ខេត្តបាត់ដំបង៖ ក្រោយពីលោកអភិបាលខេត្តស្រែកប្រកាសអាសន្នថា «នៅខេត្ត យើងពេលនេះគ្មានសុវត្ថិភាពសោះហើយ..! អធិការ និងប៉េអឹមក្រុង មិនដឹងធ្វើអីទេ..? ដល់ថ្នាក់នៅវេទិកាបុណ្យទូក គេកាត់ខ្សែភ្លើង កាត់អីអស់…
ខេត្តបាត់ដំបង៖ ក្រោយពីលោកអភិបាលខេត្តស្រែកប្រកាសអាសន្នថា «នៅខេត្ត យើងពេលនេះគ្មានសុវត្ថិភាពសោះហើយ..! អធិការ និងប៉េអឹមក្រុង មិនដឹងធ្វើអីទេ..? ដល់ថ្នាក់នៅវេទិកាបុណ្យទូក គេកាត់ខ្សែភ្លើង កាត់អីអស់ គ្មានពីណាដឹង» ស្រាប់តែនៅថ្ងៃបន្ទាប់ ទាំងលោកមេបញ្ជាការកងរាជអាវុធហត្ថខេត្ត ទាំងលោកស្នងការខេត្ត បានចេញបទបញ្ជាភ្លាមៗជាបន្តបន្ទាប់ តាមរយៈសារជាសម្លេងផ្ញើតាមគ្រុបតេឡេក្រាមនៅក្នុងអង្គភាពរៀងៗខ្លួន បញ្ជាឲ្យកងកម្លាំងក្រោមឱវាទ នៅតាមមូលដ្ឋានត្រូវចាប់ផ្ដើមពង្រឹងសន្តិសុខឡើងវិញ មានវិធានការទប់ស្កាត់ និងបង្ក្រាបបទល្មើសនានាដែលបានកើតឡើង ។
បទបញ្ជារបស់លោក ហែម វុទ្ធី មេបញ្ជាការកងរាជអាវុធហត្ថខេត្ត និងបទបញ្ជារបស់លោក សាត គឹមសាន ស្នងការខេត្ត ដែលធ្វើឡើងព្រមៗគ្នា និយាយអំពី «ការចាប់ផ្ដើមពង្រឹងសន្តិសុខឡើងវិញនេះ» ត្រូវគេមើលឃើញយ៉ាងច្បាស់ថា គឺធ្វើឡើងក្រោយពីលោក សុខ លូ អភិបាលខេត្ត និងជាប្រធានគណៈបញ្ជាការកងឯកភាពខេត្តផង បានបញ្ចេញប្រតិកម្មខ្លាំងៗ ចំពោះកម្លាំងសមត្ថកិច្ច និងលោកចៅហ្វាយក្រុង ក្នុងករណី «ចោរលួចកាត់ខ្សែភ្លើងអស់ខ្ទេចខ្ទីនៅកន្លែងវេទិកាបុណ្យអុំទូក ហើយគ្មាននរណាដឹង»។
ពោលការប្រកាសអាសន្នរបស់លោកអភិបាខេត្តអំពី «គ្មានសុវត្ថិភាពនៅក្នុងខេត្ត» គឺហាក់ដូចជាការស្រែកដាស់មេៗសមត្ថកិច្ចឲ្យភ្ញាក់ពីដំណេកងើបធ្វើការងារឡើងវិញ។ នៅក្នុងករណីចោរលួចកាត់ខ្សែភ្លើងនៅវេទិកាបុណ្យអុំទូកនេះ មេបញ្ជាការកងរាជអាវុធហត្ថខេត្ត លោក ហែម វុទ្ធី បានដាក់កំហិតដាច់ខាតឲ្យកម្លាំងកងរាជអាវុធហត្ថក្រុង ធ្វើការស្រាវតាមចាប់ជនសង្ស័យឲ្យបាន។ តាមរយៈសារជាសម្លេង លោក មេបញ្ជាការរូបនេះ បានចេញបញ្ជាយ៉ាងដូច្នេះថា «មេបញ្ជាការកងរាជអាវុធហត្ថក្រុង ត្រូវត្រូតពិនិត្យមើលការងារហ្នឹង..! ហើយស្រាវជ្រាវរកចោរលួចឲ្យឃើញ ហើយពង្រឹងការងារសន្តិសុខ និងការងារទូទៅនៅក្នុងទីរួមខេត្ត»។ បានន័យថា កន្លងទៅនេះ(ហាក់ជិះសេះលេង) មិនសូវអើពើនឹងបទល្មើសសោះឡើយ។
