ខេត្តបាត់ដំបង ៖ សមត្ថកិច្ចបានធ្វើការស្រាវជ្រាវតាមឃាត់ខ្លួនក្រុមចោរលួចកាត់ខ្សែភ្លើងពេលយប់បានចំនួន០៣នាក់ កាលពីវេលាម៉ោង៩យប់ថ្ងៃទី១៨ មេសា នៅម្ដុំខាងក្រោយមន្ទីរពេទ្យបង្អែកខេត្ត ស្ថិតក្នុងភូមិព្រែកមហាទេព សង្កាត់ស្វាយប៉ោ ក្រុងបាត់ដំបង ក្រោយពីលោកអភិបាលខេត្តស្ដីបន្ទោសយ៉ាងចាស់ដៃ…
ខេត្តបាត់ដំបង ៖ សមត្ថកិច្ចបានធ្វើការស្រាវជ្រាវតាមឃាត់ខ្លួនក្រុមចោរលួចកាត់ខ្សែភ្លើងពេលយប់បានចំនួន០៣នាក់ កាលពីវេលាម៉ោង៩យប់ថ្ងៃទី១៨ មេសា នៅម្ដុំខាងក្រោយមន្ទីរពេទ្យបង្អែកខេត្ត ស្ថិតក្នុងភូមិព្រែកមហាទេព សង្កាត់ស្វាយប៉ោ ក្រុងបាត់ដំបង ក្រោយពីលោកអភិបាលខេត្តស្ដីបន្ទោសយ៉ាងចាស់ដៃ ពីភាពអសកម្មរបស់សមត្ថកិច្ច ដែលមិនអើពើនឹងរឿង
«ចោរលួចកាត់ខ្សែភ្លើងនៅវេទិកាបុណ្យអុំទូក» ។
ជនសង្ស័យទាំង០៣នាក់នោះ ១-ឈ្មោះ បាន គឹមហុង ហៅវិត អាយុ២៣ឆ្នាំ នៅភូមិសូភី ឃុំអន្លង់រុន ស្រុកថ្មគោល ២-ឈ្មោះ ប៉ាង វ៉ាន់ថន អាយុ២៤ឆ្នាំ នៅភូមិសួរអី ឃុំពាមឯក ស្រុកឯកភ្នំ និង៣-ឈ្មោះ គាម ភត្រា អាយុ៣១ឆ្នាំ នៅភូមិចំការសំរោង២ សង្កាត់ចំការសំរោង ក្រុងបាត់ដំបង ។ ក្រុមនេះ ត្រូវបានកម្លាំងចម្រុះរបស់គណៈបញ្ជាការកងឯកភាពក្រុងបាត់ដំបង ធ្វើការស្រាវជ្រាវបង្ក្រាបបាន ក្រោយពីមានករណីលួចកាត់ខ្សែភ្លើងជាបន្តបន្ទាប់ នៅវេទិកាបុណ្យអុំទូក ។
បើតាមប្រភពព័ត៌មាន មានជនមិនស្គាល់មុខ បានធ្វើសកម្មភាពលួចកាត់ខ្សែភ្លើងនៅម្ដុំវេទិកាបុណ្យអុំទូក នៅចំកណ្ដាលបេះដូង ក្រុងបាត់ដំបង កាលពីប៉ុន្មានថ្ងៃមុននេះ។ ប្រភពដដែលបានបញ្ជាក់ថា បើតាមពិនិត្យ ពួកចោរបានលួចកាត់យកអស់រាប់រយម៉ែត្រ និងជាច្រើនខ្សែចាប់តាំងពីម្ដុំខាងកើតផ្សារណាត់ រ៉បមាត់ស្ទឹងសង្កែ រហូតដល់វេទិកាបុណ្យអុំទូក ។
អំពើចោរកម្មនេះ បានស្ងប់ស្ងាត់បាត់ឈឹង ហាក់គ្មានសមត្ថកិច្ចណាចុះពិនិត្យ ឬធ្វើការស្រាវជ្រាវឡើយ។ លុះដល់ថ្ងៃទី១៨ មេសា ទើបមានគេរាយការណ៍ប្រាប់លោកអភិបាលខេត្តជ្រាបអំពីរឿងចោរលួចកាត់ខ្សែភ្លើងនៅវេទិកាអុំទូកនេះ តែមិនមែនសមត្ថកិច្ច ឬ លោកចៅហ្វាយក្រុងជាអ្នករាយការណ៏ទេ។ ទំនងដោយសារតែគ្មានសមត្ថកិច្ចណាអើពើនឹងរឿងចោរលួចកាត់ខ្សែភ្លើងបែបនេះហើយ ទើបលោកអភិបាលខេត្ត ក្ដៅមុខក៏បានស្ដីបន្ទោសយ៉ាងចាស់ដៃទៅលើកម្លាំងសមត្ថកិច្ចគ្រប់ស្ថាប័ន រួមទាំងលោកអភិបាលក្រុងផង ហើយបានចេញបញ្ជាភ្លាមៗ ឲ្យសមត្ថកិច្ចធ្វើការស្រាវជ្រាវតាមចាប់ខ្លួនចោរលួចខ្សែភ្លើងនេះ។
នៅក្នុងសារជាសម្លេង ដែលលោកអភិបាលខេត្តបាននិយាយអំពីរឿង«ចោរលួចកាត់ខ្សែភ្លើងនៅវេទិកាអុំទូក ហើយបានផ្ញើក្នុងគ្រុបតេឡេក្រាម ទៅកាន់មេៗកងកម្លាំងសមត្ថកិច្ចទាំងអស់ រួមទាំងលោក លាង វាសនា ចៅហ្វាយក្រុងផង ។ លោក សុខ លូ បានមានប្រសាសន៍ដូច្នេះថា « បងសាន (មេស្នងការ) និងបងធី (មេប៉េអឹមខេត្ត) ជួយមើលផងណា..! នៅខេត្តយើងគ្មានសុវត្ថិភាពអីសោះហើយនៀក…»។
