អ្នកនាំពាក្យក្រសួងការពារជាតិបានប្រកាសពីសភាពការណ៍ពីសមរភូមិមុខនៅវេលាម៉ោង៨ព្រឹក ថ្ងៃទី១ ឧសភា ឱ្យដឹងថា ក្រោយពីមានការជួបគ្នាចំនួន២លើកនៅតំបន់អូរស្មាច់ ខេត្តឧត្តរមានជ័យ រវាងមេបញ្ជាការថ្នាក់យោធភូមិភាគ និងនាយទាហានជួរមុខថ្នាក់កងពល កាលពីថ្ងៃទី២៨-២៩ មេសា ឆ្នាំ២០១១ ទាហានថៃនៅតែបន្តការឈ្លានពាន
អ្នកនាំពាក្យក្រសួងការពារជាតិបានប្រកាសពីសភាពការណ៍ពីសមរភូមិមុខនៅវេលាម៉ោង៨ព្រឹក ថ្ងៃទី១ ឧសភា ឱ្យដឹងថា ក្រោយពីមានការជួបគ្នាចំនួន២លើកនៅតំបន់អូរស្មាច់ ខេត្តឧត្តរមានជ័យ រវាងមេបញ្ជាការថ្នាក់យោធភូមិភាគ និងនាយទាហានជួរមុខថ្នាក់កងពល កាលពីថ្ងៃទី២៨-២៩ មេសា ឆ្នាំ២០១១ ទាហានថៃនៅតែបន្តការឈ្លានពានមកលើកម្លាំងកងយោធពលខេមរភូមិន្ទ ក្នុងតំបន់ប្រាសាទតាក្របី និងប្រាសាទតាមាន់ ក្នុងស្រុកបន្ទាយអំពិល ខេត្តឧត្តរមានជ័យដដែល ។
ការប្រកាសឱ្យដឹងថា នៅយប់ថ្ងៃទី៣០ មេសា ចាប់ពីម៉ោង៨យប់ រហូតដល់ម៉ោង៥ទៀបភ្លឺ ថ្ងៃទី១ ឧសភា ឆ្នាំ២០១១ ទាហានថៃនៅតែបាញ់ផ្លោងកាំភ្លើងត្បាល់៨១មិល្លីម៉ែត្រ និងបោកគ្រាប់បែកនៅខាងមុខខ្សែត្រៀមកងយោធពលខេមរភូមិន្ទ នៅតំបន់ប្រាសាទតាក្របី និងប្រាសាទតាមាន់ ជាបន្តបន្ទាប់ ។ ទោះបីជាបែបណា កងយោធពលខេមរភូមិន្ទនៅតែគោរពអនុវត្តតាមលទ្ធផលនៃកិច្ចពិភាក្សាទាំងពីរលើក និងប្រកាន់ខ្ជាប់យ៉ាងម៉ឺងម៉ាត់តាមគោលការណ៍រាជរដ្ឋាភិបាល ក្នុងសិទ្ធិស្វ័យការពារបូរណភាពទឹកដី និងរក្សាបាននូវទីតាំងឈរជើងលើតំបន់ស្របច្បាប់របស់ខ្លួនបានយ៉ាងរឹងមាំ ។
នៅវេលាម៉ោង៣រសៀលថ្ងៃដដែល សេចក្តីថ្លែងការណ៍អ្នកនាំពាក្យក្រសួងការពារជាតិ ក៏ត្រូវបានប្រកាសឱ្យដឹងទៀតថា ម្តងហើយម្តងទៀត ការរំលោភរបស់ទាហានថៃ បានធ្វើឱ្យកម្ពុជាមានការខូចខាតជាបន្តបន្ទាប់ ទោះជាមានការពិភាក្សាឯកភាពរវាងមេបញ្ជាការថ្នាក់យោធភូមិភាគ មេបញ្ជាការកងពលជួរមុខកម្ពុជា-ថៃ ក៏ដោយ ។ កងយោធពលខេមរភូមិន្ទ សូមថ្កោលទោស និងមិនអាចទទួលយកបាន ហើយយ៉ាងហោចណាស់ នេះជាការរំលោភលើកទី១០ ដែលទាហានថៃបានឯកភាព និងសន្យាហើយរំលោភជាក់ស្តែង និងបំភ្លៃចោទប្រកាន់កម្ពុជា ទោះបីកម្ពុជាកំពុងឈរជើងក្នុងទឹកដីដែលជាអធិបតេយ្យរបស់ខ្លួនយ៉ាងណាក្តី ។
