ខេត្តកំពង់ធំ ៖ មនុស្ស៣នាក់ត្រូវស្លា.ប់នៅកន្លែងកើតហេតុ ក្នុងគ្រោះថ្នាក់ចរាចរណ៍ដ៏រន្ធត់មួយរវាងរថយន្តតូច និងរថយន្តធំដែលបើកបរបញ្ច្រាសទិសគ្នា ។ ហេតុការណ៍នេះកើតឡើងនៅវេលាម៉ោង៣និង៥២នាទីទៀបភ្លឺថ្ងៃទី ២៩ មេសា ឆ្នាំ២០១១ នៅតាមដងផ្លូវជាតិលេខ៦ ចន្លោះគីឡូម៉ែត្រលេខ១៤៩-១៥០ ត្រង់ចំណុចភូមិជាយស្បៃ ឃុំកកោះ ស្រុកសន្ទុក
ខេត្តកំពង់ធំ ៖ មនុស្ស៣នាក់ត្រូវស្លាប់នៅកន្លែងកើតហេតុ ក្នុងគ្រោះថ្នាក់ចរាចរណ៍ដ៏រន្ធត់មួយរវាងរថយន្តតូច និងរថយន្តធំដែលបើកបរបញ្ច្រាសទិសគ្នា ។ ហេតុការណ៍នេះកើតឡើងនៅវេលាម៉ោង៣និង៥២នាទីទៀបភ្លឺថ្ងៃទី ២៩ មេសា ឆ្នាំ២០១១ នៅតាមដងផ្លូវជាតិលេខ៦ ចន្លោះគីឡូម៉ែត្រលេខ១៤៩-១៥០ ត្រង់ចំណុចភូមិជាយស្បៃ ឃុំកកោះ ស្រុកសន្ទុក ។
អ្នករងគ្រោះទាំង៣នាក់ គឺមាន២នាក់ជាប្តីប្រពន្ធ និងម្នាក់ជាអ្នកបើកបរដែលជិះក្នុងរថយន្តកាមរីឆ្លាមនេះ ។ ប្រជាពលរដ្ឋក្នុងក្រុងស្ទឹងសែន ទាំងមូលបានស្គាល់អ្នករងគ្រោះប្តីប្រពន្ធនេះគ្រប់គ្នា ព្រោះជាអ្នកជំនួញធំមានទ្រព្យសម្បត្តិស្តុកស្តម្ភ និងជាម្ចាស់រោងម៉ាស៊ីនស្រូវដ៏ធំមួយនៅសង្កាត់អាចារ្យលាក់ ។ ការស្លាប់ដោយគ្រោះថ្នាក់ចរាចរណ៍នេះបានបង្កឱ្យមានការភ្ញាក់ផ្អើលផងដែរ ។
តាមរបាយការណ៍របស់សមត្ថកិច្ចប៉ូលិសស្រុកសន្ទុកបានឱ្យដឹងថា នៅមុនពេលកើតហេតុគេឃើញរថយន្ត១គ្រឿងម៉ាកកាមរីឆ្លាមពណ៌ត្រីឆ្លូញ ពាក់ស្លាកលេខភ្នំពេញ 2O-5086 បើកបរដោយឈ្មោះបេ ហួរ ភេទប្រុស អាយុ៣៨ឆ្នាំ ទីលំនៅភូមិកំពង់ធំ សង្កាត់កំពង់រទេះ ក្រុងស្ទឹងសែន ក្នុងទិសដៅពីជើងទៅត្បូង ដោយមានដឹកអ្នកដំណើរជាអ្នកជំនួញ២នាក់ប្តីប្រពន្ធផង ។ លុះទៅដល់ចំណុចខាងលើ ដែលជាការដ្ឋានជួសជុលផ្លូវជាតិលេខ៦ ស្រាប់តែរថយន្តនេះរេចង្កូតទៅខាងឆ្វេងដៃបុកគ្នាលាន់ឮដូចរន្ទះជាមួយរថយន្តធុនធំមួយគ្រឿង ដែលធ្វើដំណើរបញ្ច្រាសទិសគ្នាម៉ាក HINO ពណ៌សឆ្នូត ពាក់ស្លាកលេខព្រះសីហនុ 3A-0678 ដែលផ្ទុកដើមដំឡូងមីពេញ ។
