អតីតប្រធានាធិបតីអាមេរិក លោកចច ដាប់ប៊លយូ ប៊ូស កាលពីយប់ថ្ងៃទី១ មកទី២ ឧសភា បានសម្តែងការអបអរសាទរចំពោះការប្រកាសពីការស្លាប់របស់អូសាម៉ា ប៊ីនឡាដេន ដែលលោកចាត់ទុកថា ជាជ័យជំនះសម្រាប់អាមេរិកជិត១០ឆ្នាំ បន្ទាប់ពីការវាយប្រហារភេរវកម្មថ្ងៃទី១១ កញ្ញា ឆ្នាំ២០០១ ។
ក្នុងសេចក្តីថ្លែងការណ៍ជាលាយលក្ខណ៍អក្សរមួយផ្ញើជូនម៉ាស៊ីនឃោសនាលោកប៊ូស គូសបញ្ជាក់ថា លោកប្រធានាធិបតីបារ៉ាក់ អូបាម៉ា បានទូរស័ព្ទនាពេលយប់ប្រាប់លោកពីព័ត៌មាននេះ ។ អតីតប្រធានាធិបតីអាមេរិករូបនេះថ្លែងថា នេះជាជ័យជំនះមួយសម្រាប់អាេមរិក សម្រាប់បណ្តាប្រជាជនដែលស្នេហាសន្តិភាព និងសម្រាប់បណ្តាអ្នកដែលបានបាត់បង់សាច់ញាតិ ដោយសារការវាយប្រហារភេរវកម្មថ្ងៃទី១១ កញ្ញា ឆ្នាំ២០០១ ។
លោកប៊ូស ជាអ្នកបញ្ជាឱ្យមានការលុកលុយចូលអាហ្វហ្គានីស្ថាន ដើម្បីតាមចាប់ប្រមុខអាល់កៃដារូបនេះមួយខែក្រោយការវាយប្រហារភេរវកម្មប្រឆាំងអគារភ្លោះនៃមជ្ឈ មណ្ឌលពាណិជ្ជកម្មពិភពលោក និងមន្ទីរប៉ង់តាហ្គោន ។ លោកប៊ូស មានប្រសាសន៍ថា ការប្រយុទ្ធប្រឆាំងភេរវកម្មនៅបន្ត ក៏ប៉ុន្តែយប់នេះអាមេរិកបានបញ្ជូនសារសំខាន់បំផុតមួយគឺ ៖ យុត្តិធម៌ត្រូវទទួលបាន ទោះជាប្រើពេលយូរក៏ដោយ។
នាយករដ្ឋមន្ត្រីអង់គ្លេស លោកដាវីដ កាមីរ៉ូន បានធ្វើអត្ថាធិប្បាយមួយកាលពីថ្ងៃទី២ ឧសភា ថា ការស្លាប់របស់ប្រមុខអាល់កៃដាគឺជាការធូរចិត្តយ៉ាងខ្លាំងមួយសម្រាប់ប្រជាជនលើពិភពលោក ។ ខ្ញុំសូមសរសើរលោកប្រធានាធិបតីបារ៉ាក់ អូបាម៉ា ព្រមទាំងបណ្តាអ្នកទទួលខុសត្រូវលើប្រតិបត្តិការនេះ ។
ចំណែកនាយករដ្ឋមន្ត្រីអ៊ីស្រាអែល លោកបេន ចាមីន ណេតាន់់ យ៉ាហ៊ូ វិញនិយាយថា ការស្លាប់របស់ប៊ីនឡាដេនជាជោគជ័យមួយសម្រាប់បណ្តាប្រទេសប្រជាធិបតេយ្យក្នុងការតស៊ូប្រឆាំងភេរវកម្ម៕
ចែករំលែកព័តមាននេះ