រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានប្រកាសចង់ឃើញប្រទេសលើពិភពលោកបង្វែរការយកថវិកាទៅផលិតអាវុធបំផ្លាញគ្នាបែរមកផលិតជាថ្នាំពេទ្យ ដើម្បីចែកចាយជូនឬលក់ដល់ប្រជាពលរដ្ឋនៅបណ្តាប្រទេសនានាក្នុងតម្លៃសមរម្យសម្រាប់ព្យាបាលជាការល្អជាង ។
សម្តេចតេជោ ហ៊ុន សែន បានថ្លែងក្នុងពិធីសម្ពោធដាក់ឲ្យប្រើប្រាស់ជាផ្លូវការអគារសម្ភព ស្ថិតនៅក្នុងបរិវេណនៃមន្ទីរពេទ្យកុមារជាតិរាជធានីភ្នំពេញ នាព្រឹកថ្ងៃទី២០ មេសា ឆ្នាំ២០២៣យ៉ាងដូច្នេះថា នៅលើពិភពលោក បើសិនយកលុយនៃការប្រើប្រាស់លើអាវុធផ្ទេរមកផលិតថ្នាំពេទ្យលក់ចែកចាយការពារសុខភាពប្រជាពលរដ្ឋជាការល្អ តែខ្ញុំមិនដឹងនៅលើពិភពលោកតម្លៃឱសថនិងធ្លាប់ចុះ ប៉ុន្តែអាលូវប្រទេសមួយៗគិតតែនាំគ្នារឿងបង្កើនកំលាំងទាហានបង្កើនសភាវុធ សម្រាប់កម្ទេចគ្នាទៅវិញទៅមក ដោយចាយលុយអស់ច្រើនណាស់ ។
សម្តេចតេជោបន្តថា បើសិនបណ្តាប្រទេសលើពិភពលោក ដែលនាំគ្នាផលិតអាវុធសម្រាប់កម្ទេចគ្នានោះផ្ទេរតែ៥០%មក ដើម្បីផលិតថ្នាំពេទ្យឧបករណ៍ពេទ្យលក់លើពិភពលោកឲ្យបានថោកត្រឹមជាង៥០% ប្រជាជននឹងទទួលបានផលប្រយោជន៍ធំណាស់ ប៉ុន្តែប្រទេសនានាគេមិនបានគិតបែបនេះទេ ។
សម្តេចបញ្ជាក់ថា៖ «ផ្ទុយទៅវិញ គេគិតតែរកវិធីណា ផលិតអាវុធនេះ ដើម្បីវៃគ្នាផ្អើល អីញ្ចឹងហើយអ្នកដែលចំណេញពិតប្រាកដ គឺអ្នកផលិតអាវុធហើយអាលូវអាវុធបានដើរបំផ្លាញជីវិតមនុស្ស ។ កម្ពុជាបានដោះស្រាយបញ្ហាដោយយើងបានបញ្ចប់សង្គ្រាមហើយ ប៉ុន្តែប្រើប្រាស់អាវុធបានធ្វើការខុសឆ្គង» ។
ជាមួយគ្នានោះដែរ សម្តេចតេជោក៏បានរំលឹកពីករណីមន្ត្រីអាកាសនាយករដ្ឋអាកាសចរណ៍ស៊ីវិលម្នាក់ បានប្រើប្រាស់អាវុធខុសដោយយកទៅគំរាមគេសម្រេចដកចេញពីតួនាទីផងដែរ ។
ចែករំលែកព័តមាននេះ