រាជធានីភ្នំពេញ ៖ ឧត្តមសេនីយ៍ត្រី អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេស បានឲ្យដឹងនៅថ្ងៃទី៣០ ខែមេសា ឆ្នាំ២០២៣ថា កងរាជអាវុធហត្ថ…
រាជធានីភ្នំពេញ ៖ ឧត្តមសេនីយ៍ត្រី អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេស បានឲ្យដឹងនៅថ្ងៃទី៣០ ខែមេសា ឆ្នាំ២០២៣ថា កងរាជអាវុធហត្ថ បានឃើញអត្ថបទរូបភាពព័ត៌មាន ពាក់ព័ន្ធនឹងយោធិន នៃកងរាជអាវុធហត្ថខេត្តកំពង់ធំ ដែលគ្រោះថ្នាក់ចរាចរណ៍ រវាងរថយន្ដនិងគោយន្ដ ហើយមានការទារលុយ និងស្ទួចយកគោយន្តនោះផងដែរ ។
ឧត្តមសេនីយ៍ត្រី អេង ហុី បានជម្រាបជូនសាធារណជន អ្នកសារព័ត៌មាន និងបុគ្គលដែលពាក់ព័ន្ធជ្រាបថា លោកនាយឧត្តមសេនីយ៍ សៅ សុខា មេបញ្ជាការកងរាជអាវុធហត្ថលើផ្ទៃប្រទេស បានបញ្ជាឱ្យលោកឧត្តមសេនីយ៍ ត្រី មាស យ៉ត មេបញ្ជាការកងរាជអាវុធហត្ថខេត្តកំពង់ធំ ធ្វើការត្រួតពិនិត្យករណីខាងលើ និងដោះស្រាយដោយគោរពគោលការណ៍ “ការពារ បម្រើ និងសង្គ្រោះប្រជាពលរដ្ឋ” ។
បើតាមគណនីហ្វេសប៊ុកឈ្មោះ ហៀង ធូ បានបង្ហោះសារ និងរូបភាព ហើយក្រោយមកក៏បានលុបចេញពីលើបណ្ដាញសង្គមវិញ ដែលមានខ្លឹមសារថា ៖ «នៅរំលងអាធ្រាត ថ្ងៃទី២៩ ខែមេសា ឆ្នាំ២០២៣ ខ្ញុំបានបត់គោយន្តចូលផ្ទះហើយបានប៉ះពាល់ឡានដែលកំពុងបើកបរពីក្រោយ។ ម្ចាស់ឡានឈ្មោះ ណុប ពុត្ថា ជាកងរាជអាវុធហត្តខេត្តកំពង់ធំ ហើយបានទារសំណងចំនួន៦,000,000៛ (ប្រាំមួយលានរៀល) តែខ្ញុំសុំត្រឹម ៤,០០០,០០០៛ (បួនលាន
រៀល) និងបានឲ្យរួចហើយ ដោយគិតថាចប់ត្រឹមហ្នឹង។ ប៉ុន្តែពេលរសៀលថ្ងៃខែឆ្នាំដដែល លោក ណុប ពុត្ថា បានយកឡានមកស្ទួចគោយន្តខ្ញុំដែលដាក់ក្នុងផ្ទះ ព្រមទាំងយកសំបកជនាឈើ ដែលខ្ញុំយកមកប្រើប្រាស់ជាគ្រួសារប៉ុណ្ណោះទៅផងដែរ។ ដូច្នេះសូម ជម្រាបជូន សម្តេចពុក ព្រមទាំងសមត្ថកិច្ចគ្រប់ជាន់ថ្នាក់ មេត្តាជួយរកយុត្តិធម៌ដល់ក្រុមគ្រួសារយើងខ្ញុំផង !។
ហ្វេសប៊ុកឈ្មោះ ហៀង ធូ ក៏បានបញ្ជាក់ដែរថា ហេតុការណ៍គ្រោះថ្នាក់ចរាចរណ៍នេះ កើតឡើងនៅភូមិបន្ទាយចាស់ ឃុំត្នោតជុំ ស្រុកបារាយណ៍ ខេត្តកំពង់ធំ ៕
ចែករំលែកព័តមាននេះ