មួយយប់បាត់ក្របីជិត១០ក្បាលពីក្រោល ផ្អើលឆោឡោពេញភូមិ
- ឧត្តរមានជ័យ
គេបានដាក់ការសង្ស័យថា សត្វក្របីចំនួន៧ក្បាល ត្រូវក្រុមចោរមិនស្គាល់អត្តសញ្ញាណ ចូលលួចដឹកចេញពីក្រោលយកទៅឡើងរថយន្តដឹកចេញដោយសុវត្ថិភាព
ខេត្តឧត្តរមានជ័យ ៖ គេបានដាក់ការសង្ស័យថា សត្វក្របីចំនួន៧ក្បាល ត្រូវក្រុមចោរមិនស្គាល់អត្តសញ្ញាណ ចូលលួចដឹកចេញពីក្រោលយកទៅឡើងរថយន្តដឹកចេញដោយសុវត្ថិភាព កាលពីប្រមាណវេលាម៉ោង១ទៅ២យប់រំលងអធ្រាតឈានចូលថ្ងៃទី៣ ខែឧសភា ឆ្នាំ២០២៣នេះ។ ទីតាំងក្រោលក្របីនេះ ស្ថិតនៅឆ្ងាយពីលំនៅដ្ឋានម្ចាស់ក្របី ស្ថិតក្នុងភូមិថ្មី សង្កាត់កូនក្រៀល ក្រុងសំរោង ខេត្តឧត្តរមានជ័យ។
បើតាមប្រភពពីម្ចាស់ក្របីមានឈ្មោះ ផុន សារិន ភេទប្រុស អាយុ៥០ឆ្នាំ រស់នៅភូមិថ្មី សង្កាត់កូនគ្រៀល បានប្រាប់កោះសន្តិភាពឲ្យដឹងនៅល្ងាចថ្ងៃទី៣ ខែឧសភា ឆ្នាំ២០២៣នេះថា កាលពីវេលាម៉ោង៦ល្ងាច រូបគាត់ដើរចេញពីផ្ទះក្នុងគោលបំណងទៅរកអង្ក្រង ខណៈពេលនោះក៏ដើរទៅក្រោលក្របីប្រហែលជា៤០០ម៉ែត្រពីផ្ទះ ដើម្បីដេញក្របីឲ្យចេញស៊ីស្មៅនៅវាលស្រែ ក៏ស្រាប់តែប្រទះឃើញបាត់ក្របីអស់ចំនួន៧ក្បាល (ឈ្មោល១ក្បាល និងញី៦ក្បាល) ក្នុងចំណោមក្របីចំនួន១៩ក្បាល។ ពេលឃើញដូចនេះ ក៏បង្កឱ្យមានការភ្ញាក់ផ្អើលឆោឡោពេញភូមិតែម្តង ហើយក៏រត់ទៅប្រាប់មេភូមិ និងប្តឹងសមត្ថកិច្ចប៉ុស្តិ៍រដ្ឋបាលសង្កាត់កូនគ្រៀលភ្លាមៗផងដែរ។
ម្ចាស់ក្របីដដែលប្រាប់បន្តថា ក្របីគាត់ចិញ្ចឹមទាំងអស់មានចំនួន១៩ក្បាលសុទ្ធតែប្រវាក់គេមកឃ្វាលទាំងអស់ ។ជាក់ស្តែងនៅយប់មិញនេះ ក៏ត្រូវបានចោរលួចបាត់អស់ចំនួន៧ក្បាលតែម្តង។ ក្រោយពេលបាត់ក្របី គាត់ក៏បានដើររកនៅតាមព្រៃដែលគាត់ដេញឃ្វាលជាប្រចាំថ្ងៃប្រមាណជា១គីឡូដី ស្រាប់តែឃើញស្នាមដឹកក្របីកាត់តាមចម្ការដំឡូងមី ហើយក៏ឃើញមានស្នាមជើងក្របីទៀតផង ស្របពេលនោះគាត់បានសន្និដ្ឋានច្បាស់ថា ក្របីដែលក្រុមចោរលួចនេះ គឺបានដឹកចេញពីក្រោល រួចដឹកឡើងរថយន្តទាំងអស់។
បើតាមសាក្សីរស់នៅក្បែរក្រោលក្របី ដែលមានទីតាំងចំណុចខាងលើ បានរៀបរាប់ប្រាប់ថា បើកាលពីយប់មិញនេះ ម៉ោងប្រហែលជា១ជាង គាត់បានភ្ញាក់ពីដំណេកងើបមើលកូនគាត់ឈឺ ពេលនោះក៏បានឮសម្លេងឆ្កែព្រូសខ្លាំងៗដែរ តែមិនបានចាប់អារម្មណ៍។ ហើយនៅម៉ោងនោះ គាត់ឮសំឡេងមានម៉ូតូ២គ្រឿងមកឈប់នៅក្បែរក្រោលគោរបស់បងសារិនដែរ តែមិនដឹងថាមានចោរលួចក្របីបែបនេះ លុះព្រឹកឡើងបានដឹងថា យប់មិញមានចោរលួចក្របីឡើងឡានអស់៧ក្បាលបាត់ទៅហើយ។
សូមបញ្ជាក់ថា បើតាមការលើកឡើងពីម្ចាស់ក្របី និងអ្នករស់នៅក្នុងភូមិជាច្រើនគ្រួសារ ក៏បាននិយាយតៗគ្នាថា គាត់ចិញ្ចឹមក្របីនេះរយៈពេលជិតដប់ឆ្នាំមកហើយ មិនដែលមានករណីចោរលួចបែបនេះទេ ពីព្រោះថា ក្នុងភូមិថ្មីមួយនេះ ស្ថិតនៅក្បែរប៉ុស្តិ៍ប៉ូលិសទៀត ហើយផ្ទះប្រជាការពារក៏នៅក្បែរក្រោលរោងក្របីនេះដែរ លុះដល់ពេលកើតមានចោរបែបនេះ ពួកគាត់មានការព្រួយបារម្មណ៍ជាខ្លាំង៕
ចែករំលែកព័តមាននេះ