ក្រោយពេលកើតហេតុ អ្នកបើកបររថយន្តម៉ាក HINO បានរត់គេចខ្លួនបាត់ ចំណែកអ្នកជិះក្នុងរថយន្តកាមរីឆ្លាមត្រូវស្លាប់ទាំងអស់គ្នាចំនួន៣នាក់ ក្នុងនោះមានអ្នកបើកបរឈ្មោះបេ ហួរ និងអ្នករួមដំណើរ២នាក់ប្តីប្រពន្ធមានឈ្មោះជាវ ឃួយ ហៅបាក់ឃួយ ភេទប្រុស អាយុ៦២ឆ្នាំ ជាថៅកែរោងម៉ាស៊ីនកិនស្រូវ និងជាអាជីវករលក់ម្សៅមី ស្ករស អង្ករ និងប្រមូលទិញស្រូវ មានទីលំនៅភូមិទី៥ សង្កាត់កំពង់ធំ ក្រុងស្ទឹងសែន និងប្រពន្ធឈ្មោះពួយ អេង អាយុ៥៦ឆ្នាំ ។ តាមគ្រួសារជនរងគ្រោះបានឱ្យដឹងថា អ្នកជំនួញស្តុកស្តម្ភទាំង២នាក់ប្តីប្រពន្ធខាងលើតែងម៉ៅរថយន្តជិះទៅភ្នំពេញ ជាញឹកញាប់ ដើម្បីការងារអាជីវកម្មរបស់ពួកគាត់ ទោះបីគាត់មានរថយន្តឡង់គ្រីស្ស័រមួយគ្រឿងផ្ទាល់ខ្លួនក្តី តែមិនហ៊ានបើកបរទេ ពេលធ្វើដំណើរផ្លូវឆ្ងាយ ។ ជនរងគ្រោះតែងក្រោកពីម៉ោង៣ទៀបភ្លឺទៅភ្នំពេញ លុះដល់ម៉ោង១២ថ្ងៃត្រង់ ថ្ងៃដដែលទើបឃើញវិលត្រឡប់មកកំពង់ធំវិញ ។
ដោយឡែកនៅថ្ងៃកើតហេតុ ពួកគាត់បានធ្វើដំណើរទៅភ្នំពេញដូចសព្វដងស្រាប់តែជួបគ្រោះថ្នាក់អកុសលស្លាប់យ៉ាងអាណោចអាធ័មបែបនេះ។ បច្ចុប្បន្ន សមត្ថកិច្ចបាននាំយកយានយន្តទាំង២គ្រឿងទៅរក្សាទុកនៅអធិការដ្ឋាននគរបាលស្រុកសន្ទុក ដើម្បីកសាងសំណុំរឿងចាត់ការតាមនីតិវិធីច្បាប់។
ពាក់ព័ន្ធនឹងឧប្បត្តិហេតុខាងលើនេះ សាក្សីជាច្រើននៅកន្លែងកើតហេតុបាននិយាយថា នៅវេលាម៉ោងខាងលើគេបានឮសំឡេងបុកគ្នារវាងរថយន្តនិងរថយន្តយ៉ាងខ្លាំង បន្ទាប់មកពួកគាត់នាំគ្នាមកមើល បានឃើញរថយន្តតូចបុកជាប់រួញមួយចំហៀងជាមួយរថយន្តធុនធំ។ ភ្លាមៗនោះប្រជាពលរដ្ឋក៏បាននាំគ្នាជួយទាញយកសពចេញពីរថយន្ត ហើយខ្លះរាយការណ៍ប្រាប់ប៉ូលិស។ ឯអ្នកបើករថយន្តធំបានរត់គេចខ្លួនបាត់ ប៉ុន្តែនគរបាលក៏បានទាក់ទងទៅម្ចាស់រថយន្តធំ តាមរយៈនាមប័ណ្ណដែលបន្សល់ទុកក្នុងរថយន្ត និងក៏បានបញ្ជាឲ្យចូលមកដោះស្រាយតាមផ្លូវច្បាប់។
នៅកន្លែងកើតហេតុនគរបាលចរាចរបានធ្វើការវាស់វែង និងពិនិត្យឃើញថា ចំណុចកើតហេតុជាកន្លែងការដ្ឋានជួសជុលផ្លូវ ដូច្នេះការសន្និដ្ឋានជំហានដំបូង គឺរថយន្តតូចអាចបើកលឿន ហើយបាត់ម្ចាស់ការក្នុងពេលរថយន្តចូលក្នុងផ្លូវឈូសឆាយ ហើយវាក់ជាមួយរថយន្តធំក៏ជាន់ហ្វាំងទាំងប្រថុចញ៉ុច ទើបធ្វើឲ្យរថយន្តរេចង្កូតទៅបុករថយន្តធំ៕
ចែករំលែកព័តមាននេះ