រាជធានីភ្នំពេញ ៖ កាលពីថ្ងៃទី២៩ មេសា នៅសណ្ឋាគារសាន់វ៉េ មានធ្វើសិក្ខាសាលាស្តីពីការប្រយុទ្ធប្រឆាំងផលិតផលក្លែងក្លាយដែលបង្កគ្រោះថ្នាក់ដល់សុខភាពប្រជាពលរដ្ឋ។ សិក្ខាសាលានេះរៀបចំឡើងដោយអ្នកតំណាងពិសេសរបស់ក្រសួងការបរទេសប្រចាំសហគមន៍អឺរ៉ុប និងជាអ្នកទទួលបន្ទុកប្រយុទ្ធប្រឆាំងឱសថក្លែងក្លាយ
រាជធានីភ្នំពេញ ៖ កាលពីថ្ងៃទី២៩ មេសា នៅសណ្ឋាគារសាន់វ៉េ មានធ្វើសិក្ខាសាលាស្តីពីការប្រយុទ្ធប្រឆាំងផលិតផលក្លែងក្លាយដែលបង្កគ្រោះថ្នាក់ដល់សុខភាពប្រជាពលរដ្ឋ។ សិក្ខាសាលានេះរៀបចំឡើងដោយអ្នកតំណាងពិសេសរបស់ក្រសួងការបរទេសប្រចាំសហគមន៍អឺរ៉ុប និងជាអ្នកទទួលបន្ទុកប្រយុទ្ធប្រឆាំងឱសថក្លែងក្លាយ ដោយមានការអញ្ជើញចូលរួមពីលោកសូ ផន អនុរដ្ឋលេខាធិការក្រសួងមហាផ្ទៃ លោកឧត្តមសេនីយ៍ទោ ស៊ាង ប៊ុនលាង ប្រធាននាយកដ្ឋាននគរបាលប្រឆាំងបទល្មើសសេដ្ឋកិច្ច មន្ត្រីមកពីស្ថាប័នតុលាការ នគរបាលយុត្តិធម៌ក្រសួងពាណិជ្ជកម្ម កសិកម្ម អាជ្ញាធរមូលដ្ឋានពាក់ព័ន្ធ និងក្រុមហ៊ុនឯកជនជាច្រើនទៀត ។
គោលបំណងសំខាន់របស់អង្គសិក្ខាសាលានេះ ធ្វើឡើងដើម្បីប្រយុទ្ធប្រឆាំងផលិតផលឱសថក្លែងក្លាយ ដែលបង្កគ្រោះថ្នាក់ខ្លាំងបំផុតដល់សុខភាព សុវត្ថិភាពសាធារណៈ និងផ្តោតសំខាន់ទៅលើការប្រឈមទាំងឡាយ ដែលគំរាមកំហែងដល់សមត្ថភាពរបស់សមត្ថកិច្ចដែលមានតួនាទីបង្ក្រាបសកម្មភាពលួចនាំចូល លួចផលិត លក់ និងចែកចាយឱសថក្នុងព្រះរាជាណាចក្រកម្ពុជា ។ អង្គសិក្ខាសាលាបានធ្វើឱ្យសមាជិកចូលរួមទាំងអស់យល់ដឹង និងមានសមត្ថភាពចាត់វិធានការ បង្ការ បង្ក្រាបឱសថក្លែងក្លាយ ដើម្បីបញ្ចៀសឱ្យផុតពីការគ្រោះថ្នាក់ដល់សុខភាពប្រជាពលរដ្ឋ ។
លោកវរសេនីយ៍ទោ ឡុង ស្រេង ប្រធានការិយាល័យរដ្ឋបាលសរុបនៃនាយកដ្ឋាននគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃ បានឡើងធ្វើបទបង្ហាញអំពីតួនាទី និងភារកិច្ចរបស់នគរបាលប្រឆាំងបទល្មើសសេដ្ឋកិច្ចយ៉ាងក្បោះក្បាយថា នាយកដ្ឋាននគរបាលប្រឆាំងបទល្មើសសេដ្ឋកិច្ច កាលពីឆ្នាំ២០១០ កន្លងទៅ បានបើកការស៊ើបអង្កេត និងបង្ក្រាបបទល្មើសគ្រប់ប្រភេទបានចំនួន៤២៨ករណី ក្នុងនោះមានបទល្មើសជាក់ស្តែងផង ដោយមានការសហការជាមួយអង្គភាពជំនាញពាក់ព័ន្ធ ។ ឃាត់ខ្លួនជនសង្ស័យ១៣១នាក់ កសាងសំណុំរឿងបញ្ជូនទៅសាលាដំបូង២៧នាក់ បញ្ជូនទៅស្ថាប័នជំនាញពាក់ព័ន្ធ៦៦នាក់ និងបានអប់រំឱ្យធ្វើកិច្ចសន្យាបញ្ឈប់សកម្មភាពខុសច្បាប់៦នាក់។
លោកឡុង ស្រេង បានបន្តថា លទ្ធផលដែលនាយកដ្ឋាននគរបាលប្រឆាំងបទល្មើសសេដ្ឋកិច្ចធ្វើបាននេះ រួមមានបទល្មើសនាំចូលឱសថក្លែងក្លាយគ្រប់ប្រភេទ៧ករណី បទល្មើសព្រៃឈើ២២២ករណី បទល្មើសជលផល១២១ករណី បទល្មើសកម្មសិទ្ធិបញ្ញា៣០ករណី បទល្មើសនាំចូលសាច់បក្សីខូចគុណភាព១៦ករណី បទល្មើសផលិត និងដឹកជញ្ជូនប្រេងម្រះព្រៅ១ករណី បទល្មើសចរាចរប្រាក់់ដុល្លារក្លែងក្លាយ១ករណី បទល្មើសគេចពន្ធ២ករណី និងពាក់ព័ន្ធបទល្មើសផ្សេងទៀត២៨ករណី ។
លោកឡុង ស្រេង បានបន្តទៀតថា នាយកដ្ឋានបាននិងកំពុងដាក់ផែនការបន្តនីតិវិធីស៊ើបអង្កេតលើបទល្មើសផលិតផលឱសថក្លែងក្លាយ និងបទល្មើសកម្មសិទ្ធិបញ្ញាក្នុងឆ្នាំ២០១១នេះឱ្យកាន់តែខ្លាំងក្លាថែមទៀត ។ ផែនការ និងសកម្មភាពខាងលើធ្វើឡើងក្នុងគោលបំណងថែរក្សាការពារសុខុមាលភាពប្រជាពលរដ្ឋ និងលុបបំបាត់ឈ្មួញដែលរកសីុល្មើសច្បាប់ សំដៅរួមចំណែកអភិវឌ្ឍប្រទេសជាតិក្រោមការដឹកនាំរបស់រាជរដ្ឋាភិបាល៕
ចែករំលែកព័តមាននេះ