ប្រជាពលរដ្ឋរស់នៅក្នុងភូមិផ្សារព្រំជើង ភូមិផ្សារព្រំ និងភូមិអូរឈើក្រំ ស្ថិតក្នុងឃុំស្ទឹងកាច់ ស្រុកសាលាក្រៅ ខេត្តប៉ៃលិន កំពុងតែខ្វល់ខ្វាយ ដេកមិនលក់បក់មិនល្ហើយ ដោយម្នាក់ៗព្រួយបារម្ភយ៉ាងខ្លាំងអំពីបញ្ហា
ខេត្តប៉ៃលិន ៖ រហូតមកដល់ថ្ងៃទី២៤ ខែមេសា ឆ្នាំ២០២៣នេះ ប្រជាពលរដ្ឋរស់នៅក្នុងភូមិផ្សារព្រំជើង ភូមិផ្សារព្រំ និងភូមិអូរឈើក្រំ ស្ថិតក្នុងឃុំស្ទឹងកាច់ ស្រុកសាលាក្រៅ ខេត្តប៉ៃលិន កំពុងតែខ្វល់ខ្វាយ ដេកមិនលក់បក់មិនល្ហើយ ដោយម្នាក់ៗព្រួយបារម្ភយ៉ាងខ្លាំងអំពីបញ្ហាភូមិ-ឃុំមានសុវត្ថិ ភាព ខណៈពេលដែលក្រុមចោរ (ក្មេងប្រើប្រាស់គ្រឿងញៀ.ន) ដើររាតត្បាត អុកឡុក លួចសម្ភារៈតាមផ្ទះ ដោយផ្ទះខ្លះមានរបងព័ទ្ធជុំវិញ មានទាំងកាមេរ៉ាសុវត្ថិភាពត្រឹមត្រូវអស់ហើយ ក៏នៅតែពួកគេហ៊ានឡើងចូលទៅលួចគ្មានខ្លាចនរណាឡើយ។
បើតាមប្រភពព័ត៌មានពីប្រជាពលរដ្ឋម្នាក់មានឈ្មោះ ម៉ៃ ភេទប្រុស រស់នៅក្នុងភូមិផ្សារព្រំជើង បានឱ្យដឹងថា សព្វថ្ងៃនេះ ប្រជាពលរដ្ឋទាំងអស់រស់នៅក្នុងភូមិរបស់ខ្លួន ពិតជាមានការភ័យខ្លាច និងព្រួយបារម្ភអំពីសុវត្ថិភាព ខណៈពេលដែលក្រុមចោរដើរលួចទាំងយប់ទាំងថ្ងៃ ជាពិសេសឱ្យតែម្ចាស់ផ្ទះជាប់រវល់ចេញទៅធ្វើការងារ ដោយចាក់សោទុកចោល គឺត្រូវពួកគេនាំគ្នាគាស់ និងវា.យបំបែកមេសោ ដើម្បីចូលលួចសម្ភារៈផ្សេងៗ។
ប្រភពដដែលបន្តថា ក្រុមដែលដើរលួចខ្លាំង គឺជាក្រុមក្មេងប្រើប្រាស់គ្រឿងញៀ.ន ដោយពួកគេមិនខ្លាចញញើតអ្វីទាំងអស់ ហើយក្មេងញៀ.នថ្នាំខ្លះនៅពេលយប់ គឺនាំគ្នាធ្វើសកម្មភាពចូលលួចសម្ភារៈក្នុងផ្ទះប្រជាពលរដ្ឋ ដូចជា បើពួកគេដើរប៉ះស្នួរហាលខោអាវ ចានដែក ឆ្នាំងចាន និងដែក ដែលប្រជាពលរដ្ឋកំពុងសាងសង់ផ្ទះ ពួកក្រុមក្មេងទាំងនោះ លួចយកទៅទាំងអស់គ្មានទុកអ្វីបន្តិចនោះឡើយ ដោយសង្ស័យថា យកលក់បានថវិកាប្រើប្រាស់គ្រឿងញៀ.ន។
ប្រភពដដែលបន្តទៀតថា ពួកគាត់មួយចំនួន ក៏មានការបញ្ចេញមតិនៅតាមបណ្តាញសង្គម និយាយពីការខ្វល់ខ្វាយ ព្រួយបារម្ភអំពីសុវត្ថិភាព បញ្ហាចោរកម្ម ក្រុមក្មេងប្រើប្រាស់គ្រឿងញៀ.ន សូម្បីតែកាលពីពេលថ្មីៗកន្លងទៅនេះ អ្នកខ្លះចតម៉ូតូរ៉ឺម៉កនៅមុខផ្ទះក្បែរផ្សារ ក៏ត្រូវចោរលួចយកទៅបាត់ស្រមោល មិនទាន់រកឃើញតម្រុយនៅឡើយទេ។ ដូច្នេះហើយ ពួកគាត់ ពិតជារស់នៅជួបនឹងបញ្ហាអសន្តិសុខផ្នែកភូមិ-ឃុំសុវត្ថិភាពយ៉ាងខ្លាំង។
ប្រភពដដែលបន្តទៀតថា ពួកគាត់សំណូមពរឱ្យសមត្ថកិច្ចនគរបាលប៉ុស្តិ៍ស្ទឹងកាច់ និងខាងអធិការនគរបាលស្រុកសាលាក្រៅ ព្រមទាំងនគរបាលស្នងការខេត្តប៉ៃលិន ជួយមើលសកម្មភាពរបស់ក្រុមចោរដែលជាក្មេងប្រើប្រាស់គ្រឿងញៀ.នទាំងអស់នោះផង ពោលគឺសូមចាប់ពួកគេយកទៅអប់រំ ឈប់ឱ្យប្រព្រឹត្តអំពើបែបនេះទៀត។ លើសពីនេះ បច្ចុប្បន្នពួកគាត់ដេកមិនលក់ បក់មិនល្ហើយនោះទេ ព្រោះតែក្រុមចោរកំពុងធ្វើសកម្មភាពជារៀងរាល់យប់ថ្ងៃ ពោលគឺលួចគ្រប់សព្វបែបយ៉ាងទាំងអស់។
បើតាមលោកវរសេនីយ៍ត្រី អ៊ឹម ឬទ្ធី អធិការស្តីទី នៃអធិការដ្ឋាននគរបាលស្រុកសាលាក្រៅ បានឱ្យដឹងថា បញ្ហាខាងលើនេះ ខាងលោកអត់ទទួលបានរបាយការណ៍នោះទេ។ លោកបន្តទៀតថា បញ្ហាក្រុមក្មេងអុកឡុក បញ្ហាគ្រឿងញៀ.ន ឬចោរលួចឆក់ប្លន់ អ្វីក៏គ្មាននោះទេ។ តែករណីបាត់បង់ម៉ូតូរ៉ឺម៉កមានមែន ដោយសារម្ចាស់ផ្ទះចតទុកនៅខាងក្រៅ ហើយសមត្ថកិច្ចកំពុងតាមស៊ើបអង្កេត៕
ចែករំលែកព័តមាននេះ