ខេត្តព្រះសីហនុ ៖ ថ្នាក់ដឹកនាំខេត្តព្រះសីហនុបានឱ្យដឹងថា អាជ្ញាធរខេត្តគ្រោងនឹងពលរដ្ឋក៏ដូចជា ម្ចាស់អាជីវកម្មនានារួមបង់ថ្លៃលើសំណល់ទឹកស្អុយ ខណៈមួយឆ្នាំៗរដ្ឋចំណាយថវិកា៣ពាន់លានរៀល (ប្រមាណជិតជាង៧៣ម៉ឺនដុល្លារ) ក្នុងមួយឆ្នាំៗទៅលើដំណើរការ និងការថែនាំស្ថានីយប្រព្រឹត្តិកម្មទឹកកខ្វក់៣ទីតាំង។ លោកគួច…
ខេត្តព្រះសីហនុ ៖ ថ្នាក់ដឹកនាំខេត្តព្រះសីហនុបានឱ្យដឹងថា អាជ្ញាធរខេត្តគ្រោងនឹងពលរដ្ឋក៏ដូចជា ម្ចាស់អាជីវកម្មនានារួមបង់ថ្លៃលើសំណល់ទឹកស្អុយ ខណៈមួយឆ្នាំៗរដ្ឋចំណាយថវិកា៣ពាន់លានរៀល (ប្រមាណជិតជាង៧៣ម៉ឺនដុល្លារ) ក្នុងមួយឆ្នាំៗទៅលើដំណើរការ និងការថែនាំស្ថានីយប្រព្រឹត្តិកម្មទឹកកខ្វក់៣ទីតាំង។
លោកគួច ចំរើន អភិបាលខេត្តព្រះសីហនុ ថ្លែងប្រាប់អ្នកសារព័ត៌មានថា ការរៀបចំឱ្យមានស្ថានីយប្រព្រឹត្តិកម្មទឹកកខ្វក់មានចំនួន ៣ នៅខេត្តមាត់សមុទ្រមួយនេះ ដែលមកដល់ពេលនេះ គឺមានស្ថានីយចំនួន២ បានដាក់ឱ្យដំណើរការ ។ លោកអភិបាលខេត្តបានបន្តថា ការរៀបចំឱ្យមានស្ថានីយប្រព្រឹត្តិកម្មទឹកកខ្វក់មានចំនួន៣ គឺធ្វើឡើងក្នុងគោលដៅរក្សាឱ្យបាននូវបរិស្ថានឆ្នេរសមុទ្រស្អាត ព្រោះបើមិនមានស្ថានីយប្រព្រឹត្តិកម្មនេះទេទឹកសំអុយដែលពលរដ្ឋ និងម្ចាស់អាជីវកម្មប្រើប្រាស់នឹងហូរត្រង់ទៅឆ្នេរសមុទ្រ ដែលអាចធ្វើឱ្យឆ្នេរសមុទ្រមានពណ៌ខ្មៅ និងមានក្លិនមិនល្អប៉ះពាល់ដល់បរិស្ថាននៅសមុទ្រ។
សម្រាប់ប្លង់នគរូបនីយកម្មហេដ្ឋារចនាសម្ព័ន្ធផ្លូវក្នុងក្រុងព្រះសីហនុ ដែលមានភាពចាំបាច់ ដើម្បីធ្វើឱ្យក្រុងព្រះសីហនុក្លាយជាទីក្រុងដែលមានចរាចរណ៍ល្អប្រសើរប្រកបដោយនិរន្តរភាព ក៏មានការរៀបចំនូវបណ្ដាញលូទឹកភ្លៀង និងលូទឹកកខ្វក់ផ្សេងគ្នាដោយឡែកផងដែរ ។ ហេតុដូច្នេះហើយលោក គួច ចំរើន ក៏បានអំពាវនាវឱ្យពលរដ្ឋនៅក្នុងក្រុងព្រះសីហនុទាំងអស់ ដូចជា អ្នករៀបចំការកសាងលំនៅឋាន ក្រុមហ៊ុន ឬអាហារដ្ឋាន នៅពេលតភ្ជាប់បណ្តាញលូ ត្រូវសុំការអនុញ្ញាតពីរដ្ឋបាលខេត្ត ហើយសុំញែកគ្នាឱ្យដាច់រវាងបណ្តាញទឹកសំអុយ និងទឹកភ្លៀង។
ពាក់ព័ន្ធនឹងបញ្ហាសំណល់ទឹកស្អុយនេះវិញ លោកអភិបាលខេត្តព្រះសីហនុ បានឱ្យដងថា អាជ្ញាធរខេត្តកំពុងលើកទឹកចិត្តឲ្យប្រជាពលរដ្ឋចូលរួមបង់ថ្លៃទឹកសំណល់ទឹកស្អុយ បើទោះបីជាបច្ចុប្បន្ននៅមិនទាន់ មានពលរដ្ឋចូលរួមអនុវត្តនៅឡើយ ។ «យើងគិតថា យើងនឹងចាប់ផ្តើមជម្រុញការប្រមូលចំណូលពីអ្នកដែលបង្កើតទឹកសំអុយដែរ»។ នេះជាបញ្ជាក់របស់លោក គួច ចំរើន ។ លោកបានបន្ត តែកិច្ចការប្រមូលលុយថ្លៃទឹកស្អុយនេះជារឿងថ្មីដែលត្រូវការពេលវេលាគិតគូរ ស្ទាប់ស្ទង់ឱ្យបានស្រុះស្រួល ព្រោះបើធ្វើមិនស្រួលប្រជាពលរដ្ឋមិនសូវយល់នាំផលវិបាក