កងយោធពលខេមរភូមិន្ទបានអំពាវនាវដល់ទាហានថៃ ឱ្យរក្សាតម្លៃនៃកិច្ចសន្យា និងអនុវត្តឱ្យបានម៉ឺងម៉ាត់នូវឆន្ទៈឈប់បាញ់ឱ្យមានប្រសិទ្ធ ភាពខ្ពស់ ដើម្បីអាយុជីវិតមនុស្សជាតិ មិនថាយោធា ឬជនស៊ីវិលដែលរាប់បញ្ចូលទាំងស្ត្រី កុមារ និងចាស់ជរា ដែលទទួលប៉ះពាល់អំពីការវាយប្រហារឈ្លានពានរបស់ទាហានថៃ ។ កងយោធពលខេមរភូមិន្ទនៅតែរក្សាភាពអត់ធ្មត់ខ្ពស់បំផុត ទោះបីជាទទួលរងគ្រោះដល់អាយុជីវិតក៏ដោយ ។ កងយោធពលខេមរភូមិន្ទរក្សាសិទ្ធិ និងកាតព្វកិច្ចក្នុងការឆ្លើយតបសមាមាត្រនឹងអ្វីដែលទាហានថៃវាយប្រហារ ដើម្បីការពារទឹកដីស្របច្បាប់របស់ខ្លួន ។
ទាក់ទិននឹងការរំលោភបទឈប់បាញ់ម្តងហើយម្តងទៀតនេះ លោកអនុសេនីយ៍ឯក អ៊ឹម ម៉ន ឈរជើងនៅខ្សែត្រៀមជួរមុខប្រាសាទតាមាន់ បានឱ្យកោះសន្តិភាពដឹងថា កងទ័ពកម្ពុជាដែលកំពុងឈរជើងនៅសមរភូមិមុខ បានយកចិត្តទុកដាក់ការពារបូរណភាពទឹកដី ហ៊ានលះបង់សាច់ស្រស់ឈាមស្រស់ និងអាយុជីវិត មិនឱ្យខ្មាំងសត្រូវសៀមឈ្លានពានយកទឹកដីកម្ពុជាបានឡើយ។ និយាយឱ្យច្បាស់ គឺមិនអនុញ្ញាតឱ្យសៀមដណ្តើមកាន់កាប់ទីតាំងឈរជើងបានជាដាច់ខាត។
លោកអនុសេនីយ៍ឯកបានបន្តទៀតថា ក្នុងការប្រយុទ្ធគ្នារវាងកងទ័ពកម្ពុជា និងកងទ័ពសៀមនោះ គឺកងទ័ពឈ្លានពានសៀមបានប្រើប្រាស់កងកម្លាំងរបស់ខ្លួនរាប់រយនាក់ បាញ់អាវុធធុនធ្ងន់ៗចូលមកក្នុងទីតាំងរបស់កងទ័ពកម្ពុជា និងបាញ់ផ្លោងចូលជ្រៅក្នុងភូមិប្រជាពលរដ្ឋរស់នៅរាប់ពាន់គ្រាប់ទៀតផង ។ ទោះបីជាយ៉ាងណា កងទ័ពរបស់កម្ពុជានៅតែមានស្មារតីអង់អាចក្លាហានបានធ្វើការវាយបកទៅវិញ បណ្តាលឱ្យក្រុមទាហានសៀមស្លាប់ និងរងរបួសជាច្រើននាក់ ។
លោកអនុសេនីយ៍ឯកបានបញ្ជាក់ថា ក្នុងការប្រយុទ្ធគ្នាអស់រយៈពេលជាង១សប្តាហ៍កន្លងទៅ ក្រុមទាហានសៀមបានស្លាប់ចោលខ្មោចក្នុងព្រៃជាច្រើន រហូតដល់មេដឹកនាំយោធភូមិភាគសៀមបានរត់មកសុំចរចាជាមួយមេបញ្ជាការយោធភូមិភាគទី៤ កម្ពុជា កាលពីថ្ងៃទី២៨ មេសា កន្លងទៅនេះ ។
ការចរចានេះ ត្រូវបានមន្ត្រីយោធារូបនេះនិយាយថា គឺសៀមរកលេសសម្រាប់ចូលយកខ្មោចទាហានរបស់គេដែលបានស្លាប់ឥតន័យក្នុងព្រៃតែប៉ុណ្ណោះ ។ បន្ទាប់មកសៀមនៅតែបន្តវាយប្រហារមកលើកម្ពុជាដដែល ។ ការផ្ទុះ អាវុធសាជាថ្មីអស់រយៈពេល១ម៉ោង នាថ្ងៃដំបូងនៃបទឈប់បាញ់ បានបណ្តាលឱ្យទាហានសៀមរងរបួស៦នាក់បន្ថែមទៀត តែសម្រាប់ទាហានកម្ពុជាពុំមានរងរបួសម្នាក់ណាឡើយ។ ចំណែកនៅឯប្រាសាទតាក្របី ក៏មានការផ្ទុះអាវុធផងដែរ បន្ទាប់ពីក្រុមទាហានសៀមបានបាញ់កាំភ្លើងធុនធ្ងន់ដាក់ទីតាំងកងទ័ពកម្ពុជារហូតដល់ម៉ោង៦ព្រឹកទើបពួកគេបញ្ឈប់ការបាញ់នេះ ។ នាថ្ងៃទី២៩ និង៣០ មេសា ក្រុមទាហានសៀមនៅតែបន្តបាញ់កាំភ្លើងធុនធ្ងន់ៗដាក់ទីតាំងកងទ័ពកម្ពុជាទៀត ហើយមានគ្រាប់មិនទាន់ផ្ទុះពី៥ទៅ១០គ្រាប់ កំពុងស្ថិតនៅក្នុងទីតាំងកងទ័ពកម្ពុជា ។
អ្នកនាំពាក្យក្រសួងការពារជាតិបានកត់សំគាល់ថា ក្រោយពីជំនួបពិភាក្សារវាងលោកឧត្តមសេនីយ៍ត្រី នាក់ វង្ស មេបញ្ជាការរង និងជានាយសេនាធិការកងពលតូចថ្មើរជើងលេខ៤២នៃកងយោធពលខេមរភូមិន្ទជាមួយលោកឌុល យ៉ាដេត មេបញ្ជាការវរសេនាធំឈុតខ្មៅថៃនៅច្រកអូរស្មាច់កាលពីវេលាម៉ោង១០ និង៣០នាទី ថ្ងៃទី២៩ ខែមេសា ឆ្នាំ២០១១ ទាហានថៃនៅតែបន្តការវាយប្រហាររំខានមកលើកងយោធពលខេមរភូមិន្ទក្នុងតំបន់ប្រាសាទតាមាន់ និងប្រាសាទតាក្របី។
នៅវេលាម៉ោង២០ ថ្ងៃទី២៩ ខែមេសា ឆ្នាំ២០១១ ទាហានថៃបានបាញ់អាវុធ M79 ត្បាល់៦០មិល្លីម៉ែត្រ ៨០មិល្លីម៉ែត្រ ១២០មិល្លីម៉ែត្រ ជាច្រើនគ្រាប់មកលើទីតាំងកងយោធពលខេមរភូមិន្ទនៅតំបន់ប្រាសាទតាក្របីក្នុងស្រុកបន្ទាយអំពិល ខេត្តឧត្តរមានជ័យរហូតដល់ម៉ោង២០ និង៣០នាទីបានផ្អាកទៅវិញ។ នៅវេលាម៉ោង៥ និង៥នាទីព្រឹក ថ្ងៃទី៣០ មេសា ឆ្នាំ២០១១ រហូតដល់ម៉ោង៦ និង៧នាទីព្រឹក ទាហានថៃបានបាញ់អាវុធ M79 ត្បាល់៦០មិល្លីម៉ែត្រ ៨០មិល្លីម៉ែត្រ ១២០មិល្លីម៉ែត្រជាច្រើនគ្រាប់ទៀតមកលើកងយោធពលខេមរភូមិន្ទក្នុងតំបន់ប្រាសាទតាមាន់ ប្រាសាទតាក្របី ក្នុងស្រុកបន្ទាយអំពិល ខេត្តឧត្តរមានជ័យ។
សកម្មភាពនេះបញ្ជាក់ឱ្យឃើញច្បាស់ថា ទាហានថៃគ្មានឆន្ទៈគោរព និងអនុវត្តតាមស្មារតីនៃកិច្ចប្រជុំទ្វេភាគីនោះឡើយ។ ពេលវេលាដល់ហើយសម្រាប់ក្រុមប្រឹក្សាសន្តិសុខអង្គការសហប្រជាជាតិ ចាត់វិធានការចំពោះអំពើឈ្លានពានរបស់ថៃមកលើកម្ពុជា គឺមិនគួរបណ្តោយឱ្យថៃធ្វើព្យុះធ្វើភ្លៀងតាមតែអំពើចិត្តដោយអាងថាខ្លួនជាប្រទេសធំនោះទេ ពីព្រោះចាប់តាំងពីថ្ងៃទី២២ មេសា ឆ្នាំ២០១១មក ទាហានថៃបានបាញ់ផ្លោងដោយគ្រាប់កាំភ្លើងជាច្រើនប្រភេទដូចជាដេកា៧៥មិល្លីម៉ែត្រ ដេកា៨២មិល្លីម៉ែត្រ កាំភ្លើងធំ១០៥មិល្លីម៉ែត្រ និងកាំភ្លើងធំ១៥៥មិល្លីម៉ែត្រ ចូលក្នុងតំបន់ប្រាសាទតាក្របី រហូតដល់ជប់គគីរ និងចូលជ្រៅចម្ងាយ២១គីឡូម៉ែត្រក្នុងទឹកដីកម្ពុជា ខេត្តឧត្តរមានជ័យ។
