ADផ្ទាំងផ្សព្វផ្សាយពាណិជ្ជកម្ម

ខេត្តបាត់ដំបងជាប់ចំណាត់ថ្នាក់លេខ២ ក្រោយទទួលភ្ញៀវទេសចរ១,៥លាននាក់ត្រឹម៣ថ្ងៃ

2 ឆ្នាំ មុន

បាត់ដំបង
១៨ ខែ មេសា ឆ្នាំ ២០២៣ ម៉ោង ១៤:៤១

ខេត្តបាត់ដំបង ៖ ក្នុងរយៈពេល០៣ថ្ងៃនៃពិធីបុណ្យចូលឆ្នាំថ្មីប្រពៃណីខ្មែរកន្លងទៅថ្មីៗនេះ ខេត្តបាត់ដំបងបានទទួលស្វាគមន៍ភ្ញៀវទេសចរជាតិ និងអន្តរជាតិចូលមកកម្សាន្តសរុប១,៥លាននាក់ដែលធ្វើឱ្យអាណាចក្រខេត្តបុរាណមួយនេះទទួលបានភ្ញៀវច្រើនជាងគេ បន្ទាប់ពីខេត្តសៀមរាប និងទទូលបានចំណាត់ថ្នាក់លេខ២ទូទាំងប្រទេស ។ នេះបើយោងតាមរបាយការណ៍ក្រសួងទេសចរណ៍ដែលបានរាយការណ៏ជូនប្រមុខរាជរដ្ឋាភិបាល ។…

នៅក្នុងរបាយការណ៍ក្រសួងទេសចរណ៍បានកំណត់យកគោលដៅទេសចរណ៍សំខាន់ៗចំនួន១០ខេត្តទូទាំងប្រទេសដែលមានភ្ញៀវទេសចរជាតិ និងភ្ញៀវអន្តរជាតិធ្វើដំណើរទៅកំសាន្តច្រើនជាងគេ ។ ក្នុងនោះ ក៏មានខេត្តបាត់ដំបង មួយផងដែរ ដែលមានភ្ញៀវធ្វើដំណើរទៅកំសាន្តរហូតដល់ទៅចំនួន១,៥០០,១៦៨នាក់ ដែលធ្វើឲ្យខេត្តបុរាណមួយនេះ ទទួលបានភ្ញៀវច្រើនជាងគេ បន្ទាប់ពីខេត្តសៀមរាប និងអាចចាត់ទុកជាប់ចំណាត់ថ្នាក់លេខ២ ទូទាំងព្រះរាជាណាចក្រកម្ពុជា ។

ជុំវិញដំណើរកំសាន្តរបស់ភ្ញៀវទេសចរក្នុងឱកាសបុណ្យចូលឆ្នាំថ្មីប្រពៃណីខ្មែររយៈពេល០៣ថ្ងៃកន្លងទៅនេះ របាយការណ៍មន្ទីរទេសចរណ៍ខេត្ត ដែលបានរាយការណ៍ជាបន្តបន្ទាប់ គេបានកត់សម្គាល់ឃើញថា កំណើនភ្ញៀវទេសចរទាំងភ្ញៀវជាតិ និងភ្ញៀវអន្តរជាតិ ដែលបានធ្វើដំណើរមកកំសាន្តតាមរមនីយដ្ឋាននានាក្នុងខេត្តបាត់ដំបង បានកើនឡើងយ៉ាងភ្លូកទឹកភ្លូកដី ចាប់តាំងពីថ្ងៃទី០១ (ថ្ងៃដំបូង) នៃពិធីបុណ្យចូលឆ្នាំថ្មី ។

អភិបាលខេត្តបាត់ដំបង លោក សុខ លូ បានថ្លែងប្រាប់កោះសន្តិភាពនៅថ្ងៃចូលឆ្នាំដំបូងថា ភ្ញៀវទេសចរដែលធ្វើដំណើរចូលមកកំសាន្តក្នុងខេត្តបាត់ដំបងច្រើនកុះករបែបនេះដោយសារតែឆ្នាំនេះ យើងបានរៀបចំកន្លែងកំសាន្តស្ទើរគ្រប់តាមរមនីយដ្ឋាន តាមទីវត្តអារាម និងតាមសាលារៀននានា នៅតាមមូលដ្ឋាន ។ ជាពិសេស យើងបានរៀបចំ«សង្ក្រាន្ត» និង «តំបន់ត្រជាក់» នៅក្នុងក្រុងបាត់ដំបង តែម្ដង ដែលយើងរៀបចំបានស្អាតល្អ ជាកន្លែងដែលទាក់ទាញភ្ញៀវខ្លាំងបំផុត សម្រាប់ពីធីចូលឆ្នាំថ្មីប្រពៃណីខ្មែរឆ្នាំ២០២៣នេះ ។

ក្រៅតែអំពីការរៀបចំកន្លែងកំសាន្ត កន្លែងសង្ក្រាន្ត និងតំបន់ត្រជាក់ ដែលទាក់ទាញចំណាប់អារម្មណ៍ភ្ញៀវខ្លាំងបំផុតនោះ លោកអភិបាលខេត្តរូបនេះ ក៏បានលើកឡើងអំពីសុវត្ថិភាពផ្លូវធ្វើដំណើរទៅកាន់រមនីយដ្ឋាននានា ទូទាំងខេត្តបាត់ដំបងផងដែរ ដោយលោកបានបង្ហាញនូវមោទនភាពថា ទាំងផ្លូវឆ្លងកាត់ខេត្ត ទាំងផ្លូវទៅកាន់រមនីយដ្ឋាននានា សុទ្ធតែអាចធ្វើដំណើរបានស្រួលមានសុវត្ថិភាពល្អ រីឯរមនីយដ្ឋានក៏មានច្រើនកន្លែងសម្រាប់ភ្ញៀវធ្វើដំណើរកំសាន្ត ។

នេះសុទ្ធតែជាការទាក់ទាញចំណាប់អារម្មណ៏ និងផ្ដល់ទំនុកចិត្តដល់ភ្ញៀវខ្លាំងបំផុត ដែលនាំឲ្យពួកគេសម្រេចចិត្តធ្វើដំណើរមកកំសាន្តខេត្តបាត់ដំបង ដែលជាខេត្តវ័យចំណាស់ ដ៏សំបូរបែបនេះមួយ នៅក្នុងព្រះរាជាណាចក្រកម្ពុជា៕