*Chelsea យល់ព្រមចំណាយ៤០លានផោនទិញកីឡាករហ្គារ៉េត បេលពីក្លឹប Spurs
កីឡាករហ្គារ៉េត បេល ខ្សែបម្រើក្លឹប Spurs អាយុ២១ឆ្នាំ បានបង្ហាញលក្ខណៈនៃការលេងដ៏លេចធ្លោ ធ្វើឱ្យក្លឹប Spurs បន្តកិច្ចសន្យារយៈពេល៤ឆ្នាំដោយទទួលប្រាក់ឈ្នួល៦០.០០០ផោនក្នុងមួយសប្តាហ៍ ។ ស្ថានភាពខាងលើធ្វើឱ្យអ្នកគ្រប់គ្រងក្លឹប Chelsea ត្រៀមទិញកីឡាករហ្គារ៉េត បេល ដ៏ជាក់លាក់នៅរដូវកាលក្រោយ ព្រោះត្រូវការកីឡាកររូបនេះសម្រាប់ជួយសម្រាលបន្ទុករបស់កីឡាករហ្វ្រែង ឡាំផាដ និងកីឡាករផ្លរ៉ង់ ម៉ាលូដា ដោយយល់ព្រមចំណាយទុន៤០លានផោន ។ ទោះជាយ៉ាងណាក៏ដោយ ឥរិយាបថក្លឹប Chelsea អាចនឹងមិនបានទទួលជោគជ័យទេ ព្រោះក្លឹប Spurs មិនពេញចិត្តក្នុងការលក់កីឡាករហ្គារ៉េត បេល ដែលជាខ្សែបម្រើដ៏ឆ្នើម នោះឡើយ ។
*ក្លឹប Man Utd នឹងចំណាយ២៤លានផោនទិញអ្នកចាំទីក្លឹប Schalke តែកីឡាកររូបនេះបដិសេធថាក្លឹប Man Utd មិនមែនជាជម្រើសរបស់ខ្លួន
កាសែត«ដេលីស្តារ» ផ្សាយថា ក្លឹបបិសាចក្រហម Man Utd យល់ព្រមចំណាយប្រាក់២៤លានផោនប្រជែងជាមួយក្លឹប Bayern Munich ទិញកីឡាករម៉ានូអេល ណយអ៊័រ អ្នកចាំទីក្លឹប Schalke យកទៅពង្រឹងក្លឹបនៅរដូវកាលក្រោយ ។ ក្លឹប Bayern Munich គ្រោងទទួលបានកីឡាករម៉ានូអេល ណយអ៊័រ អ្នកចាំទីក្លឹប Schalke ទៅលេងឱ្យក្លឹបនៅរដូវកាលក្រោយ បន្ទាប់ពីកីឡាកររូបនេះបង្ហើបឱ្យដឹងថា មិនបន្តកិច្ចសន្យាជាមួយក្លឹបចាស់របស់ខ្លួន ។ ស្របពេលជាមួយគ្នានេះ កីឡាករណយអ៊័រ និយាយថា « Man Utd មិនធ្លាប់ជាក្លឹបស្ថិតក្នុងជម្រើសរបស់ខ្ញុំ ហើយទោះជាមានភាពចម្លែកអ្វីក៏ដោយ ក៏គ្មានភាពសំខាន់មកលើរូបខ្ញុំដែរ នាពេលបច្ចុប្បន្ន» ។
*Chelsea ចង់បានខ្សែប្រយុទ្ធវ័យក្មេងរ៉ូមេលូ លូកាហ្គូ របស់ក្លឹប Anderlecht
ក្លឹបជាច្រើននៅអឺរ៉ុប ប្រជែងគ្នាដណ្តើមកីឡាករលូកាហ្គូ ខ្សែប្រយុទ្ធអាយុ១៧ឆ្នាំ ក្នុងនោះរួមមានក្លឹបបាល់ទាត់ Chelsea, Arsenal និង Barcelona ។ ជាក់ស្តែងក្នុងរយៈពេលចុងក្រោយនេះ ក្លឹប Chelsea នឹងទទួលបានកីឡាករលូកាហ្គូ ក្នុងតម្លៃខ្លួន១៩លានផោន ក្រោយពីក្លឹប Barcelona ត្រៀមទទួលបានកីឡាករចូសេបប៉េ រ៉ូសស៊ី ខ្សែប្រយុទ្ធជនជាតិអ៊ីតាលី របស់ក្លឹប Villarreal មកលេងឱ្យក្លឹបនៅរដូវកាលក្រោយ។ កីឡាករលូកាហ្គូ និយាយថា «ខ្ញុំមានសេចក្តីរីករាយបំផុតដែលបានទទួលការប្រៀបប្រដូចនឹងខ្សែប្រយុទ្ធឆ្នើមដូចជាកីឡាករដ្រក់បា របស់ Chelsea ប៉ុន្តែក្នុងចិត្តក៏ចង់បញ្ជាក់ថា ខ្ញុំមានទម្រង់លេងល្អនៅប្រទេសអង់គ្លេស ដូច្នោះ ទើបមានចំណាប់អារម្មណ៍ថា ចង់ផ្លាស់ទៅលេងនៅអេស្ប៉ាញឬនៅក្លឹបផ្សេងទៀតក្នុងអឺរ៉ុប រួមទាំងក្លឹប Chelsea ដែរ» ។
*កីឡាករដេលព្យែរ៉ូ យល់ព្រមបន្ថយប្រាក់ឈ្នួលបន្តកិច្ចសន្យាជាមួយក្លឹប Juventus
សារព័ត៌មានកីឡារបស់អ៊ីតាលី ផ្សាយឱ្យដឹងថា កីឡាករអាឡេសសានដ្រូ ដេលព្យែរ៉ូ ខ្សែប្រយុទ្ធវ័យចំណាស់របស់ក្លឹប Juventus បង្ហាញទឹកចិត្តភក្តីភាពជាមួយក្លឹបដោយសម្រេចចិត្តយល់ព្រមបន្ថយប្រាក់ឈ្នួលដើម្បីបន្តកិច្ចសន្យាថ្មីរយៈពេល១ឆ្នាំទៀត ។ កិច្ចសន្យាចាស់នាពេលបច្ចុប្បន្នរបស់ប្រធានក្រុមក្លឹប Juventus នឹងបញ្ចប់នៅថ្ងៃទី៣០ មិថុនាឆ្នាំនេះ ឯការចរចាស្តីពីកិច្ចសន្យាថ្មីនៅមិនទទួលយកជាការបាននិងបានអូសបន្លាយពេលយ៉ាងយូរ ។ ប៉ុន្តែក្នុងមួយរយៈពេលចុងក្រោយនេះ មានរបាយការណ៍របស់ក្លឹបបញ្ជាក់ថា កីឡាករដេលព្យែរ៉ូ បានសម្រេចកិច្ចព្រមព្រៀងក្នុងការបន្តកិច្ចសន្យារយៈពេល១ឆ្នាំដោយយល់ព្រមទទួលប្រាក់ឈ្នួលត្រឹម១លានយូរ៉ូ ខណៈពេលមុននេះធ្លាប់ទទួលបាន៤លានយូរ៉ូ ក្នុងមួយឆ្នាំ ។
*កីឡាករអាយ៉េន រ៉ប់បេន ប្រកាសលេងឱ្យក្លឹប Bayern Munich រហូតចូលនិវត្តន៍
អាយ៉េន រ៉ប់បេន ខ្សែបម្រើក្លឹប Bayern Munich ប្រកាសថា ត្រូវការលេងឱ្យក្លឹបរហូតចូលនិវត្តន៍ពីអាជីពបាល់ទាត់របស់ខ្លួន ។ខ្សែបម្រើអាយុ២៧ឆ្នាំរូបនេះមានពាក្យចចាមអារ៉ាមថា ត្រូវការផ្លាស់ចេញពី Bayern Munich ក្នុងករណីក្លឹបរបស់ខ្លួនមិនបានចូលរួមប្រកួតយូហ្វាឆេមពានលីក នៅរដូវកាលក្រោយ ។ ទោះជាយ៉ាងណាក៏ដោយ ក្នុងរយៈពេលចុងក្រោយនេះសាមីខ្លួនបានប្រកាសថា នឹងលេងឱ្យក្លឹបជាបន្តដោយនិយាយថា «បរិយាកាសនៅទីនេះល្អ និងការសម្រាកព្យាបាលរបួសក៏ជាគំរូដ៏ល្អ ដោយក្លឹបយកចិត្តទុកដាក់បានល្អ ធ្វើឱ្យខ្ញុំមានអារម្មណ៍ដ៏ជ្រាលជ្រៅនៅទីនេះ» ។ កីឡាករអាយ៉េន រ៉ប់បេន បាននិយាយតទៀតថា «ខ្ញុំប្រហែលជាលេងនៅទីនេះរហូតផុតអាជីពជាកីឡាករបាល់ទាត់ គឺមិនដូចពាក្យចចាមអារ៉ាមឡើយ » ៕
ចែករំលែកព័តមាននេះ