ខេត្តបាត់ដំបង ៖ សមត្ថកិច្ចមូលដ្ឋានបានរាយការណ៍ពីតំបន់ជម្លោះដីធ្លីដ៏រ៉ាំរ៉ៃ «បឹងប្រាំ» ស្រុកបវេលមកថា ខ្មាន់កាំភ្លើងដែលមានរុំមុខជិតបានស្ទាក់បា.ញ់រថយន្តលោកឈា នី ដែលជាតំណាងពលរដ្ឋនៅតំបន់ «បឹងប្រាំ» នេះពីក្នុងគុម្ពោតព្រៃត្រង់ចំណុចបឹងកំប្រុក ស្ថិតក្នុងភូមិបឹងសង្កែ ឃុំអំពិលប្រាំដើម កាលពីវេលាម៉ោង៩ព្រឹកថ្ងៃទី១ ឧសភា
ខេត្តបាត់ដំបង ៖ សមត្ថកិច្ចមូលដ្ឋានបានរាយការណ៍ពីតំបន់ជម្លោះដីធ្លីដ៏រ៉ាំរ៉ៃ «បឹងប្រាំ» ស្រុកបវេលមកថា ខ្មាន់កាំភ្លើងដែលមានរុំមុខជិតបានស្ទាក់បាញ់រថយន្តលោកឈា នី ដែលជាតំណាងពលរដ្ឋនៅតំបន់ «បឹងប្រាំ» នេះពីក្នុងគុម្ពោតព្រៃត្រង់ចំណុចបឹងកំប្រុក ស្ថិតក្នុងភូមិបឹងសង្កែ ឃុំអំពិលប្រាំដើម កាលពីវេលាម៉ោង៩ព្រឹកថ្ងៃទី១ ឧសភា បណ្តាលឱ្យក្មេងប្រុសជំទង់ម្នាក់ដែលអង្គុយក្នុងរថយន្តរងរបួសជើងម្ខាង ក្នុងគ្រាដែលលោកឈា នី ធ្វើដំណើរជាមួយក្រុមការងាររបស់លោកមកកាន់សាលាស្រុកបវេល ។
លោកឈា នី អាយុ៣៨ឆ្នាំ បានប្រាប់កោះសន្តិភាពក្រោយពីមានការបាញ់ប្រហារមកលើរូបលោកភ្លាមៗនៅកន្លែងកើតហេតុថា ខ្មាន់កាំភ្លើងនោះរុំមុខជិតស្ថិតក្នុងគុម្ពោតព្រៃចម្ងាយពីរថយន្តរបស់លោកប្រហែល១៥ម៉ែត្រប៉ុណ្ណោះ ហើយជននេះបានប្រើប្រាស់កាំភ្លើង AK បាញ់រះមកលើរូបលោកដែលអង្គុយក្នុងរថយន្តជាមួយក្រុមការងារ និងភរិយារបស់លោក ។ លោកឈា នី បានបញ្ជាក់ថា លោកបានចេញដំណើរពីផ្ទះនៅភូមិសំណាងព្រះស្រី ឃុំអំពិលប្រាំដើម ឆ្ពោះទៅសាលាស្រុកបវេល ប៉ុន្តែ ពេលចេញបានចម្ងាយប្រហែល២គីឡូម៉ែត្រ ដល់ចំណុចវាលស្រែមួយកន្លែងក៏ប្រទះឃើញក្មេងប្រុស២នាក់កំពុងដើរតាមផ្លូវ ឃើញដូច្នេះរូបគាត់ក៏ឈប់រថយន្តដើម្បីដឹកក្មេងប្រុសនោះទៅជាមួយដោយការអាណិតអាសូរ ។ ក្មេងប្រុសចូលក្នុងរថយន្តមិនទាន់បិទទ្វារផង ស្រាប់តែស្នូរកាំភ្លើងបាញ់រះមកលើរថយន្តរបស់លោកពីក្នុងគុម្ពោតព្រៃខាងឆ្វេងដៃរបស់លោក ហើយគ្រានោះរូបលោកបានបន្ថែមល្បឿនរថយន្ត លុះបានឆ្ងាយបន្តិចគាត់ឈប់រថយន្តពិនិត្យឃើញស្នាមគ្រាប់កាំភ្លើងទម្លុះទ្វាររថយន្តរបស់គាត់ចំនួន២កន្លែង បណ្តាលឱ្យក្មេងប្រុសម្នាក់ឈ្មោះរើន រឿត អាយុ១៦ឆ្នាំ របួសជើងខាងស្តាំ ហើយភ្លាមនោះរូបលោកបានទូរស័ព្ទរាយការណ៍ទៅសមត្ថកិច្ចភ្លាមៗដែរ ។
លោកឌី សារ៉េត អធិការស្រុកបវេល ដែលកំពុងដឹកនាំកម្លាំងចុះទៅកាន់តំបន់កើតហេតុនោះបានប្រាប់តាមទូរស័ព្ទថា ពិតជាមានការបាញ់ប្រហារទៅលើរថយន្តលោកឈា នី មែន ។ លោកអធិការរងបានបញ្ជាក់ថា កម្លាំងរបស់លោកកំពុងពិនិត្យកន្លែងបាញ់ប្រហារ ដើម្បីធ្វើការស្រាវជ្រាវឈានដល់ការឃាត់មុខសញ្ញា ។
