃសកលវិទ្យាល័យកសិកម្មជាតិវៀតណាមបានឱ្យដឹងថា ពូជពោតផ្អែមថ្មី ដែលមានឈ្មោះថា SSW18 មានបរិមាណទឹកខ្ពស់ និងម្សៅទាប។ ពេលបរិភោគឆៅ រសជាតិវាស្រដៀងនឹងពោតទុំដែរ។ បើប្រៀបធៀបទៅនឹងពោតធម្មតា ដែលមានកម្រិតផ្អែមប្រហែល 12-15 Brix ដឺក្រេនោះ ពូជពោតថ្មីនេះ មានកម្រិតផ្អែមនៅ 18 Brix ដឺក្រេ។
លោកបានបន្តថា បើទោះបីជាមានជាតិស្ករខ្ពស់ក៏ដោយ ឥទ្ធិពលរបស់វាខុសពីជាតិស្ករគ្លុយកូស ឬ Sucrose ដែលមានន័យថា អ្នកមានជំងឺទឹកនោមផ្អែម ឬអ្នកមានរបបអាហារ ក៏អាចទទួលទានពូជពោតថ្មីនេះបានដោយធម្មតា។ លោកពន្យល់ថា ពូជថ្មីនេះ ត្រូវបានបង្កើតឡើងតាមរយៈការបង្កាត់ពូជ និងគ្មានការប្រែប្រួលហ្សែនឡើយ ដោយសារតែបរិមាណម្សៅទាបរបស់វា ពោតពូជថ្មីនេះ អាចបរិភោគបានដោយពុំចាំបាច់ចម្អិន និងគ្មានរសជាតិឆៅ។
បន្ថែមលើសពីនេះ លោក Nguyen Van Ha បានលើកឡើងថា លក្ខណៈមួយចំនួនរបស់ពូជពោតថ្មីនេះ កំពុងស្ថិតក្នុងដំណើរការពិសោធន៍នៅឡើយ ដូច្នេះវាមិនទាន់អាចមានលក់ជាពាណិជ្ជកម្ម ឬនៅលើទីផ្សារនៅឡើយទេ។ ក្រុមស្រាវជ្រាវរបស់គាត់បានធ្វើការលើដំណាំនេះ ក្នុងរយៈពេល ៧-៨ឆ្នាំចុងក្រោយនេះ ខណៈដែលការដាំពោតដែលអាចបរិភោគបានដោយផ្ទាល់ បានក្លាយជាការពេញនិយមនៅទូទាំងពិភពលោក។ លោកបន្តថា «ក្រៅពីភាពងាយស្រួល កង្វះដំណើរការចម្អិនអាចរក្សាសារធាតុចិញ្ចឹមមួយចំនួននៅក្នុងពោត ដូចជាវីតាមីន ឬអាស៊ីតអាមីណូជាដើម»។
ពូជពោតថ្មីនេះ កំពុងត្រូវបានដាំសាកល្បងក្នុងតំបន់មួយចំនួនដូចជាហាណូយ, សាប៉ា ហាយ៉ាង និងវិញភុក នៅភាគខាងជើងប្រទេសវៀតណាម។ វាលូតលាស់បានល្អនៅតំបន់ដែលមានអាកាសធាតុត្រជាក់ដូចជា សាប៉ា។ វាត្រូវការពេល ៧០-៨០ថ្ងៃនៃការលូតលាស់មុនពេលពោតអាចប្រមូលផលបាន។
ពូជពោតថ្មីនេះ អាចផលិតពោតបានប្រហែល ១០-១២តោនក្នុងមួយហិកតា។ ឥឡូវនេះ អ្នកវិទ្យាសាស្ត្រវៀតណាម កំពុងវាយតម្លៃការអនុវត្តពូជនៅក្នុងប្រព័ន្ធអេកូឡូស៊ីផ្សេងគ្នា ដើម្បីជ្រើសរើសកន្លែងល្អបំផុតសម្រាប់ដាំវា។ ពួកគេកំពុងប្រើប្រាស់បច្ចេកវិទ្យាថ្មី ដើម្បីធ្វើឱ្យពោតមានរសជាតិកាន់តែឆ្ងាញ់ និងជួយឱ្យវាមានភាពធន់នឹងសត្វល្អិត និងជំងឺ៕ (រូបភាព ៖ VnExpress និង Vietnam Posts)
ចែករំលែកព័តមាននេះ