ដោយឡែក បើនិយាយពីសារសម្លេងរបស់លោក សាត គឹមសាន ស្នងការខេត្តវិញ លោក បានចាត់ទុកចោរលួច គោ ឬ លួចកាត់ខ្សែភ្លើង គ្រាន់តែជា «ចោរអំបុក ចោរអំបែង» ប៉ុណ្ណោះ។ ប៉ុន្តែលោកប្រកាសឲ្យលោកអធិការ និងលោកប្រធានការិយាល័យជំនាញពាក់ព័ន្ធ ត្រូវចាត់វិធានការទប់ស្កាត់ និងស្រាវជ្រាវបង្ក្រាប។ លោកស្នងការខេត្តបានមានប្រសាសន៍ទៅកាន់មន្ត្រីក្រោមឱវាទយ៉ាងដូច្នេះថា «ក្រោយពីមួយរយៈចូលឆ្នាំហើយនេះ ឃើញថា សកម្មភាពក្រុមចោរ អំបុកចោរអំបែង ចោរលួចខ្សែភ្លើង លួចអីនេះ…យប់មិញឃើញមានចូលផ្ទះគេ ផ្ទះអី… និង លួចគោលួចអីនេះ ចឹងសូមឲ្យបង្កើនកិច្ចការពារ។
ជាពិសេស ត្រូវសហការជាប្រជាការពារ។ មិនតែប៉ុណ្ណោះ នៅក្នុងសារជាសម្លេងនេះ លោក សាត គឺមសាន បានបញ្ជាឲ្យតាមអធិការ ត្រូវបង្កើតប៉ុស្ដិ៍ប្រជាការពារតាមបណ្ដាភូមិ ត្រូវមានរោងប៉ុស្ដិ៍ប្រជាការពារ។ ចំពោះនៅក្នុងក្រុងបាត់ដំបង លោកស្នងការបានបញ្ជាឲ្យលោកអធិការ ត្រូវដំឡើងទីតាំងប៉ុស្ដិ៍ឡើងវិញ ឲ្យមានរោងដេកប្រចាំការ ។
ពាក់ព័ន្ធនឹងរឿងចោរកាត់ខ្សែភ្លើងនៅកន្លែងវេទិកាអុំទូក ត្រូវដាក់កម្លាំងសហការជាមួយប៉េអឹម ដេកប្រចាំការនៅទីនោះ។ ជាមួយនឹងបទបញ្ជាឲ្យកម្លាំងតាមបណ្ដាអធិការស្រុក និង ក្រុង ត្រូវមានវិធានការបង្រឹងសន្តិសុខឡើងវិញនៅក្នុងមូលដ្ខានរបស់ខ្លួន លោក ស្នងការ ក៏បានស្ដីបន្ទោសផងដែរ ចំពោះអស់លោក លោកស្រី ស្នងការរងទទូលផែន និងទទួលការងារតាមបណ្ដាស្រុក ដែលស្ពឹកស្រពន់មិនកំរើករឿងការងារ។
នៅក្នុងសារសម្លេងដែលលោកបានផ្ញើចូលក្នងគ្រុបថ្នាក់ដឹកនាំស្នងការខេត្ត លោកសាត គឹមសាន បានប្រកាសដូច្នេះថា «អស់លោក លោកស្រី ស្នងការរងទាំងអស់ ត្រូវពិនិត្យសកម្មភាពការងារឡើងវិញ នៅតាមបណ្ដាស្រុក ដូចជាមិនឃើញអស់លោក លោកស្រី ណាកំរើកបន្តិចសោះ… បញ្ហាចុះទៅតាមស្រុក ពាក់ព័ន្ធបទល្មើសដែលកើតឡើងនេះ» ។
ក្នុងន័យនេះ លោកស្នងការ បានបញ្ជាឲ្យអស់លោកស្នងការរង ដែលមានចំនួនជាង៤០រូប ត្រូវចុះពិនិត្យឡើងវិញចំពោះស្រុកណា ដែលមានបទល្មើស គឺត្រូវមានមុខស្នងការរងដែលទទូលខុសត្រូវលើស្រុកនោះ ត្រូវចុះធ្វើការវិភាគ និងស្រាវជ្រាវឈានដល់ការបង្ក្រាបរាល់បទល្មើសទាំងឡាយដែលបានកើតឡើង។