ព្រោះរឿងបង់លុយមិនមែនជារឿងធម្មតាទេ។ តែអ្វីដែលជាចំណុចសំខាន់ លោកអភិបាលបន្តថា យើងចង់បាននោះ គឺចង់បានបរិស្ថានល្អ ប៉ុន្តែក៏ត្រូវការការគាំទ្ររបស់បងប្អូនរបស់យើងដែរ។ លោក គួច ចំរើន បន្តថា «បើបងប្អូនយើងគាត់យល់ដឹងអំពីសារសំខាន់នៃការចូលរួមចំណែកថែរក្សាបរិស្ថានបានរលូន ហើយការចូលរួមមានឆន្ទះបង់តម្លៃលើថ្លៃទឹកស្អុយក្នុងតម្លៃសមស្រប នឹងចំណេញទាំងអស់គ្នា»។
លោក ឡុង ឌីម៉ង់ អភិបាលរងខេត្តព្រះសីហនុ បានបញ្ជាក់ថាផងដែរថា ការចូលរួមចំណែកពីប្រជាពលរដ្ឋក្នុងការបង់ជូនក្នុងតម្លៃណាមួយលើតម្លៃទឹកសំអុយដែលបងប្អូនបានបង្កើត គឺពិតជាសំខាន់ណាស់។ លោកបានបញ្ជាក់ថា ការពិតទៅការចំណាយលុយដើម្បីធ្វើប្រព្រឹត្តកម្មទឹកស្អុយគឺចំណាយច្រើនជាងការផលិតទឹកស្អាតទៅទៀត ដូច្នេះបើបងប្អូននៅខេត្តព្រះសីហនុយល់ដឹងនូវចំណុចនេះ ហើយចូលរួមចំណែកបង់ក្នុងតម្លៃណាមួយ គឺជាចូលរួមចំណែកការពារបរិស្ថាននៅខេត្តមាត់សមុទ្រផងដែរ។
លោកបានផ្តល់ជាឧទាហរណ៍ថា បើសិនជាបងប្អូនយើងបង់តម្លៃនៃការប្រើប្រាស់ទឹកស្អាតក្នុងតម្លៃណាមួយ ដូច្នេះតម្លៃទឹកស្អុយដែលបងប្អូនបានបង្កើតឡើង ក៏អាចនឹងត្រូវបង់ក្នុងតម្លៃនោះដូចគ្នា។ តែយ៉ាងណាមិញ តម្លៃដែលពលរដ្ឋបង្កើតទឹកស្អុយនៅមិនទាន់កំណត់ជាផ្លូវការនៅឡើយនោះទេ។
សូមបញ្ជាក់ថា ស្ថានីយប្រព្រឹត្តកម្មនៅខេត្តព្រះសីហនុត្រូវបានសាងសង់ឡើង ក្នុងគោលបំណង ដើម្បីបន្សុទ្ធទឹក កខ្វក់ ទឹកស្អុយឱ្យក្លាយជាទឹកមានសុវត្ថិភាពស្របតាមស្តង់ដាបរិស្ថាន មុននឹងបញ្ចេញចោលទៅក្នុងសមុទ្រ ដោយប្រើបចេ្ចកវិទ្យាចុងក្រោយ MABR មកពីប្រទេសអ៊ីស្រាអែល ដែលត្រូវបានទទួលស្គាល់ថាជាបច្ចេកវិទ្យាដែលមានស្ថិរភាព ប្រសិទ្ធភាពខ្ពស់ សន្សំសំចៃថាមពល គ្មានសំឡេងរំខាន និងគ្មានក្លិន ប៉ះពាល់ដល់អ្នករស់នៅជុំវិញ ដោយក្នុងនោះ៖ ស្ថានីយប្រព្រឹត្តិកម្មទឹកកខ្វក់ទី១ មានសមត្ថភាពប្រព្រឹត្តិកម្មទឹកកខ្វក់ (ចម្រុះទឹកស្អុយ) ក្នុងបរិមាណ ៥.២00 ម៉ែត្រគូបក្នុងមួយថ្ងៃ ទទួលរងទឹកកខ្វក់ពីតំបន់ទី៣ ដែលមានផ្ទៃដី ៣៦៤ហិកតា ស្ថិតក្នុងសង្កាត់លេខ៣។ ស្ថានីយប្រព្រឹត្តិកម្មទឹកកខ្វក់ទី២ មានសមត្ថភាពប្រព្រឹត្តិកម្មទឹកកខ្វក់ក្នុងបរិមាណ៧.២00 ម៉ែត្រគូបក្នុងមួយថ្ងៃ ទទួលរងទឹកកខ្វក់ពីតំបន់ទី៤ ដែលមានផ្ទៃដី ៤៨៦ ហិកតា ស្ថិតក្នុងសង្កាត់លេខ៣។
ចំណែកឯស្ថានីយប្រព្រឹត្តិកម្មទឹកកខ្វក់ទី៣ កំពុងដំណើរការសាងសង់ មានសមត្ថភាពប្រព្រឹត្តិកម្មទឹកកខ្វក់ក្នុងបរិមាណ ២០.០០០ម៉ែត្រគូប ក្នុងមួយថ្ងៃ ទទួលរងទឹកកខ្វក់ពី តំបន់ទី៥ និងតំបន់ទី៦ ដែលមានផ្ទៃដី ២.៦៩០ហិកតា ស្ថិតក្នុងសង្កាត់លេខ៤ ដែលសាងសង់ដោយ ក្រុមហ៊ុន XWATER TECHNOLOGY CO.,LTD៕
ចែករំលែកព័តមាននេះ