ដីតំបន់ការពារធនធានធម្មជាតិមិនអាចទិញលក់បានទេ… ប៉ុន្តែសព្វថ្ងៃរលាយបាត់ហើយ
- ប៉ៃលិន
ខេត្តប៉ៃលិន ៖ កាលពីពេលថ្មីៗកន្លងទៅនេះ ឯកឧត្តម ជា សំអាង រដ្ឋលេខាធិការក្រសួងបរិស្ថានតំណាងដ៏ខ្ពង់ខ្ពស់ ឯកឧត្តម សាយ សំអាល់…
ខេត្តប៉ៃលិន ៖ កាលពីពេលថ្មីៗកន្លងទៅនេះ ឯកឧត្តម ជា សំអាង រដ្ឋលេខាធិការក្រសួងបរិស្ថានតំណាងដ៏ខ្ពង់ខ្ពស់ ឯកឧត្តម សាយ សំអាល់ រដ្ឋមន្ត្រីក្រសួងបរិស្ថានបានថ្លែងដោយសង្កត់ធ្ងន់ កាលពីចុងសប្តាហ៍កន្លងទៅ ក្នុងការបើកសិក្ខាសាលាស្តីពីការផ្សព្វផ្សាយច្បាប់ ពាក់ព័ន្ធទៅនឹងវិស័យបរិស្ថាន និងធនធានធម្មជាតិ តំបន់បរិស្ថានខេត្តប៉ៃលិន នៅក្នុងសាលប្រជុំមន្ទីរអប់រំ យុវជន និងកីឡា ខេត្តប៉ៃលិន ។
លើសពីនេះ រដ្ឋលេខាធិការក្រសួងបរិស្ថានបានមានប្រសាសន៍បញ្ជាក់ថា ៖ ការបើកសិក្ខាសាលានេះ គឺមានគោលបំណងបង្ហាញពីការផ្សព្វផ្សាយច្បាប់ពាក់ព័ន្ធទៅនឹងវិស័យតំបន់បរិស្ថាន និងធនធានធម្មជាតិ ដែលរួមចំណែកយ៉ាងសំខាន់នៅក្នុងការពង្រឹងសមត្ថភាពរបស់មន្ត្រីអនុវត្តច្បាប់ពាក់ព័ន្ធ នៅក្នុងការបង្ក្រាបបទល្មើសដែលកំពុងកើតឡើងចំពោះធនធានធម្មជាតិនៅក្នុងតំបន់ការពារច្រើនយ៉ាងសំឡូតប៉ៃលិនក្នុងភូមិសាស្ត្រខេត្តប៉ៃលិននិងការកសាងសំណុំរឿងបញ្ជូនទៅតុលាការចំពោះជនណាដែល ហ៊ានរុករានកាប់ទន្ទ្រានដីព្រៃយកធ្វើកម្មសិទ្ធិរបស់ខ្លួន ព្រមទាំងអ្នកដែលឃុបឃិតគ្នាលក់ដីព្រៃតំបន់បរិស្ថាន ដើម្បីចាត់ការបន្តតាមនីតិវិធីច្បាប់។
ឯកឧត្តមបានមានប្រសាសន៍ព្រមានយ៉ាងច្បាស់ថា នៅក្នុងតំបន់ការពារធនធានធម្មជាតិ គឺជាទ្រព្យសម្បត្តិសាធារណៈរបស់រដ្ឋមិនអាចនរណាម្នាក់ហ៊ានយកធ្វើជាកម្មវត្ថុ នៅក្នុងការទិញលក់បានឡើយ ជាពិសេស រាល់ការទិញលក់ដីនៅក្នុងតំបន់ការពារធនធានធម្មជាតិ ត្រូវបានចោលជាអសារបង់ ហើយ អ្នកដែលពាក់ព័ន្ធទាំងអស់ ដូចជាអ្នកទិញពីប្រជាពលរដ្ឋដែលលួចកាប់ទន្ទ្រាន អ្នកដែលលួចកាប់ឆ្កាដាំដំណាំ ដើម្បីធ្វើជាកម្មសិទ្ធិរបស់ខ្លួន ត្រូវទទួលខុសត្រូវចំពោះមុខច្បាប់ជាធរមាន។
ក្នុងឱកាសនោះ ឯកឧត្តមរដ្ឋលេខាធិការក្រសួងបរិស្ថាន ក៏មានប្រសាសន៍ ជំរុញដល់សិក្ខាកាមទាំងអស់ ត្រូវតែយកចិត្តទុកដាក់ចូលរួមជាមតិយោបល់ ធ្វើយ៉ាងណាឱ្យបានផុលផុសប្រកបដោយចំណេះដឹងជាពិសេស សម្រាប់យកទៅអនុវត្តតាមអង្គភាពនីមួយៗ ឱ្យបានកាន់តែល្អប្រសើរផងដែរ។
សូមបញ្ជាក់ផងដែរថា៖ នៅក្នុងទឹកដីខេត្តប៉ៃលិន មានតំបន់ការពារធនធានធម្មជាតិ១កន្លែង គឺតំបន់ប្រើប្រាសច្រើនយ៉ាងសំឡូតប៉ៃលិន។ តែគួរឱ្យខ្លោចចិត្តយ៉ាងខ្លាំង ខណ:ដែលបច្ចុប្បន្ននេះតំបន់ខាងលើនោះស្ទើរតែក្លាយទៅជាវាលរហោស្ថានជាអន្លើរៗទៅហើយ ដោយអស់ព្រៃឈើរលីង និងបានប្រែក្លាយជាដីកម្មសិទ្ធបុគ្គលឯកជន ដែលជាអ្នកមានលុយ មានអំណាចមួយចំនួន បែងចែកគ្នាយ៉ាងរលូន។
ជាក់ស្តែង កាលពីពេលថ្មីនេះ ខាងមន្ទីរបរិស្ថានខេត្តបានចេញលិខិតណែនាំមួយស្តីពីការទប់ស្កាត់ការរុករាន ការកេណ្ឌប្រជាពលរដ្ឋទៅកាប់ឆ្ការ និងការបំផ្លាញព្រៃឈើនៅតំបន់អភិរក្សបរិស្ថានខាងលើនោះដែរ។ ចំណែកប្រជាពលរដ្ឋជាច្រើន ដែលរស់នៅក្បែរតំបន់ខាងលើ មានការព្រួយបារម្ភយ៉ាងខ្លាំង ក្រែងអស់ព្រៃឈើខាងលើ ព្រោះតែមានដំណឹងខ្សឹបខ្សៀវគ្នា ពីការកំណត់ចំណាំព្រំដីខាងលើអស់ទៅហើយ ។
បើសិនជាបន្តកាប់ព្រៃឈើដែលនៅសេសសល់បន្តិចខាងលើ អាចនឹងនាំឱ្យកើតទៅជាអាកាសធាតុ គ្មានលំនឹង បង្កជាភ្លៀងលាយខ្យល់កន្ត្រាក់ ព្យុះ ផ្គររន្ទះ ធ្វើឱ្យកើតទៅជាគ្រោះរាំងស្ងួត ឬក៏ក្លាយទៅជាគ្រោះធម្មជាតិជំនន់លិចលង់ ខណ:ដែលព្រៃឈើកាន់តែអស់ទៅៗ ពីតំបន់អភិរក្ស៕
ព័ត៌មានលម្អិតនឹងមានផ្សាយជូនលើកាសែតកោះសន្តិភាព។
ចែករំលែកព័តមាននេះ