ខេត្តកំពង់ចាម ៖ ២នាក់ម្តាយ និងកូនបានរងគ្រោះរយះក្បាលហូរឈាម ព្រោះតែក្រុមចោរប្លន់៣នាក់វាយនឹងអាវុធខ្លីម៉ាក K59 ដើម្បីប្លន់យកម៉ូតូម៉ាក C125 ស៊េរី២០០៨ ឡើងតែម២០១០។ ហេតុការណ៍នេះបានកើតឡើងនៅវេលាម៉ោង១១យប់ ថ្ងៃទី៣០ មេសា ២០១១ ស្ថិតនៅខាងមុខផ្ទះរបស់អ្នករងគ្រោះតែម្តង ក្នុងភូមិថ្មី ឃុំក្រឡា
ខេត្តកំពង់ចាម ៖ ២នាក់ម្តាយ និងកូនបានរងគ្រោះរយះក្បាលហូរឈាម ព្រោះតែក្រុមចោរប្លន់៣នាក់វាយនឹងអាវុធខ្លីម៉ាក K59 ដើម្បីប្លន់យកម៉ូតូម៉ាក C125 ស៊េរី២០០៨ ឡើងតែម២០១០។ ហេតុការណ៍នេះបានកើតឡើងនៅវេលាម៉ោង១១យប់ ថ្ងៃទី៣០ មេសា ២០១១ ស្ថិតនៅខាងមុខផ្ទះរបស់អ្នករងគ្រោះតែម្តង ក្នុងភូមិថ្មី ឃុំក្រឡា ស្រុកកំពង់សៀម ព្រមទាំងបានបាញ់កំញើញ១គ្រាប់ទៀតផងប្លន់យកម៉ូតូជិះគេចចេញបាត់ស្រមោល ។
ប្រភពពីស្ត្រីរងគ្រោះឈ្មោះតន សុភា អាយុ៣៧ឆ្នាំ បានរៀបរាប់ថា នៅវេលាម៉ោង៦និង៣០នាទីល្ងាចថ្ងៃខាងលើ រូបគាត់ និងកូន៣នាក់ទៀតបាននាំគ្នាជិះម៉ូតូចេញពីផ្ទះទៅមើលល្ខោនបាសាក់ ដែលគេសម្តែងនៅក្នុងពិធីបុណ្យកាន់អង្គ នៅក្នុងវត្តមួយដែលមានចម្ងាយពីផ្ទះប្រហែលជា៣គីឡូម៉ែត្រ ដោយកូនប្រុសឈ្មោះអេន វីរៈ អាយុ១៨ឆ្នាំ ជាអ្នកបើកបរ ។ ស្ត្រីរងគ្រោះបានប្រាប់បន្តថា រហូតដល់វេលាម៉ោងប្រហែលជិត១១យប់ ក៏បានជិះម៉ូតូត្រឡប់មកផ្ទះវិញ ខណៈពេលមកដល់មុខផ្ទះរូបគាត់ គ្រាន់តែចុះពីលើម៉ូតូត្រូវបានក្រុមចោរដែលមានគ្នាចំនួន៣នាក់ជិះម៉ុតូ C125 មួយគ្រឿងស៊េរី២០០៥ មកឈប់ពីខាងក្រោយដោយស្រែកគំរាមឱ្យប្រគល់ម៉ូតូមកពួកគេ ប៉ុន្តែកូនប្រុសរបស់គាត់មិនព្រមឱ្យនោះទេ ជាហេតុធ្វើឱ្យក្រុមចោរមានការខឹងសម្បាក៏យកកាំភ្លើងខ្លីមកវាយត្រូវក្បាលបណ្តាលឱ្យរយះហូរឈាមស្រោចពេញខ្លួនពេលដែលយកដៃមកខ្ទប់ក្បាលនោះ ចោរបានដណ្តើមយកម៉ូតូជិះចេញមកតាមផ្លូវលំ ឃើញបែបនេះគាត់បានរត់តាមទៅស្ទាក់ចាប់ម៉ូតូក៏ត្រូវចោរវាយចំក្បាល១កាំភ្លើងដែរ រងរបួសរយះក្បាលដូចគ្នា ។
