សំណង់ប្រព័ន្ធលូក្នុងឃុំព្រែកខ្សាយ (ខ) ធ្វើមិនទាន់ហើយផង រលំបា.ក់អស់ ពលរដ្ឋថា សំណង់គ្មានគុណភាព
- ព្រៃវែង
ខេត្តព្រៃវែង ៖ សំណង់ប្រព័ន្ធលូរំដោះទឹកប្រវែងជាង200ម៉ែត្រ នៅក្នុងភូមិ 5 ឃុំព្រែកខ្សាយ ( ខ ) ស្រុកពាមរក៍…
ខេត្តព្រៃវែង ៖ សំណង់ប្រព័ន្ធលូរំដោះទឹកប្រវែងជាង200ម៉ែត្រ នៅក្នុងភូមិ 5 ឃុំព្រែកខ្សាយ ( ខ ) ស្រុកពាមរក៍ ខេត្តព្រៃវែង បានរលំបាក់ខ្ទេចអស់ក្នុងពេលដែលក្រុមជាងកំពុងតែសាងសង់មិនទាន់ទាំងរួចរាល់ផង ដោយសារតែសំណង់គ្មានគ្រឹះក្រោម ។
អាជ្ញាធរឃុំព្រែកខ្សាយ (ខ) បានឲ្យដឹងថា ប្រព័ន្ធលូរំដោះទឹកនេះ ក្នុងគម្រោងមានប្រវែងជាង800 ម៉ែត្រ ដោយឆ្លងកាត់ភូមិចំនួន2 គឺភូមិ5 និងភូមិ6 ដោយមានក្រុមហ៊ុនឈ្មោះ រ៉េត រិន ជាអ្នកដេញ ថ្លៃធ្វើ ក្នុងតម្លៃទឹកប្រាក់ប្រមាណជាង300លានបូករួមទាំងការស្ដារលូប្រវែងជាង3000ម៉ែត្រផងដែរ ហើយក្រុមហ៊ុននេះបានចាប់ផ្ដើមដំណើរការសាងសង់កាលពីអំឡុងដើមខែសីហា។
ប្រជាពលរដ្ឋនៅភូមិ5បានឲ្យដឹងថា ពេលឃើញក្រុមជាងចុះមកឈូសឆ្ងាយសាងសង់ធ្វើប្រព័ន្ធលូរំដោះទឹក ពួកគាត់មានការត្រេកអរខ្លាំងណាស់ដោយសង្ឃឹមថា ពួកគាត់នឹងលែងលំបាកត្រូវទឹកជន់លិចដូចមុនទៀតហើយ ប៉ុន្តែការត្រេកអរនេះក៏ត្រូវខកចិត្តទៅវិញ ដោយសារតែសំណង់ប្រព័ន្ធលូនេះ ធ្វើមិនទាន់រួចរាល់ផង ក៏ស្រាប់តែរលំបាក់អស់ ចំណែកក្រុមជាងក៏មិនឃើញមកធ្វើការជួសជុលវិញដែរ គឺទុកចោលឲ្យនៅមេម៉ាយរហូតដល់សព្វថ្ងៃនេះ។
ពលរដ្ឋទាំងនោះបានបញ្ជាក់ថា មូលហេតុដែលធ្វើឲ្យសំណង់លូរំដោះទឹកនេះរលំបាក់អស់ ទាំងដែលជាងធ្វើមិនទាន់រួចផងនោះ គឺដោយសារតែសំណង់គ្មានគ្រឹះក្រោម ពេលធ្វើក្រុមជាងមិនបានកាយយកភក់ល្បាប់ចេញទេ គឺគេបោះថ្មរៀបឥដ្ឋពីលើភក់ល្បាប់តែម្ដង លុះពេលមានភ្លៀងទឹកហូរបុកខ្លាំង ក៏ធ្វើឲ្យជញ្ជាំងលូរលំបាក់អស់ ទាំងដែលធ្វើមិនទាន់រួចបែបនេះទៅ ហើយពេលភ្លាមៗក្រុមហ៊ុនម៉ៅការបានចរចាសុំឱ្យអាជ្ញាធរឃុំចេញលុយជួយខាតម្នាក់ពាក់កណ្ដាល ដើម្បីគេសាងសង់ឡើងវិញ ប៉ុន្តែខាងឃុំមិនព្រម ទើបអ្នកម៉ៅការទុកសំណង់នេះចោល លែងធ្វើរហូតដល់សព្វថ្ងៃតែម្ដង។
លោក ជុំ ជា មេឃុំព្រែកខ្សាយ ( ខ ) បានអោយដឹងថា តាមគំរោងប្រព័ន្ធលូរំដោះទឹកនេះមានប្រវែងសរុបជាង 800 ម៉ែត្រ ពេលនេះក្រុមហ៊ុនម៉ៅការសាងសង់រួចរាល់អស់ហើយ គឺនៅសល់តែប្រវែងជាង200ម៉ែត្រដែលរលំបាក់នេះទេ ហើយក្រុមហ៊ុន រ៉េត រិន បានសន្យាថា នឹងត្រឡប់មកជួសជុលសងវិញក្រោយភ្ជុំបិណ្ឌរួច និងស្ដារប្រព័ន្ធលូប្រវែងជាង3000 ម៉ែត្រទៀត ដើម្បីបញ្ចប់គម្រោង ប៉ុន្តែក្នុងករណីបើក្រុមហ៊ុនមិនមកធ្វើវិញទេ នោះលោកក៏មិនស៊ីញ៉េបញ្ចប់គម្រោង ហើយក្រុមហ៊ុនក៏មិនអាចដកប្រាក់បានដែរ ។
ចែករំលែកព័តមាននេះ