ស្លាប់ដោយសារកែសម្ផស្សទៀតហើយបងប្អូន! លើកនេះនៅទីក្រុងហូជីមិញ ប្រទេសវៀតណាម។ ថ្មីៗនេះ សមត្ថកិច្ចវៀតណាម សហការជាមួយមន្ទីរសុខាភិបាលទីក្រុងហូជីមិញ បានចុះស៊ើបអង្កេតករណីនារីតៃវ៉ាន់ម្នាក់អាយុ៤៥ឆ្នាំបានស្លាប់ បន្ទាប់ពីវះកាត់កែសម្ផស្សនៅគ្លីនិក ខូរៀន ស្តា…
ស្លាប់ដោយសារកែសម្ផស្សទៀតហើយបងប្អូន! លើកនេះនៅទីក្រុងហូជីមិញ ប្រទេសវៀតណាម។ ថ្មីៗនេះ សមត្ថកិច្ចវៀតណាម សហការជាមួយមន្ទីរសុខាភិបាលទីក្រុងហូជីមិញ បានចុះស៊ើបអង្កេតករណីនារីតៃវ៉ាន់ម្នាក់អាយុ៤៥ឆ្នាំបានស្លាប់ បន្ទាប់ពីវះកាត់កែសម្ផស្សនៅគ្លីនិក ខូរៀន ស្តា ខូសស្មេទិច (Korean Star Cosmetic) បានត្រឹមតែប៉ុន្មានថ្ងៃប៉ុណ្ណោះ។ ជនរងគ្រោះបានទៅគ្លីនិកកាលពីថ្ងៃទី២ ខែមេសា ឆ្នាំ២០២៣។
ក្រោយវះកាត់រួច, នារីរូបនោះត្រូវគ្លីនិកអនុញ្ញាតឱ្យវិលត្រឡប់ទៅកន្លែងស្នាក់នៅវិញនៅខេត្តដុងណៃ (Dong Nai)។ ស្រាប់តែនៅថ្ងៃទី៧ ខែមេសា ស្ត្រីរងគ្រោះចាប់ផ្ដើមស្ទះផ្លូវដង្ហើម និងហារមាត់និយាយមិនចេញ។ ក្រុមគ្រួសារបានដឹកទៅសង្គ្រោះបន្ទាន់នៅមន្ទីរពេទ្យ។ ប៉ុន្តែរយៈពេលពីរថ្ងៃក្រោយមក, នារីរូបនោះក៏បានស្លាប់ទៅ។ សមត្ថកិច្ចមិនទាន់ប្រកាសជាផ្លូវការថាជនរងគ្រោះស្លាប់ដោយសារមូលហេតុអ្វីទេ។ ប៉ុន្តែគ្លីនិកនេះត្រូវតែទទួលខុសត្រូវនៅចំពោះមុខច្បាប់។
អាជ្ញាធររកឃើញថាប៉ុន្មានខែចុងក្រោយនេះ មនុស្សស្លាប់ជាបន្តបន្ទាប់ដោយសារការវះកាត់កែសម្ផស្ស។ សូមបញ្ជាក់ថាកែសម្ផស្សធម្មតាដូចជាញេចមុន ញេចអាចម៍រុយ សាក់ចិញ្ចើម ឬអ្វីផ្សេងដែលសើស្បែកមិនមានបញ្ហាទេ។ បញ្ហាគឺពាក់ព័ន្ធនឹងការកែសម្ផស្សដែលវះកាត់ និងចាក់ថ្នាំសណ្ដំ។
– ខែមីនា ឆ្នាំ២០២២នៅហូជីមិញ ស្ត្រីវ័យ៣៣ឆ្នាំម្នាក់ទៅគ្លីនិកអ័រតូផេឌីក(Orthopedics and Rehabilitation Hospital) ដើម្បីពង្រីកដើមទ្រូង។ នៅពេលគ្រូពេទ្យកំពុងវះកាត់សុខៗ, នារីនោះក៏ដាច់ខ្យល់ស្លាប់ទៅ។ គ្រូពេទ្យសង្ស័យថាមកពីថ្នាំសណ្ដំ។
– ខែមេសា ឆ្នាំ២០២២នៅហូជីមិញដដែល ស្ត្រីម្នាក់អាយុឡើង៦១ឆ្នាំហើយនៅចង់ពង្រីកដើមទ្រូងទៀត។ គាត់ទៅគ្លីនិកកាងណាម សៃហ្កន(Kangnam Saigon)ដើម្បីវះយកខ្លាញ់ពីក្នុងខ្លួនទៅពង្រីក។ ពេលកំពុងវះយកខ្លាញ់សុខៗ, គាត់ក៏ស្លាប់ទៅ។
