ទីភ្នាក់ងារព័ត៌មានផ្លូវការស៊ីរី SANA រាយការណ៍កាលពីថ្ងៃទី៣០ មេសា ថា សរុបទាហាន និងប៉ូលិស៨៧នាក់ ព្រមទាំងជនស៊ីវិលជាង៧០នាក់ត្រូវស្លាប់ក្នុងបាតុកម្មនានាចាប់តាំងពី៦សប្តាហ៍មកហើយនៅស៊ីរី។
យោងតាមទីភ្នាក់ងារព័ត៌មាននេះថា ភ្នាក់ងារសន្តិសុខយ៉ាងតិច៣០០នាក់បានត្រូវរបួសក្នុងបាតុកម្មទាំងឡាយ។ ទាហាន និងប៉ូលិស៨នាក់ត្រូវស្លាប់ក្នុងការវាយប្រហារទាំងឡាយកាលពីថ្ងៃទី២៩ មេសា កន្លងមកនេះ ដោយបណ្តាក្រុមភេរវករនៅស៊ីរី។
ពួកអ្នកឃ្លាំមើលខាងសិទ្ធិមនុស្សស៊ីរីគូសបញ្ជាក់កាលពីថ្ងៃទី៣០ មេសា ថា មនុស្សយ៉ាងតិច៦២នាក់បានត្រូវស្លាប់ក្នុងបាតុកម្មប្រឆាំងរដ្ឋាភិបាលទាំងឡាយនាថ្ងៃទី២៩ មេសា ដែលគេហៅថា «ថ្ងៃសុក្រចងកំហឹង»។
កងកម្លាំងសន្តិសុខស៊ីរីកាលពីថ្ងៃទី៣០ មេសា បានធ្វើអន្តរាគមន៍នៅទីក្រុង DERAA ភាគខាងត្បូងប្រទេស ហើយបានវាយលុកលើព្រះវិហារ OMARI ជាចំណុចកណ្តាលនៃចលនាតវ៉ាប្រឆាំងរបបលោកប្រធានាធិបតីបាចារអាល់អាសាដ។ កងទាហាន និងរថក្រោះក្រោមបញ្ជាឱ្យប្អូនប្រុសប្រធានាធិបតី គឺលោក អាសាដ ម៉ាហ័រ ចាប់ផ្តើមលើកចូលក្រុង DERAA កាលពីថ្ងៃទី២៥ មេសា កន្លងមកនេះដោយកាត់ផ្តាច់អគ្គិសនី និងកាត់ផ្តាច់ការទាក់ទងគ្នា។
យោងតាមអង្គការការពារសិទ្ធិមនុស្សស៊ីរី SAOUASSIAH ថា កងកម្លាំងសន្តិសុខបានសម្លាប់ជនស៊ីវិលសរុបយ៉ាងតិច៥៦០នាក់តាំងពីចាប់ផ្តើមបាតុកម្មពីពាក់កណ្តាលខែមីនាមក ៕
ចែករំលែកព័តមាននេះ