ចៅក្រមស៊ើបសួរសាលាដំបូងរាជធានីភ្នំពេញ សម្រេចចេញដីកាឃុំខ្លួនអ្នកលេងកាំភ្លើ.ងប្រើហ្គាស ដែលស្រែកឡូឡា និងទៅគំរា.មនៅក្នុងហាងកាត់សក់នោះ
រាជធានីភ្នំពេញ ៖ កាលពីរសៀលថ្ងៃទី៦ ខែឧសភា ឆ្នាំ២០២៣នេះ ចៅក្រមស៊ើបសួរសាលាដំបូងរាជធានីភ្នំពេញ សម្រេចចេញដីកាឃុំខ្លួនអ្នកលេងកាំភ្លើ.ងប្រើហ្គាស ដែលស្រែកឡូឡា និងទៅគំរា.មនៅក្នុងហាងកាត់សក់នោះ ដាក់ពន្ធនាគារជាបណ្តោះអាសន្ន ដើម្បីរង់ចាំបើកសវនាការផ្តន្ទាទោសតាមច្បាប់ជាធរមាន។
បានជាចៅក្រមស៊ើបសួរ សម្រេចឃុំខ្លួនអ្នកលេងកាំភ្លើ.ងប្រើហ្គាសនោះ បន្ទាប់លោក សេង ម៉េងស្រ៊ន ព្រះរាជអាជ្ញារង តំណាងអយ្យការអមសាលាដំបូងរាជធានីភ្នំពេញ នៅថ្ងៃទី៤ ខែឧសភា ឆ្នាំ២០២៣ បើកការស៊ើបសួរ និងចោទប្រកាន់ជាផ្លូវការ ទៅលើករណីស្រែកជេរឡូឡា និងយកកាំភ្លើ.ងប្រើហ្គាស ទៅភ្ជង់គំរា.មជាងកាត់សក់ក្នុងហាងយីហោ «RHM» នៅតាមបណ្តោយផ្លូវលេខ៤៣២ ស្ថិតក្នុងសង្កាត់បឹងត្របែក ខណ្ឌចំការមន រាជធានីភ្នំពេញ ។
បុរសខាងលើរូបនោះមានឈ្មោះ លឹម សុងឆ័យ អាយុ៣៣ឆ្នាំ មុខរបរជាអាជីវករលក់ដូរ ស្នាក់នៅសង្កាត់ទួលទំពូង១ ខណ្ឌចំការមន ។ បុរសរូបនេះត្រូវបានសមត្ថកិច្ចនគរបាលចាប់បញ្ជូនខ្លួនទៅកាន់សាលាដំបូងរាជធានីភ្នំពេញ បន្ទាប់ពីរូបគេធ្វើសកម្មភាពស្រែកជេរឡូឡា និងយកកាំភ្លើ.ងប្រើហ្គាសទៅគំរា.មនៅក្នុងហាងកាត់សក់យីហោ «RHM» ធ្វើឲ្យមានការភ្ញាក់ផ្អើលយ៉ាងខ្លាំង។
គួរបញ្ជាក់ថា កាលពីថ្ងៃទី២ ខែឧសភា ឆ្នាំ២០២៣ បុរសរូបនោះបានទៅស្រែកជេរឡូឡា និងយកកាំភ្លើ.ងប្រើហ្គាសគំរា.មអ្នកដទៃ ហើយត្រូវបុគ្គលិកនៅក្នុងហាង ហាមឃាត់កុំឲ្យសើចលឺព្រោះរំខានដល់ភ្ញៀវមកកាត់សក់នៅទីនោះ។
តាមរយៈវីដេអូដែលត្រូវគេចែកចាយនៅលើបណ្ដាញសង្គមក្នុងថ្ងៃខែខាងលើ បានបង្ហាញថា បុរសម្នាក់នោះស្លៀកខោខូវប៊យ ពាក់អាវយឺតពណ៌លឿង ជិះរថយន្តទំនើប១គ្រឿង ពាក់ស្លាកលេខ ការ៉េពីរ (២២២២) បានចូលទៅក្នុងហាងកាត់សក់យីហោ «RHM» រួចស្រែកជេរគេជេរឯង។ មួយសន្ទុះក្រោយមក បុរសរូបនោះក៏ដើរចេញទៅក្រៅទំនងចូលក្នុងរថយន្ត រួចក៏យកគ្រាប់កាំភ្លើ.ងពិតមកបាចនៅក្នុងហាង បង្កឲ្យមានការភ័យខ្លាចដល់ជាងកាត់សក់ និងភ្ញៀវដទៃទៀតដែលកំពុងអង្គុយរង់ចាំកាត់សក់។ បន្ទាប់មកទៀត បុរសនោះក៏ដើរចេញទៅវិញ និងយកកាំភ្លើ.ងខ្លីប្រើហ្គាសសៀតចង្កេះ រួចសើយអាវឡើងលើ ដើម្បីគំរា.មជាងកាត់សក់ទំនងចង់បញ្ជាក់ថា ខ្លួនមានកាំភ្លើ.ង។
នៅក្នុងរូបភាពវីដេអូនោះទៀត ក៏បានបញ្ជាក់ថា ទាំងជាងកាត់សក់ និងភ្ញៀវនៅក្នុងហាង មានការភ័យខ្លាចយ៉ាងខ្លាំង រហូតអ្នកខ្លះលើកដៃសំពះអង្វរសុំឲ្យបុរសរូបនោះបញ្ឈប់សកម្មភាព ខណៈភ្ញៀវដទៃទៀតក៏បានរត់ចេញពីក្នុងហាងទាំងព្រលឹងចុងសក់ផងដែរ។ ទង្វើទាំងអស់នោះហើយ ដែលធ្វើឲ្យសមត្ថកិច្ចឈានដល់ការឃាត់ខ្លួន និងកសាងសំណុំរឿងបញ្ជូនខ្លួនជនសង្ស័យទៅកាន់សាលាដំបូងរាជធានីភ្នំពេញ ដើម្បីចាត់ការតាមផ្លូវច្បាប់៕
ចែករំលែកព័តមាននេះ