– ថ្ងៃទី១៤ ខែតុលា ឆ្នាំ២០២២ នារីជនជាតិអាមេរិកដើមកំណើតវៀតណាមវ័យ៥៩ឆ្នាំបានវះកាត់កែទម្រង់មុខនៅគ្លីនិកកាងណាម ផ្លាស្ទិច សឺជើរី ហូសស្ពីថល(Kangnam Plastic Surgery Hospital)។ វះកាត់មិនបានប៉ុន្មានផង, នារីនោះក៏ស្លាប់ទៅ។
– ថ្ងៃទី១៨ ខែតុលា ឆ្នាំ២០២២ ស្ត្រីវ័យ៣៣ឆ្នាំម្នាក់វះកាត់ពង្រីកដើមទ្រូងនៅក្នុងគ្លីនិក១កន្លែង ហើយក៏បានស្លាប់ភ្លាមៗ។
– ខែវិច្ឆិកា ឆ្នាំ២០២២, នារីវ័យ២៥ឆ្នាំម្នាក់ទៅគ្លីនិក ឃី ប៊ីយូធី សិនថឺ(Key Beauty Center)ដើម្បីវះកាត់ខ្លាញ់ដើមដៃ។ បន្ទាប់ពីចាក់ថ្នាំសន្លប់ភ្លាម, នារីនោះក៏គាំងបេះដូងស្លាប់តែម្ដង។ ទោះបីដឹកទៅសង្គ្រោះនៅមន្ទីរពេទ្យ ក៏សង្គ្រោះមិនបានដែរ។
អាជ្ញាធររកឃើញថាមិនមែនតែនៅហូជីមិញទេ នៅហាណូយក៏មានបញ្ហាផងដែរ។ កាលពីឆ្នាំ២០២២ នារីម្នាក់វ័យ២៨ឆ្នាំទៅរកសេវាវះកាត់សម្រកខ្លាញ់ក្បាលពោះនៅគ្លីនិក១ស្ថិតនៅតាមបណ្ដោយវិថីគីមងូ (Kim Nguu Street)។ កំពុងវះកាត់សុខៗ, ស្រាប់តែនារីនោះស្រឺតបាត់មាត់ បាត់ក និងប្រកាច់ចាប់មិនឈ្នះ។ គេបានដឹកគាត់ទៅសង្គ្រោះបន្ទាន់នៅមន្ទីរពេទ្យ។
អ្នកជំនាញយល់ថាមានកត្តាមួយចំនួនដែលនាំឱ្យអ្នកទៅរកសេវាវះកាត់កែសម្ផស្សត្រូវប្រឈមនឹងហានិភ័យ និងក្លាយជាជនរងគ្រោះរហូតដល់បាត់បង់អាយុជីវិត។
ទី១- គ្លីនិកវះកាត់កែសម្ផស្សរីកដុះដាលដូចផ្សិត៖ មនុស្សបាក់តាមគ្នាទៅកែសម្ផស្ស ព្រោះមនុស្សហ៊ានចំណាយលើការកែសម្ផស្សដែលពួកគេគិតថានឹងជួយកែប្រែវាសនា និងអនាគតរបស់ពួកគេ។ ដូច្នេះវិស័យនេះក្លាយជាមុខរបរត្រូវប៉ាន់។ អ្នកដែលមានចំណេះដឹងផ្នែកនេះមិនចង់ឱ្យឱកាសកន្លងផុតទៅទេ។ ជួនកាល គ្លីនិកខ្លះទទួលបានអាជ្ញាប័ណ្ណវះកាត់ទូទៅ។ ប៉ុន្តែពួកគេផ្ដល់សេវាវះកាត់កែសម្ផស្ស។
គ្លីនិកខ្លះគ្មានគ្រូពេទ្យជំនាញកម្រិតដុកទ័រទេ។ ពួកគេមានត្រឹមបុគ្គលិកពេទ្យដែលរៀនវគ្គខ្លីៗពីរបីខែ។ រួចហើយ ពួកគេចុះអនុវត្តការវះកាត់ជាក់ស្ដែងតែម្ដង។ ពួកគេគិតថាចំណេះដឹងមិនស្មើនឹងចំណេះធ្វើ។ អ្នកខ្លះមានទស្សនៈថាការងារជាអ្នកបង្រៀនមនុស្ស។ ដូច្នេះ ពួកគេមិនសូវគិតគូររៀនសូត្រឱ្យមានជំនាញច្បាស់លាស់ទេ។ ពួកគេចង់អនុវត្តជាក់ស្ដែងតែម្ដង។
