រាជធានីភ្នំពេញ ៖ បន្ទាប់ពីទទួលបានប្រាក់លើកទឹកចិត្តចំនួន១ម៉ឺនដុល្លារ ពីសំណាក់លោកឧបនាយករដ្ឋមន្ត្រី ហោ ណាំហុង កីឡាករបាល់ទាត់ក្រុមជម្រើសជាតិកម្ពុជា U22 ស៊ិន សុវណ្ណមករា…
រាជធានីភ្នំពេញ ៖ បន្ទាប់ពីទទួលបានប្រាក់លើកទឹកចិត្តចំនួន១ម៉ឺនដុល្លារ ពីសំណាក់លោកឧបនាយករដ្ឋមន្ត្រី ហោ ណាំហុង កីឡាករបាល់ទាត់ក្រុមជម្រើសជាតិកម្ពុជា U22 ស៊ិន សុវណ្ណមករា បានយកប្រាក់ដែលទទួលបាននោះ មកធ្វើជាទឹកប្រាក់ឧបត្ថម្ភជូនទៅដល់ក្រុមជម្រើសជាតិកម្ពុជាទាំងមូលតែម្តង ដែលនេះជាទឹកចិត្តដ៏មហិមាររបស់កីឡាករជម្រើសជាតិកម្ពុជា ស៊ិន សុវណ្ណមករា បានទទួលការកោតសរសើរយ៉ាងខ្លាំងពីសំណាក់មហាជនជាច្រើនលើបណ្តាញសង្គម ។
ទោះបីជាក្រុមកីឡាករបាល់ទាត់ជម្រើសជាតិកម្ពុជា U22 ចាញ់ក្រុមឥណ្ឌូនេស៊ី លទ្ធផល ២-១ យ៉ាងណាក៏ដោយ ប៉ុន្តែដើម្បីជាការលើកទឹកចិត្តដល់កីឡាករក្រុមជម្រើសជាតិកម្ពុជា U22 លោកឧបនាយករដ្ឋមន្ត្រី ហោ ណាំហុង បានប្រកាសផ្តល់ប្រាក់រង្វាន់ចំនួន១ម៉ឺនដុល្លារដល់កីឡាករ ស៊ិន សុវណ្ណមករា ដែលបានធ្វើយ៉ាងល្អ ក្នុងការតែតបាល់បញ្ចូលទីរបស់ក្រុមឥណ្ឌូនេស៊ីក្នុងព្រឹត្តិការណ៍ស៊ីហ្គេមឆ្នាំ២០២៣ ដែលកម្ពុជាយើងធ្វើជាម្ចាស់ផ្ទះ ។
ប៉ុន្តែអ្វីដែលគេគ្រប់គ្នានឹកស្មានមកដល់នោះ គឺកីឡាករក្រុមជម្រើសជាតិកម្ពុជា U22 ដែលមានឈ្មោះ ស៊ិន សុវណ្ណមករា និងជាអ្នកដែលអាចរកគ្រាប់បាល់ជូនដល់ក្រុមគោព្រៃកម្ពុជា១គ្រាប់ក្នុងតង់ទី២ ដោយការតែតបាល់បញ្ចូលទីទៅលើក្រុមជម្រើសជាតិឥណ្ឌូនេស៊ី ហើយទទួលបានប្រាក់ឧបត្ថម្ភលើកទឹកចិត្តចំនួន១ម៉ឺនដុល្លារនោះ មិនបានយកលុយនេះមកទុកសម្រាប់ខ្លួនឯងនោះទេ គឺបានយកលុយទាំងនោះមកធ្វើជាទឹកប្រាក់សម្រាប់ឧបត្ថម្ភជូនទៅដល់ក្រុមជម្រើសជាតិកម្ពុជាទាំងមូលតែម្តង ។