ទង្វើដ៏ព្រៃផ្សៃរបស់កងទ័ពថៃ គឺបានរំលោភលើស្មារតីនៃសេចក្តីថ្លៃងការណ៍ក្រុមប្រឹក្សាសន្តិសុខអង្គការសហប្រជាជាតិ ចុះថ្ងៃទី១៤ កុម្ភៈ ឆ្នាំ២០១១ និងសេចក្តីថ្លែងការណ៍ប្រធានអាស៊ាន ចុះថ្ងៃទី២២ កុម្ភៈ ឆ្នាំ២០១១។ ការឈ្លានពានជាថ្មីនេះបានធ្វើឱ្យមានការស្លាប់ និងរបួសកងទ័ព និងពលរដ្ឋស៊ីវិលជាច្រើននាក់ និងផ្ទះសម្បែងជាច្រើនខ្នងខូចខ្ទេចខ្ទីអស់។ អ្នកភូមិប្រមាណជាង៣ម៉ឺននាក់ ក្នុងចំណោមពលរដ្ឋចំនួន៥.៩២០គ្រួសារត្រូវបានជម្លៀសរត់ភៀសខ្លួនចាកចេញពីលំនៅឋាន។
តាមរយៈការចុះផ្សាយរបស់សារព័ត៌មានថៃរ៉ាត់កាលពីថ្ងៃទី២៤ កុម្ភៈ ឆ្នាំ២០១១ បានឱ្យដឹងថា រដ្ឋាភិបាលថៃគាំទ្រកងទ័ពយ៉ាងពេញទំហឹង។ ប្រទេសថៃជ្រើសយកការបង្កសង្គ្រាមដើម្បីដោះស្រាយបញ្ហាប្រឆាំងនឹងកម្ពុជាដែលវាជាការហួសសម័យទៅហើយនៅក្នុងសតវត្សទី២១នេះ។ នៅក្នុងក្រសែភ្នែកជាតិ-អន្តរជាតិបានកត់សម្គាល់ឃើញថា ប្រទេសថៃបានព្យាយាមប្រើល្បិចកលមិនចេះចប់មិនចេះហើយគ្រប់បែបយ៉ាងដើម្បីឈ្លានពានកម្ពុជាដូចជា កាលពីថ្ងៃទី១៥ កក្កដា ឆ្នាំ២០០៨, ថ្ងៃទី១៥ តុលា ឆ្នាំ២០០៨, ថ្ងៃទី៣ មេសា ឆ្នាំ២០០៩, ថ្ងៃទី៤ ដល់ថ្ងៃទី៧ កុម្ភៈ ឆ្នាំ ២០១១ និងព្រឹត្តិការណ៍ចាប់ពីថ្ងៃទី២២ មេសា ឆ្នាំ២០១១មកនេះ គឺជាសង្គ្រាមដែលថៃបើកការបាញ់ដោយទ្រង់ទ្រាយធំមកលើកម្ពុជា ដោយសារតែប្រទេសថៃប្រើប្រាស់ផែនទីចោរលួចគូដោយឯកតោភាគីគ្មានការទទួលស្គាល់ពីអន្តរជាតិ។
កាលពីថ្ងៃទី១៤ កុម្ភៈ ឆ្នាំ២០១១ ប្រទេសថៃបានឯកភាពយល់ព្រមទទួលយកការឈប់បាញ់គ្នាជាអចិន្ត្រៃយ៍នៅមុខក្រុមប្រឹក្សាសន្តិសុខអង្គការសហប្រជាជាតិ តែចាប់ពីពេលនោះមកថ្ងៃមិនដែលយកមកអនុវត្តតាមបំណងដ៏ល្អរបស់ក្រុមប្រឹក្សាសន្តិសុខអង្គការសហប្រជាជាតិម្តងណាឡើយ ថៃមិនត្រឹមតែមាក់ងាយប្រមាថប្រធានអាស៊ានប៉ុណ្ណោះទេ ថែមទាំងរំលោភលើស្មារតីប្រជុំរបស់ក្រុមប្រឹក្សាសន្តិសុខអង្គការសហប្រជាជាតិ បើសិនជាថៃគោរពស្មារតីអង្គប្រជុំនោះ ថៃក៏មិនបង្កជាថ្មីដើម្បីឈ្លានពានកម្ពុជាទេ។ ហេតុដូច្នេះក្រុមប្រឹក្សាសន្តិសុខអង្គការសហប្រជាជាតិ គប្បីចាត់វិធានការជាបន្ទាន់ចំពោះអំពើឈ្លានពានរបស់ថៃមកលើកម្ពុជា៕
ចែករំលែកព័តមាននេះ