ទី២- គ្លីនិកខ្វះការទទួលខុសត្រូវ៖ គ្លីនិកខ្លះមិនបានស្នើសុំអាជ្ញាប័ណ្ណ, មិនបានឆ្លងកាត់ការត្រួតពិនិត្យលក្ខណៈសម្បត្តិរបស់គ្រូពេទ្យ និងគ្រឿងបរិក្ខារនៅក្នុងគ្លីនិកទេ។ ជាក់ស្ដែង គ្លីនិក ឃី ប៊ីយូធី សិនថឺ ជាហាងកែសម្ផស្សសើស្បែក។ លុះពេលអតិថិជនកាន់តែច្រើនឡើងៗសួររកសេវាពង្រីកនេះពង្រីកនោះ វះកាត់នេះវះកាត់នោះ គ្លីនិកក៏ចាប់ផ្ដើមប្រមូលមនុស្សដែលចេះល្មមៗដើម្បីផ្ដល់សេវាវះកាត់។ ពួកគេយល់ថាលុយនៅនឹងមុខ, បើបណ្ដោយឱ្យរបូតពីដៃទៅវិញហាក់ដូចជាមិនសម។
ទី៣- អតិថិជនចូលចិត្តសេវាធូរថ្លៃ៖ ជាការពិត, បញ្ហាតម្លៃជារឿងសំខាន់។ ដោយសារថវិកាមានកំណត់, អ្នកខ្លះចង់ស្អាត និងចំណាយលុយតិច។ ពួកគេក៏គិតអំពីហានិភ័យដែរ ប៉ុន្តែសុខចិត្តប្រថុយ។ ព្រោះមានលុយតិច ចង់ស្អាត និងចង់ឆាប់។ អីចឹងជម្រើសមានតែវះកាត់នៅកន្លែងធូរថ្លៃ។ អ្នកខ្លះមានលុយច្រើន ក៏សុខចិត្តថាំលុយ និងសុខចិត្តទៅគ្លីនិកធូរថ្លៃផងដែរ។
ទី៤- គ្លីនិកធ្វើតាមការចង់បានរបស់អតិថិជន៖ គ្លីនិកខ្លះក៏គិតអំពីសុវត្ថិភាពជាចម្បងផងដែរ។ ប៉ុន្តែនៅក្នុងការអនុវត្តជាក់ស្ដែង, ដូចបានជម្រាបជូនពីខាងដើមស្រាប់។ អតិថិជនចង់សំចៃថវិកា និងចង់បានសេវាធូរថ្លៃ។ ម៉្លោះហើយ, គ្លីនិកខ្លះដែលធ្លាប់មានស្តង់ដារកម្រិតខ្ពស់ ជួលសុទ្ធតែគ្រូពេទ្យជំនាញៗ និងបំពាក់គ្រឿងបរិក្ខារទំនើបៗ ចាយអស់លុយមួយគំនរ។
យូរៗទៅ, ពួកគេនឹងងាកទៅប្រើវិធីចាប់ឆាយដែរ។ បើមិនអីចឹងទេ មិនអាចប្រកួតប្រជែងឈ្នះគេទេ។ ឧបមាថាគ្លីនិកធូរថ្លៃអាចរកបានអតិថិជនរាប់រយ រាប់ពាន់នាក់។ រីឯគ្លីនិកស្តង់ដាររកបានត្រឹមតែម្នាក់ពីរនាក់។ ដូច្នេះ រកស៊ីម៉េចនឹងទាន់គេ? គិតសេវាថ្លៃពេកបែរជាមិនសូវមានអតិថិជន។ យូរៗទៅ, គ្លីនិកផ្សេងដណ្ដើមម៉ូយអស់។ ម៉្លោះហើយ ពួកគេត្រូវតែបង្ខំចិត្តប្រើវិធីធូរថ្លៃ។ រីឯបុគ្គលិក, គ្រឿងបរិក្ខារ និងគ្រូពេទ្យវះកាត់ក៏អាចនឹងមានគុណភាពទៅតាមតម្លៃផងដែរ។
ដូច្នេះសរុបសេចក្ដីមក, វាជារឿងសំខាន់ណាស់ដែលអតិថិជនគួរគិតអំពីសុវត្ថិភាពជាចម្បង។ ពាក្យចាស់លោកពោលថា «ជីវិតរស់, របស់បាន»។ លោកអ្នកដែលមានគម្រោងវះកាត់កែសម្ផស្សគួរណាស់គិតទៅដល់ការថែរក្សាជីវិតឱ្យបានគង់វង្ស។ លុយអាចរកបាននៅពេលក្រោយ។ ប៉ុន្តែជីវិតមនុស្សដែលបាត់បង់ទៅហើយ មិនអាចវិលត្រឡប់មកវិញទេ៕
ប្រភព៖ Vietnam Express, Vietnamnet
អត្ថបទដែលទាក់ទងនឹងការស្លាប់នៅពេលវះកាត់កែសម្ផស្ស
ទីបំផុត! ក្រសួងសុខាភិបាលបានសម្រេចបិទមជ្ឈមណ្ឌលកែសម្ផស្ស អឹម២៥ ប៊ីយូធី ហើយ
ចែករំលែកព័តមាននេះ