លោកអភិបាលខេត្តបានស្ដីបន្ទោស និងចង្អុលចំៗថា «អធិការ និង ប៉េអឹមក្រុង ឬកម្លាំងយើង មិនដឹងធ្វើអីទេ..! ដល់ថ្នាក់នៅវេទិកាបុណ្យអុំទូកគេកាត់ខ្សែភ្លើងកាត់អី គ្មានពីណាដឹង» ។ ដោយឡែក អភិបាលក្រុងបាត់ដំបង លោក លាង វាសនា ឯណោះវិញក៏ត្រូវប៉ុយលោកអភិបាលខេត្តដែររឿងចោរលួចកាត់ខ្សែភ្លើងនៅវេទិកាអុំទូកនេះ ។ ព្រោះស្ពឹកស្រពន់ មិនអើពើនឹងបទល្មើសដែលបានកើតឡើង មិនរួសរាន់ក្នុងការរាយការណ៏ជូនថ្នាក់លើ ។ មិនតែប៉ុណ្ណោះ លោកអភិបាលខេត្តផ្ញើសារជាសម្លេងសួរនាំហើយ នៅមិនព្រមឆ្លើយតបវិញទៀត(ឡូយណាស់) ។
នៅក្នុងសារសម្លេងនោះ លោក សុខ លូ បានស្ដីបន្ទោសលោកចៅហ្វាយក្រុង រឿងចោរកាត់ខ្សែភ្លើងនេះយ៉ាងដូច្នេះថា « ខ្ញុំប្រាប់អភិបាលក្រុង តាំងពីម្សិលល្ងាច មកដល់ម៉ោងនេះមិនទាន់ឆ្លើយនឹងខ្ញុំផង ឥឡូវគេរាយការណ៏មកឲ្យទៅមើលខ្សែភ្លើងគេកាត់ទៀតហើយ… តិចទៀតប្រហែលគេទៅកាត់តាមអង្គភាពរដ្ឋទាំងអស់ហើយមើលទៅ..»។
ក្រោយពីលោកអភិបាលខេត្តចេញបទបញ្ជាបែបនេះ គេឃើញកម្លាំងសមត្ថកិច្ច មានកម្លាំងកងរាជអាវុធហត្ថខេត្ត ក្រុង កម្លាំងនគរបាលក្រុង រួមទាំងកម្លាំងប្រជាការពារខ្លះផង បានស្ទុះស្ទារប្រមូលកម្លាំងចេញល្បាត ព្រោងព្រាតពាសពេញក្នុងក្រុង នៅយប់ថ្ងៃទី១៨ មេសា រហូតបង្ក្រាបបានជនសង្ស័យចំនួន០៣នាក់ ហើយថែមទាំងដកហូតបានវត្ថុតាងមួយចំនួនផង ហើយមានគ្រឿងញៀនផងដែរ ។ ប៉ុន្តែគេមិនទាន់ដឹងថា តើជនសង្ស័យទាំង០៣នាក់ខាងលើនេះ មានជាប់ពាក់ព័ន្ធនឹងករណីលួចកាត់ខ្សែភ្លើងនៅវេទិកាបណ្យអុំទូកដែរ ឬយ៉ាងណានោះទេ ។
ព្រោះពេលនេះ គេបានប្រគល់ជនទាំង០៣នាក់ទៅឲ្យមន្ត្រីជំនាញអធិការក្រុង ជាអ្នកសួរនាំនិងចាត់ការតាមនីតិវិធី ។ សូម្បីរំលឹកផងដែរថា កន្លងមក ក្រុមចោរលួចកាត់ខ្សែភ្លើងពេលយប់នេះ បានធ្វើសកម្មភាពស្ទើររាល់យប់ និងស្ទើរគ្រប់ភូមិ សង្កាត់នៅក្នុងក្រុងបាត់ដំបង។ ក្រុមចោរលួចកាត់ខ្សែភ្លើងទាំងនេះ មួយចំនួនជិះកង់ ធ្វើជាដើររើសអេតចាយតាមធុងសំរាមពេលយប់ និងមួយចំនួនទៀត ជិះម៉ូតូកញ្ចាស់ៗ ធ្វើសកម្មភាពលួចកាត់ខ្សែភ្លើង ។
ប្រជាពលរដ្ឋតែងប្រទះឃើញក្រុមចោររាត្រីនេះជាញឹកញាប់ ហើយក៏តែងរាយការណ៏ជួនលោកសមត្ថកិច្ចជាបន្តបន្ទាប់ដែរ តែភាគច្រើនអ្នករាយការណ៍មិនសូវទទូលបានលទ្ធផលល្អពីសមត្ថកិច្ចវិញទេ។ ពេលខ្លះ ត្រូវសមត្ថកិច្ចស្ដីបន្ទោសតបវិញថា «ជាការរំខាន ជារឿងកំប៉ិកកំប៉ុក»។ ប៉ុន្តែយ៉ាងណា កន្លងមក កម្លាំងសមត្ថកិច្ចក៏ធ្លាប់ក្របួចបានក្រុមចោររាត្រីទាំងនោះបានច្រើននាក់ដែរ បញ្ជូនទៅតុលាការ៕
ចែករំលែកព័តមាននេះ