ខេត្តព្រះសីហនុ ៖ យុវជនម្នាក់ត្រូវបានសមត្ថកិច្ចប៉ូលិសនៃស្នងការដ្ឋាននគរបាលក្រុងព្រះសីហនុឃាត់ខ្លួន កាលពីថ្ងៃទី៣០ ខែមេសា ស្ថិតក្នុងក្រុមទី១៣ ភូមិ៤ សង្កាត់លេខ៤ ក្រុងព្រះសីហនុ យោងតាមពាក្យបណ្តឹងរបស់ជនបរទេសចោទប្រកាន់ថា បានលួចកាបូបស្ពាយដាក់សម្ភាររបស់គាត់
ខេត្តព្រះសីហនុ ៖ យុវជនម្នាក់ត្រូវបានសមត្ថកិច្ចប៉ូលិសនៃស្នងការដ្ឋាននគរបាលក្រុងព្រះសីហនុឃាត់ខ្លួន កាលពីថ្ងៃទី៣០ ខែមេសា ស្ថិតក្នុងក្រុមទី១៣ ភូមិ៤ សង្កាត់លេខ៤ ក្រុងព្រះសីហនុ យោងតាមពាក្យបណ្តឹងរបស់ជនបរទេសចោទប្រកាន់ថា បានលួចកាបូបស្ពាយដាក់សម្ភាររបស់គាត់។
សមត្ថកិច្ចប៉ូលិសបានឱ្យដឹងថា ជនសង្ស័យឈ្មោះអៀម វណ្ណារ៉ា ភេទប្រុស អាយុ២១ឆ្នាំ ជាអ្នករត់ម៉ូតូឌុប មានទីលំនៅភូមិ១ សង្កាត់លេខ៤ ក្រុងព្រះសីហនុ។ រីឯម្ចាស់កាបូបស្ពាយមានដាក់សម្ភារដែលត្រូវជនខាងលើលួចយកឈ្មោះ JAN PANEK ភេទប្រុស អាយុ២៧ឆ្នាំ មុខរបរអ្នកត្រួតពិនិត្យលុយក្រុមហ៊ុន ACCENTURE កាន់លិខិតឆ្លងដែនលេខ៣៩៤៣៩១០៦ ផុតកំណត់ថ្ងៃទី១៦ តុលា ឆ្នាំ២០១៩ ស្នាក់នៅផ្ទះសំណាក់អប្សរា ស្ថិតក្នុងក្រុមទី១៧ ភូមិ៤ សង្កាត់លេខ៤ ក្រុងព្រះសីហនុ។
តាមការបំភ្លឺរបស់ឈ្មោះ JAN PANEK បានឱ្យដឹងថា មុនពេលកើតហេតុវេលាម៉ោង១២និង៤៥នាទីរសៀល ថ្ងៃទី៣០ មេសា គាត់បានទៅឆ្នេរសមុទ្រក្បែរដីក្រុមហ៊ុនអារីស្តុន ជាមួយឪពុក និងមិត្តស្រីរបស់ឪពុកគាត់។ ពេលទៅដល់ពួកគាត់ទាំង៣នាក់បានចុះងូតទឹកសមុទ្រ លេង ដោយទុកកាបូបស្ពាយដាក់សម្ភារនៅលើឆ្នេរនោះ។ បន្តិចក្រោយមកស្រាប់តែមានបុរសម្នាក់ដោះអាវមានចាក់សាក់រូបលើខ្នង បានរត់មកយកកាបូបស្ពាយនោះ ពេលនោះគាត់ និងឪពុកបានដេញតាម ហើយបុរសនោះបានបោះកាបូបចោលក្នុងព្រៃ រួចរត់ទៅជិះម៉ូតូដែលទុកនៅជិតនោះ តែជិះបានបន្តិចក៏ដួល រួចបុរសនោះក៏រត់ចូលព្រៃបាត់។ បន្ទាប់មកគាត់បានទៅរើសយកកាបូបគាត់វិញ និងបានទៅប្តឹងសមត្ថកិច្ច ដោយមានក្មេងប្រុសម្នាក់ជូនមកប្តឹង។ គាត់បន្តទៀតថា សម្ភារនៅក្នុងកាបូបនោះមានទូរស័ព្ទម៉ាកសាំស៊ុង ១គ្រឿង ម៉ាស៊ីនថតម៉ាកកាណុង ១គ្រឿង សៀវភៅ២ក្បាល កាបូបដៃ១ ថ្មពិល៤គ្រាប់ វ៉ែនតា១ កាបូបស្ពាយពណ៌ខ្មៅ១ ប្រាក់៥០ដុល្លារ និង២២.០០០រៀល។
យោងតាមចម្លើយសារភាពរបស់ឈ្មោះអៀម វណ្ណារ៉ា ឱ្យដឹងថា ខ្លួនពិតជាបានដើរទៅម្តុំនោះមែន តែខ្លួនមិនបានលួចសម្ភាររបស់ជនបរទេសនោះទេ។ ទោះបីជនសង្ស័យមិនសារភាពទទួលកំហុសក៏ដោយ ក៏សមត្ថកិច្ចបានកសាងសំណុំរឿងបញ្ជូនទៅតុលាការ ដើម្បីផ្តន្ទាទោសតាមច្បាប់ដែរ៕
ចែករំលែកព័តមាននេះ