បន្ទាប់ពីធ្វើសកម្មភាពប្លន់រួច ក្រុមចោរបានបាញ់កំញើញ១គ្រាប់ភ្ជុចដី ដើម្បីមិនឱ្យអ្នកណាតាម ដោយម៉ូតូដែលប្លន់បានជិះគ្នា២នាក់ និងម៉ូតូដែលជិះមកធ្វើសកម្មភាពជិះតាមក្រោយចេញទៅកាន់ថ្នល់ជាតិលេខ៧ គេចខ្លួនបាត់ស្រមោល។
ស្រ្តីរងគ្រោះឈ្មោះតន សុភា បានបញ្ជាក់ថា ក្នុងពេលដែលក្រុមចោរកំពុងប្លន់នោះ ប្រជាពលរដ្ឋនៅក្បែរខាងបាននាំគ្នាប្រដាប់ដោយដំបង និងដុំថ្មនៅក្នុងដៃតែមិនមានអ្នកណាហ៊ានចូលមកជួយនោះទេ ព្រោះចោរប្រដាប់ដោយអាវុធនៅក្នុងដៃ។ បន្ទាប់មករូបគាត់ និងកូនត្រូវបានក្រុមសាច់ញាតិនាំទៅសង្គ្រោះនៅមន្ទីរពេទ្យខេត្តភ្លាមៗ។ តាមការពិនិត្យមើលមុខរបួសមិនមានលក្ខណៈធ្ងន់ធ្ងរនោះ ក៏បានសុំគ្រូពេទ្យចេញត្រឡប់មកផ្ទះវិញនាព្រឹកថ្ងៃទី១ ឧសភា ដើម្បីឱ្យគ្រូពេទ្យឯកជនព្យាបាលបន្ត។ បើតាមការសន្និដ្ឋានក្រុមចោរដែលមកតាមប្លន់ម៉ូតូដល់ផ្ទះនោះមានបិទមុខ២នាក់ទំនងជាអ្នកដែលបានស្គាល់គាត់ អាចជាខ្មោចស្រុកឱ្យដៃទើបខ្មោចព្រៃចូលមកតាមប្លន់យ៉ាងគឃ្លើនបែបនេះ ព្រោះបានស្គាល់ភូមិសាស្រ្តច្បាស់ហើយ។
ចំណែកលោកអនុសេនីយ៍ឯកចក់ សុខកៅ អធិការរងនគរបាលស្រុកកំពង់សៀម ទទួលផែនព្រហ្មទណ្ឌបានប្រាប់ឱ្យដឹងថា រហូតមកដល់ម៉ោង២រសៀលថ្ងៃទី១ ឧសភា សមត្ថកិច្ចនៅតែស្រាវជ្រាវ ហើយមិនទាន់ស្គាល់អត្តសញ្ញាណក្រុមចោរប្លន់ទាំងនោះនូវឡើយទេ រីឯការបាញ់១គ្រាប់ដើម្បីកំញើញនោះក៏មិនបណ្តាលឱ្យអ្នកណាម្នាក់រងរបួសដែរ។ តាមការចុះទៅពិនិត្យដល់ផ្ទះកើតហេតុ សមត្ថកិច្ចបានរកឃើញសំបកគ្រាប់កាំភ្លើងខ្លីម៉ាក K59 មួយគ្រាប់ កម្លាំងជំនាញស្រុក និងប៉ុស្តិ៍កំពុងតែស្រាវជ្រាវបន្តទៀតយ៉ាងសកម្ម ដើម្បីតាមប្រមាញ់ក្រុមចោរប្លន់ទាំងនោះ ៕
ចែករំលែកព័តមាននេះ