សូមរំលឹកថា កាលពីប៉ុន្មានថ្ងៃមុននេះ មានជនមិនស្គាល់មុខ បានលួចកាត់ខ្សែភ្លើងជាបន្តបន្ទាប់ នៅកន្លែងវេទិកាបុណ្យអុំទូក នៅក្នុងក្រុងបាត់ដំបង បាត់បង់អស់រាប់រយម៉ែត្រ តែពុំមានសមត្ថកិច្ចឬអាជ្ញាធរក្រុង បានដឹង និងរាយការណ៍ជូនលោកអភិបាលខេត្តទេ ។ ប៉ុន្តែក្រោយមក នៅថ្ងៃទី១៨ មេសា ស្រាប់តែមានអ្នកផ្សេង បានផ្ដល់ព័ត៌មានរឿង «ចោរលួចខ្សែភ្លើង» នេះបន្ថែមទៀត ជូនលោកអភិបាលខេត្ត ទើបលោកអភិបាលខេត្ត មានប្រតិកម្មខ្លាំងៗ ទៅកាន់សមត្ថកិច្ច និងលោកចៅហ្វាយក្រុងបាត់ដំបង ដែលទើបចូលកាន់ដំណែងថ្មីថ្មោងនេះ ។
ដោយសារតែចោរលួចកាត់ខ្សែភ្លើងនៅកន្លែងវេទិកាអុំទូកម្ដងហើយម្ដងទៀត ពុំមានអ្នកដឹង គ្មានអ្នករាយការណ៍ទើបលោក សុខ លូ អភិបាលខេត្ត ប្រកាសអាសន្នប្រាប់លោកមេបញ្ជាការប៉េអឹមខេត្ត និងលោកស្នងការខេត្ត រួមទាំងលោកចៅហ្វាយក្រុងផងថា «នៅក្នុងខេត្ត យើងពេលនេះ គ្មានសុវត្ថិភាពសោះហើយនៀក..! អធិការ និង ប៉េអិមក្រុង មិនដឹងធ្វើអីទេ..? ដល់ថ្នាក់នៅវេទិកាបុណ្យអុំទូក គេកាត់ខ្សែភ្លើង កាត់អីអស់គ្មានពីណាដឹង..! ខ្ញុំ ប្រាប់អភិបាលក្រុង តាំងពីម្សិលមិញល្ងាច រហូតមកដល់ម៉ោងនេះហើយ មិនទាន់ឆ្លើយតបខ្ញុំផង។ តិចទៀតប្រហែលទៅកាត់តាមអង្គភាពរដ្ឋទាំងអស់ហើយ តាមមើល..»។
កន្លងទៅ អំពើចោរកម្មលួចកាត់ខ្សែភ្លើងនេះ ត្រូវបានសមត្ថកិច្ចចាត់ទុកថា «ជារឿងតូចតាច កំប៉ិកកំប៉ុក» នៅពេលប្រជាពលរដ្ឋរាយការណ៍ជូនម្ដងៗ ។ មិនតែប៉ុណ្ណោះ សមត្ថកិច្ចដែលអះអាងថា ពួកគេជាក្រុមបង្ក្រាបបទល្មើសទាំងនោះ ថែមទាំងស្ដីបន្ទោសតបទៅអ្នករាយការណ៏វិញផងថា «ជាការរំខាន រឿងកំប៉ិកកំប៉ុកសោះ រាយការណ៍ដែរ»។ រហូតប្រជាពលរដ្ឋឈប់ផ្ដល់ព័ត៌មាននេះដល់សមត្ថកិច្ច បើទោះជាដើរបុកចោរក៏មិនរវីរវល់ដែរ។
ប៉ុន្តែយ៉ាងណា ក្រោយពីលោកអភិបាលខេត្តប្រតិកម្មខ្លាំងៗ អំពីករណីចោរលួចកាត់ខ្សែភ្លើងនៅវេទិការអុំទូកខាងលើនេះ នៅយប់ថ្ងៃទី១៨ មេសា កម្លាំងចម្រុះរបស់គណៈបញ្ជាការកងឯកភាពក្រុង បានធ្វើការស្រាវជ្រាវតាមឃាត់ខ្លួនមុខសញ្ញាលួចកាត់ខ្សែភ្លើងពេលយប់បានចំនួន០៣នាក់ នាំយកទៅសួរនាំនៅអធិការក្រុងបាត់ដំបង ។ ប៉ុន្តែបើតាមសមត្ថកិច្ចថា ពិតមែនតែជនទាំង០៣នាក់នោះ ត្រូវបានកំណត់ជាមុខសញ្ញាលួចកាត់ខ្សែភ្លើងមែន តែក្រុមនេះមិនបានសារភាពថា ពួកខ្លួនមានជាប់ពាក់ព័ន្ធនឹងករណីកាត់ខ្សែភ្លើងនៅម្ដុំវេទិកាអុំទូកនោះទេ ។
បើដូច្នេះ បានន័យថា ចោរដែលលួចកាត់ខ្សែភ្លើងនៅកន្លែងវេទិកាបុណ្យអុំទូក កាលពីប៉ុន្មានថ្ងៃមុននេះ គេមិនទាន់បង្ក្រាបបាននៅឡើយទេ ។
ចែករំលែកព័តមាននេះ