បើយោងតាមគណនីហ្វេសប៊ុករបស់កីឡាករជម្រើសជាតិកម្ពុជា ស៊ិន សុវណ្ណមករា បានសរសេរបញ្ជាក់ថា ខ្ញុំបាទ ស៊ិន សុវណ្ណមករា សូមថ្លែងអំណរគុណយ៉ាងជ្រាលជ្រៅ ជូនចំពោះឯកឧត្តមឧបនាយករដ្ឋមន្ត្រី ហោ ណាំហុង ដែលបានធ្វើការឧបត្ថម្ភទឹកប្រាក់ចំនួនមួយម៉ឺនដុល្លារសហរដ្ឋអាមេរិក ជូនចំពោះខ្ញុំបាទ ស៊ិនសុវណ្ណមករា ហើយខ្ញុំបាទសុំយកទឹកប្រាក់ឧបត្ថម្ភចំនួនមួយម៉ឺនដុល្លារសហរដ្ឋអាមេរិកនេះ មកធ្វើជាទឹកប្រាក់ឧបត្ថម្ភជូនទៅដល់ក្រុមជំរើសជាតិកម្ពុជាទាំងមូល ។ ជាចុងក្រោយខ្ញុំបាទស៊ិន សុវណ្ណមករា សូមលំអោនកាយគោរពជូនពរ ឯកឧត្តមឧបនាយករដ្ឋមន្ត្រី ហោ ណាំហុង អោយជួបប្រទះតែពុទ្ធពរទាំងបួនប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ ។
ក្នុងនោះផងដែរ មហាជនជាច្រើននៅលើបណ្តាញសង្គម បានចូលទៅខមិន និងកោតសរសើរយ៉ាងខ្លាំងចំពោះទឹកចិត្តដ៏មហិមារបស់កីឡាករកម្ពុជារូបនេះ ដែលហានលះបង់អ្វីដែលខ្លួនទទួលបានតែម្នាក់ឯង យកទៅចែករំលែកជូនមិត្តភក្តិរួមក្រុមទាំងមូល ។ មហាជនខ្លះបានសរសើរថា នេះជាការសម្រេចចិត្តដ៏ត្រឹមត្រូវនិងឆ្លាតវៃរបស់ប្អូន ជូនពរប្អូនកាន់តែជោគជ័យ ។ ទឹកចិត្តប្អូនគួរឱ្យគោរពខ្លាំងណាស់ ។ ខ្ញុំពិតជាសរសើរនៅទឹកចិត្តចេះចែករំលែករបស់ប្អូន ។ សូមឲ្យការខំប្រឹងប្រែង និងអំពើល្អរបស់ប្អូន ក្លាយទៅជានាវានាំប្អូនទៅរកភាពជោគជ័យ និងសេចក្ដីសម្រេចផងចុះ ។
ទឹកចិត្តល្អណាស់ពៅមាស! នេះគឺជាការសម្រេចចិត្តដ៏ខ្ពស់បំផុតសម្រាប់ក្រុមជម្រើសជាតិកម្ពុជា ជាពិសេស U22 ជូនពរមករា និងមិត្តរួមក្រុមទាំងអស់មានសុខភាល្អ ហើយជោគេជ័យក្នុងការសិក្សា និងការហាត់បាល់ ព្រមទាំងការប្រកួតបាល់ ។ ចាញ់រឺឈ្នះ គឺត្រូវតែទទួលយកការពិត និងការរិះគន់បែបស្ថាបនាពីមហាជនអ្នកគាំទ្រ ជាពិសេសសមាជិកក្រុមទាំងអស់ ត្រូវតែខំប្រឹងហ្វឹកហាត់អោយបានល្អថែមទៀត ។ ស៊ូរៗណាដើម្បីជ័យជំនះសម្រាប់កម្ពុជា ។
សូមបញ្ជាក់ថា ការប្រកួតបាល់ទាត់បុរសស៊ីហ្គេមក្នុងពូល A បានបញ្ចប់នៅម៉ោងជិត៩យប់ ថ្ងៃទី១០ឧសភា ។ កម្ពុជាដែលជាម្ចាស់ផ្ទះ បានបាត់បង់ឱកាសឡើងទៅវគ្គពាក់កណ្តាលផ្តាច់ព្រ័ត្រ បន្ទាប់ពីចាញ់ក្រុមឥណ្ឌូនេស៊ី ២-១ ៕
ចែករំលែកព័តមាននេះ