ថ្លើមធំណាស់ ! មានជនអនាមិកលួចដោះប៊ូឡុង បង្កាន់ដៃ របាំងសុវត្ថិភាពផ្លូវល្បឿនលឿន
- ភ្នំពេញ
រាជធានីភ្នំពេញ ៖ នៅមុននេះបន្តិច បើតាមការឱ្យដឹងពី លោក គួច ចំរើន អភិបាលខេត្តព្រះសីហនុបានឱ្យដឹងថា មានជនអានាមិក លួចដោះប៊ូឡុង…
រាជធានីភ្នំពេញ ៖ នៅមុននេះបន្តិច បើតាមការឱ្យដឹងពី លោក គួច ចំរើន អភិបាលខេត្តព្រះសីហនុបានឱ្យដឹងថា មានជនអានាមិក លួចដោះប៊ូឡុង បង្កាន់ដៃ របាំងសុវត្ថិភាពផ្លូវល្បឿនលឿន ដែលទង្វើនេះពិតជាអាក្រក់ និងអាចបង្កជាគ្រោះថ្នាក់ដល់អ្នកដំណើរផងដែរ។
លោក គួច ចំរើន បានបង្ហោះរូបភាពដែល ប៊ូឡុង បង្កាន់ដៃ របាំងសុវត្ថិភាពផ្លូវល្បឿនលឿនត្រូវបានគេដោះចេញ អមនឹងសំណេរដែលមានខ្លឹមសារថា «ការកសាងជាការលំបាក មានជនតាមបំផ្លាញ គឺកាន់តែលំបាកថែមទៀត»។
«មានជនចង្រៃ លួចដោះប៊ូឡុង បង្កាន់ដៃ របាំងសុវត្ថិភាពផ្លូវល្បឿនលឿន ទង្វើរនេះបំផ្លាញផង បង្កគ្រោះថ្នាក់ដល់អ្នកដំណើរផង»។ នេះជាការលើកឡើងរបស់លោក គួច ចំរើន
ជាមួយគ្នានោះអភិបាលខេត្តព្រះសីហនុក៏បានអំពាវថា បើបងប្អូនណាបានឃើញបានដឹង អំពីជននេះ សូមជួយរាយការណ៍មកសមត្ថកិច្ចផងដែរ។
គួររម្លឹកផងដែរថា កន្លងមកក៏ធ្លាប់មានករណីប្រជាពលរដ្ឋមួយចំនួនបានធ្វើសកម្មភាពកាត់របងបន្លាលួសតាមផ្លូវល្បឿនលឿនភ្នំពេញ-ព្រះសីហនុ ដើម្បីដើរឆ្លងកាត់ និងដឹកសត្វពាហនៈឆ្លងកាត់ ។ នាពេលនោះ ថ្នាក់ដឹកនាំក្រសួងសាធារណការ និងដឹកជញ្ជួន ធ្លាប់បានណែនាំប្រជាពលរដ្ឋឱ្យបញ្ឈប់សកម្មភាពបែបនោះទៀត ព្រមទាំងបានព្រមានថា បើសិននៅបន្តសកម្មភាព ទាំងនេះទៀតនោះ នឹងប្រឈមតាមផ្លូវច្បាប់ជាក់ជាមិនខានឡើយ។
គួរបញ្ជាក់ថា ផ្លូវល្បឿនលឿនភ្នំពេញ ក្រុងព្រះសីហនុ បានបើកឱ្យប្រជាពលរដ្ឋប្រើប្រាស់ដោយឥតគិតថ្លៃ ក្នុងរយៈពេលមួយខែ ដោយគិតចាប់ពីថ្ងៃទី០១ ខែតុលា ឆ្នាំ២០២២ ដល់ថ្ងៃទី៣១ ខែតុលា និងបានសម្ពោធបើកឱ្យដំណើរជាផ្លូវការកាលពីថ្ងៃទី០៩ ខែវិច្ឆិកា ក្រោមអធិបតីភាពសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងលោក លី ខឺឈាង នាយករដ្ឋមន្ត្រីចិន។
សូមបញ្ជាក់ដែរថា ផ្លូវល្បឿនលឿន-ភ្នំពេញព្រះសីហនុ គឺជាផ្លូវល្បឿនលឿនទី១ និងជាផ្លូវរបៀងយុទ្ធសាស្ត្រសំខាន់បំផុតនៅកម្ពុជា ជួយកាត់បន្ថយពេលវេលាធ្វើដំណើរពីរាជធានីភ្នំពេញ ទៅផែសមុទ្រក្រុងព្រះសីហនុ ពីចំនួនប្រាំម៉ោងមកត្រឹមតែពីរម៉ោងប៉ុណ្ណោះ និងជួយកាត់បន្ថយតម្លៃភស្តុភារកម្មផងដែរ។ ផ្លូវល្បឿនលឿននេះសាងសង់ដោយក្រុមហ៊ុន PPSHV Expressway Co., Ltd និងក្រុមហ៊ុនបុត្រសម្ព័ន្ធនៃ ក្រុមហ៊ុនសាជីវកម្មស្ពានថ្នល់ចិន (CRBC) និងត្រួតពិនិត្យ បច្ចេកទេសដោយក្រុមហ៊ុន MINCONSULT SDN. BHD. ប្រើរយៈពេលសាងសង់ ៤៨ខែ ចំណាយថវិកាជិត ២ពាន់លានដុល្លារសហរដ្ឋអាមេរិក៕
ចែករំលែកព័តមាននេះ