នាវាទេសចរណ៍អាមេរិក Westerdam នឹងមកកម្ពុជាជាថ្មី នៅចុងឆ្នាំ២០២៣ នេះ
- ព្រះសីហនុ
ខេត្តព្រះសីហនុ៖ នាវាទេសចរណ៍ វ៉េសស្ទើដាម ( Westerdam ) នឹងដឹកអ្នកទេសចរបរទេសចម្រុះជាតិសាសន៍ជាង ២០០០នាក់ មកចូលចតនៅកំពង់ផែស្វយ័តក្រុងព្រះសីហនុ នៅថ្ងៃទី២៨…
ខេត្តព្រះសីហនុ៖ នាវាទេសចរណ៍ វ៉េសស្ទើដាម ( Westerdam ) នឹងដឹកអ្នកទេសចរបរទេសចម្រុះជាតិសាសន៍ជាង ២០០០នាក់ មកចូលចតនៅកំពង់ផែស្វយ័តក្រុងព្រះសីហនុ នៅថ្ងៃទី២៨…
ខេត្តព្រះសីហនុ៖ នាវាទេសចរណ៍ វ៉េសស្ទើដាម ( Westerdam ) នឹងដឹកអ្នកទេសចរបរទេសចម្រុះជាតិសាសន៍ជាង ២០០០នាក់ មកចូលចតនៅកំពង់ផែស្វយ័តក្រុងព្រះសីហនុ នៅថ្ងៃទី២៨ ខែធ្នូ ឆ្នាំ២០២៣ នេះ។ នេះបើតាមលោក លូ គឹមឈុន អគ្គនាយកកំពង់ផែស្វយ័តក្រុងព្រះសីហនុ។
លោក លូ គឹមឈុន ថ្លែងដូច្នេះ ក្នុងពេលជួបក្រុមអ្នកកាសែត ដឹកនាំដោយក្លឹបអ្នកកាសែតកម្ពុជា នៅកំពង់ផែក្រុងព្រះសីហនុ នាព្រឹកថ្ងៃទី២៥ ខែមេសា ឆ្នាំ២០២៣។ ក្លឹបអ្នកកាសែតកម្ពុជា បានដឹកនាំអ្នកកាសែត ពីភ្នំពេញ ទៅកាន់ខេត្តព្រះសីហនុ ចាប់ពីថ្ងៃទី២៥ ដល់២៧ ខែមេសា ឆ្នាំ២០២៣។
លោកអគ្គនាយក លូ គឹមឈុន បានលើកឡើងថា កំពង់ផែក្រុងព្រះសីហនុ កំពុងសាងសង់ស្តូបនាវាវ៉េសស្ទើដាម នៅផែចាស់ កន្លែងដែលនាវាទេសចរណ៍នេះ បានចូលចត ដើម្បីរំលឹកដល់ថ្ងៃ ដែលសម្តេចតេជោ ហ៊ុន សែន ប្រមុខរាជរដ្ឋាភិបាល បានអនុញ្ញាតឱ្យចូលចត នៅកំពង់ផែស្វយ័តក្រុងព្រះសីហនុ បន្ទាប់ពីប្រទេស និងដែនដីមួយចំនួន បានបដិសេធមិនអនុញ្ញាតឱ្យនាវាទេសចរណ៍នេះ ចូលចត ក្នុងអំឡុងពេលចាប់ផ្តើមឆ្លងរាលដាលជំងឺកូវីដ១៩។
សូមបញ្ជាក់ថា នាវាទេសចរណ៍អាមេរិក Westerdam ដឹកមនុស្សសរុបជាង ២,២០០នាក់ ក្នុងនោះ អ្នកទេសចរ ១,៤៥៥នាក់ និងបុគ្គលិកកប៉ាល់ចំនួន ៨០២នាក់ បានចាកចេញពីទីក្រុងហុងកុង ប្រទេសចិន កាលពីថ្ងៃទី១ ខែកុម្ភៈ ឆ្នាំ២០២០។ ប៉ុន្តែក្នុងអំឡុងពេលផ្ទុះការឆ្លងរាលដាលកូវីដ១៩ នាវាទេសចរណ៍នោះ ត្រូវបានអាជ្ញាធរកោះតៃវ៉ាន់ ហ្វីលីពីន ជប៉ុន កូរ៉េខាងត្បូង និងកោះហ្គាំ(អាមេរិក) បដិសេធមិនឲ្យចូលចតឡើយ ដោយសារតែការព្រួយបារម្ភថា ក្នុងចំណោមមនុស្សរាប់ពាន់នាក់ នៅលើនាវានោះ អាចមានផ្ទុកវីរុសកូរ៉ូណាថ្មី។
ក៏ប៉ុន្តែសម្តេចតេជោ ហ៊ុន សែន បានអនុញ្ញាតឱ្យនាវាទេសចរណ៍អាមេរិក វ៉េសស្ទើដាម ចូលទឹកដីកម្ពុជា នៅថ្ងៃទី១៣ ខែកុម្ភៈ ឆ្នាំ២០២០។ បន្ទាប់ពីចូលចតនៅកំពង់ផែក្រុងព្រះសីហនុ នៅថ្ងៃ១៤ ខែកុម្ភៈ ឆ្នាំ២០២០ សម្តេចតេជោ ហ៊ុន សែន បានអញ្ជើញទៅជួប និងទទួលអ្នកទេសចរចម្រុះជាតិទាំងនោះ ចុះពីលើនាវា ហើយធ្វើដំណើរទេសចរណ៍នៅកម្ពុជា មុនពេលពួកគាត់បានចាកចេញពីកម្ពុជា តាមជើងយន្តហោះ។ កាលណោះ ពិភពលោក បានទទួលស្គាល់ពីកម្ពុជាក្រោមការដឹកនាំរបស់សម្តេចតេជោ ហ៊ុន សែន ដែលកម្ពុជា ជាប្រទេសតូច តែមានបេះដូងធំ៕
ចែករំលែកព័តមាននេះ