ម្ចាស់គ្រឿងចក្រកាយដីធ្វើផ្លូវជាង៦០ក្រុមហ៊ុនលើកគ្នាបកអាក្រាតរឿងពុករលួយ
- កំពត
ខេត្តកំពត ៖ ក្រុមម្ចាស់គ្រឿងចក្រកាយដីធ្វើផ្លូវចំនួន៦៤ក្រុមហ៊ុនផ្សេងៗគ្នា នៅក្នុងខេត្តកំពត កាលពីព្រឹកថ្ងៃទី៩ ឧសភា ឆ្នាំ២០២៣ មានតំណាងក្រុមហ៊ុនឯកជននីមួយៗបានស្កាត់ទៅជួបអភិបាលខេត្ត ឯកឧត្តម ម៉ៅ ធនិន ដើម្បីឱ្យជួយអន្តរាគមន៍ ដល់មន្ត្រីមួយចំនួនគិតចាប់ពីថ្នាក់ខេត្តរហូតដល់ស្រុក មិនគោរពតាមគោលការណ៍ដេញថ្លៃក្នុងការអភិវឌ្ឍន៍របស់មូលដ្ឋានទេ គឺត្រូវរ៉ូវគ្នាមិនដេញថ្លៃ ។
ព្រោះថា ការដេញថ្លៃសម្រាប់ធ្វើផ្លូវលំ ឬស្ដារប្រឡាយទឹក ជាគម្រោងអភិវឌ្ឍន៍ក្នុងឃុំ-សង្កាត់ ជាទូទៅត្រូវបានម្ចាស់គម្រោងបើកឱកាសឱ្យក្រុមហ៊ុន ដែលមានគ្រឿងចក្រ ចូលទៅដាក់ពាក្យដេញថ្លៃស្ថាបនាផ្លូវ ឬក៏ធ្វើអ្វីមួយ ។ ប៉ុន្តែសម្រាប់ស្រុក-ឃុំនីមួយៗក្នុងខេត្តកំពត មិនបានគោរពតាមគោលការណ៍នេះទេ ឃុំខ្លះមិនទាន់ប្រកាសឱ្យដេញថ្លៃផង ត្រូវបានគេលួចឃុបយិតគ្នាឱ្យគ្រឿងចក្រមកកាយធ្វើផ្លូវរួចមកហើយដែលជាទង្វើពុករលួយ មិនអាចអនុគ្រោះបានឡើយ ។
ឯកឧត្តម ម៉ៅ ធនិន អភិបាលខេត្តកំពត បានប្រាប់ទៅតំណាងក្រុមហ៊ុនដែលចូលទៅជួបថា ឯកឧត្តមនឹងសើរើកិច្ចការនេះឱ្យមានតម្លាភាពឡើងវិញ ។
នៅព្រឹកថ្ងៃទី១០ ខែឧសភា ឆ្នាំ២០២៣នេះ នៅសាលាឃុំដំណាក់កន្ទួតខាងជើង ក្នុងស្រុកកំពង់ត្រាច មានការរៀបចំដាក់ឱ្យដេញថ្លៃធ្វើផ្លូវចំនួន៣ខ្សែ តែគណៈកម្មការអ្នករៀបចំឱ្យដេញថ្លៃមិនឃើញចូលរួមទេ មានតែខាងក្រុមហ៊ុនឯកជនមកអង្គុយចាំឱ្យរហង់ មិនឃើញមន្ត្រីជំនាញស្រុក ខេត្តមកចូលរួមទេ សង្ស័យសម្ងំច្.រាស់ច្រំទឹកតែប៉ោងថ្លើមអស់ទេដឹង ?
លោក ព្រំ អ៊ន មេឃុំដំណាក់កន្ទួតខាងជើង និយាយថា មានផ្លូវលំចំនួន៣ខ្សែត្រូវបានដាក់ឱ្យដេញថ្លៃនៅព្រឹកថ្ងៃទី១០ ខែឧសភា ឆ្នាំ២០២៣នេះ ក្នុងទឹកប្រាក់១០៥លានរៀល ។ លោកមេឃុំបន្ថែមថា ការដេញថ្លៃព្រឹកនេះអស់ម៉ោងហើយក៏មិនបានដឹងពីមូលហេតុអ្វីដែរ ព្រោះលោកមិនឃើញមានមន្ត្រីជំនាញលទ្ធកម្មស្រុក ខេត្តមកចូលរួមទេ ។
លោកមេឃុំនិយាយថា ផ្លូវលំចំនួន៣ខ្សែដែលមានគម្រោងប្រកាសឱ្យដេញថ្លៃនៅព្រឹកថ្ងៃទី១០ ខែឧសភា ឆ្នាំ២០២៣នោះ មានក្រុមហ៊ុនឯកជនមួយគេបានយកគ្រឿងចក្រទៅកាយធ្វើស្ទើរតែ៥០ភាគរយរួចទៅហើយ ។
លោកមេឃុំបន្តថា ខាងឃុំបានចុះទៅឃាត់គ្រឿងចក្រ មិនឱ្យធ្វើសកម្មភាពដែរ តែក្រុមហ៊ុននៅតែធ្វើ ។ លោកមេឃុំនិយាយថា ការកាយធ្វើផ្លូវមុនប្រកាសដេញថ្លៃនេះ ពិតជាខុសនឹងច្បាប់ ព្រោះមិនដឹងថាតើក្រុមហ៊ុននេះដេញថ្លៃបានឬមិនបាន ?
ដោយឡែកនៅឃុំចំនួន៥ នៅស្រុកឈូកមិនបានដាក់ឱ្យដេញថ្លៃទេ គ្រាន់តែចុះកិច្ចសន្យា ស្រាប់តែគ្រឿងចក្រចុះធ្វើតែម្ដង ។ រឿងរ៉ាវនេះ មិនខុសពីពាក្យដែលថា បែកពាងប្រហុកនោះឡើយ ។ ហើយបើនិយាយឱ្យចំ គឺការឃុបឃិតគ្នាពុករលួយចំតួតែម្តង…ហេ ! ហេ !
ចែករំលែកព័តមាននេះ