សូមបញ្ជាក់ថា តំបន់ «បឹងប្រាំ» គឺជាតំបន់ជម្លោះដីថ្លីដ៏ច្របូកច្របល់បំផុតច្រើនឆ្នាំមកហើយ មិនទាន់មានដំណោះស្រាយណាមួយជាផ្លូវការនោះទេ ។ រីឯលោកឈា នី ជាភាគីម្ខាងនៃជម្លោះនេះ ហើយរូបលោកក៏ធ្លាប់ជាប់គុកដោយសារតែវិវាទដីធ្លីនៅតំបន់នេះដែរ ។ បច្ចុប្បន្នលោកឈា នី ជាតំណាងប្រជាពលរដ្ឋដ៏មានឥទ្ធិពលម្នាក់នៅតំបន់នោះ ដែលទទួលស្គាល់ដោយអាជ្ញាធរគ្រប់លំដាប់ថ្នាក់ ប៉ុន្តែរូបលោកក៏សំបូរសត្រូវយាយីមិនតិចដែរ ដែលជាភាគីមានជម្លោះដីធ្លីជាមួយរូបលោកនៅតំបន់នោះ ។
គួររំលឹកផងដែរថា ក្រុមប្រជាពលរដ្ឋរាប់រយនាក់ដែលជាភាគីធ្លាប់មានជម្លោះជាមួយលោកឈា នី កន្លងមក បានប៉ះទង្គិចគ្នាយ៉ាងក្តៅគគុក កាលពីថ្ងៃទី ២៨ និងទី២៩ មីនា កន្លងទៅថ្មីៗនេះ ជាមួយនឹងក្រុមអាជ្ញាធរដោះស្រាយជម្លោះដីធ្លីដែលមានទាំងសមត្ថកិច្ចផង ក្នុងគ្រាដែលក្រុមគណៈកម្មការចម្រុះនេះចុះទៅបោះបង្គោលកំណត់ព្រំដែនសម្បទានសង្គមកិច្ចរបស់រដ្ឋនៅចំណុចបឹងស្រមោច និងបឹងប្រាំ ដែលស្ថិតនៅក្នុងភូមិសាស្ត្រឃុំអំពិលប្រាំដើម និងឃុំព្រៃខ្ពស់ ស្រុកបវេល ហើយកាលណោះលោកឈា នី ក៏ស្ថិតក្នុងជួរក្រុមគណៈកម្មការចម្រុះនេះដែរ ។ ក្រុមប្រជាពលរដ្ឋដែលប្រដាប់ដោយកាំបិតពូថៅ និងដំបងបានវាយកំទេចបង្គោលព្រំអស់ចំនួន៦ដើម ដែលក្រុមអាជ្ញាធរដោះស្រាយវិវាទដីធ្លី ទើបចាប់ផ្តើមដាំជាលើកដំបូង ។ ក្រុមអ្នកភូមិនេះបានធ្វើការរារាំងក្រុមការងារនេះមិនឱ្យចាកចេញពីតំបន់នោះទៀតផង រហូតមកដល់ពេលនេះក្រុមអាជ្ញាធរខាងលើមិនទាន់មានផែនការជាថ្មីនោះទេ ។
លោកឈា នី បាននិយាយថា តាំងពីពេលនោះមករូបលោកត្រូវបានភាគីទំនាស់នោះ តាមយាយីអាយុជីវិតរូបលោក និងក្រុមគ្រួសារមិនឈប់ឈរ ។ លោកនិយាយថា ភាគីប្រឆាំងនោះបានចោទប្រកាន់រូបលោកថា ជាអ្នកផ្តើមគំនិតឱ្យក្រុមគណៈកម្មការនោះមកបោះបង្គោលព្រំដីសម្បទានសង្គមកិច្ចរបស់រដ្ឋនៅតំបន់នោះ ។ លោកថា ការស្ទាក់បាញ់រថយន្តរបស់លោកកាលពីព្រឹកថ្ងៃទី១ ឧសភា នេះគឺ ជាការប៉ុនប៉ងបាញ់ប្រហារមកលើរូបលោក ភរិយាលោក និងក្រុមការងាររបស់លោកម្នាក់ទៀតដែលអង្គុយក្នុងរថយន្តកាមរីជាមួយគ្នា ពីសំណាក់ភាគីជម្លោះដីធ្លីរបស់លោកហ្នឹងហើយ ។ លោកនិយាយថាលោកអាចស្គាល់ពីអត្តសញ្ញាណនៃខ្មាន់កាំភ្លើងនោះ ហើយមុនពេលលោកចេញដំណើរនាព្រឹកនោះក៏មានអ្នករាយការណ៍ប្រាប់ទៅខ្មាន់កាំភ្លើងនោះដែរ។ ដូច្នេះហើយទើបជនបិទមុខនោះមកស្ទាក់ចាំផ្លូវមុន ហើយរូបលោកនិងដាក់ពាក្យបណ្តឹងជាផ្លូវការទៅ កាន់សមត្ថកិច្ចឱ្យជួយចាត់ការ ។
ទោះបីជាបែបណាលោកឌី សារ៉េត អធិការរងបានបញ្ជាក់ថា មិនទាន់មានតម្រុយពីខ្មាន់កាំភ្លើងនោះទេ ប៉ុន្តែនៅកន្លែងកើតហេតុយើងប្រទះឃើញសំបកគ្រាប់កាំភ្លើង AK ដែលជននេះបាញ់ហើយមានស្នាមដានជើងខ្មាន់កាំភ្លើងចំនួន២នាក់រត់ចេញពីគុម្ពោតព្រៃនោះ ។ លោកបានបញ្ជាក់ថា កម្លាំងកងរាជអាវុធហត្ថខេត្តបានរកឃើញទូរស័ព្ទដៃមួយគ្រឿងដែលគេសង្ស័យថា ជារបស់ជនសង្ស័យបានធ្លាក់ពេលពួកគេរត់ចេញពីគុម្ពោតព្រៃ៕
ចែករំលែកព័តមាននេះ