ខេត្តបាត់ដំបង ៖ គ្រាន់តែបញ្ចប់ពិធីបុណ្យចូលឆ្នាំថ្មីប្រពៃណីខ្មែរភ្លាម ចោរបានលួចដឹកមេគោអ្នកភូមិអស់ចំនួន០២ក្បាលយកទៅបាត់ដោយសុវត្ថិភាព ដែលម្ចាស់អះអាងថា អាចកើតឡើងនៅវេលាជាង១រំលងអធ្រាត្រ ឈានចូលថ្ងៃទី១៨ មេសា នៅភូមិគោកពន្លៃ សង្កាត់អូរម៉ាល់…
ខេត្តបាត់ដំបង ៖ គ្រាន់តែបញ្ចប់ពិធីបុណ្យចូលឆ្នាំថ្មីប្រពៃណីខ្មែរភ្លាម ចោរបានលួចដឹកមេគោអ្នកភូមិអស់ចំនួន០២ក្បាលយកទៅបាត់ដោយសុវត្ថិភាព ដែលម្ចាស់អះអាងថា អាចកើតឡើងនៅវេលាជាង១រំលងអធ្រាត្រ ឈានចូលថ្ងៃទី១៨ មេសា នៅភូមិគោកពន្លៃ សង្កាត់អូរម៉ាល់ ក្រុងបាត់ដំបង ដោយបន្សល់ទុកស្បែកជើងមួយគូនៅខាងក្រោយផ្ទះជនរងឲ្យសមត្ថកិច្ចពិនិត្យ តែសមត្ថកិច្ចមិនបានយកវត្ថុតាងនោះទៅរក្សាទុកទេ ។
លោក រ៉ន ចាន់រិទ្ធ អាយុ៤៤ឆ្នាំ ដែលជាម្ចាស់គោបានប្រាប់កោះសន្តិភាពថា គោរបស់គាត់ចំនួន០៣ក្បាលចងនៅខាងក្រោយផ្ទះជាមួយនឹងគោជាច្រើនក្បាលទៀតរបស់បងប្អូន តែពួកចោរបានលួចយកតែមេគោគាត់ចំនួន០៣ក្បាល តែចៃដន្យពេលដឹកចេញផុតបន្តិច ១ក្បាលបានរួចត្រឡប់មកវិញ ។
គាត់និយាយថា នៅវេលាម៉ោង១១យប់ថ្ងៃទី១៧ មេសា គាត់បានដឹកយកទៅចងនៅក្រោយផ្ទះ ជាមួយហ្វូងគោជាច្រើនក្បាលទៀតរបស់បងប្អូន ដែលជាកន្លែងធ្លាប់ចងរាប់ឆ្នាំកន្លងមកហើយ ។ គាត់បន្តថា ក្រោយពីចងគោរួចគាត់ក៏ចូលសំរាន្តលក់ភ្លាមៗតែម្ដង សូម្បីឆ្កែព្រូសក៏គាត់មិនដឹងដែរ ។ លុះព្រឹកឡើងថ្ងៃទី១៨ មេសា ពេលគាត់ងើបពីដំណេកទៅមើលគោក្រោយផ្ទះ ស្រាប់តែបាត់គោគាត់អស់០២ក្បាល ខណៈ០១ក្បាលទៀត ឃើញបាត់ខ្សែប្រឡៅកដែលទំនងចោរដឹកទៅទាញដាច់ ហើយគោរត់ត្រឡប់មកវិញ ។
ម្ចាស់គោរូបនេះបានបញ្ជាក់ថា គាត់និងក្រុមគ្រួសារបាននាំគ្នាតាមដានជើងគោដែលចោរលួចយកទៅឃើញស្នាមដានជើងដឹកតាមវាលស្រែខាក្រោយភូមិ សំដៅឡើងទៅផ្លូវហាយវេដែលឆ្ងាយពីទៅនោះប្រហែល៣០០ម៉ែត្រ។ គាត់បន្ថែមថា ពេលនាំគ្នាដើរតាមដានជើងគោ ស្រាប់តែប្អូនគាត់ប្រទះឃើញស្បែកជើង០១សំរាប់ ដែលគេសង្ស័យជាស្បែកជើងពួកចោរបានបន្សល់ទុកក្បែររបងខាងក្រោយផ្ទះ ហើយគាត់ក៏បានរាយការណ៏ប្រាប់សមត្ថកិច្ចភ្លាមៗដែរ ។
ស្ត្រីម្នាក់ត្រូវជាបងប្អូនម្ចាស់គោបាននិយាយដែរថា នៅយប់កើតហេតុ វេលាម៉ោងប្រហែល១រំលងអធ្រាត្រ គាត់បានសំលេងឆ្កែព្រូស ហើយគាត់បានដាស់ប្ដីគាត់ឲ្យងើបមើលក្រោលគោ តែមិនបានឃើញអ្វីចម្លែកទេ ។ គាត់និយាយថា ក្រោយពីពិនិត្យរកមើលមិនឃើញមានអ្វីប្លែក បន្តិចក្រោយមក ប្ដីរបស់គាត់ក៏ជិះម៉ូតូចេញទៅបង់សំណាញ់ទាំងយប់បាត់ទៅ លុះព្រឹកឡើងស្រាប់តែមានការភ្ញាក់ផ្អើលថា មានចោរលួចគោអស់០២ក្បាល ។
នៅព្រឹកកើតហេតុ ក្រោយពីទទូលបានសេចក្ដីរាយការណ៍ពីម្ចាស់គោ មន្ត្រីនគរបាលប៉ុស្ដិ៍រដ្ឋបាលអូរម៉ាល់ម្នាក់ បានចុះទៅពិនិត្យកន្លែងក្រោលគោ ។ នេះបើតាមម្ចាស់គោនិយាយប្រាប់ ។ ម្ចាស់គោបានបញ្ជាក់ថា មន្ត្រីប៉ុស្ដិ៍ម្នាក់នោះ គ្រាន់តែសួរនាំបន្តិចបន្តួចធ្វើកំណត់ហេតុ និងពិនិត្យស្បែកជើងដែលគេសង្ស័យជារបស់ចោរបន្សល់ទុក រួចក៏ចាកចេញបាត់ទៅ តែមិនបានយកវត្ថុតាងស្បែកជើងទៅរក្សាទុកទេ ។
មានការកត់សម្គាល់ដែរថា មួយរយៈកន្លងទៅនេះ នៅខេត្តបាត់ដំបង ចោរលួចគោបានកើតឡើងច្រើនករណីហើយ តែសមត្ថកិច្ចហាក់គ្មានវិធានការទប់ស្កាត់ ឬតាមស្រាវជ្រាវបង្ក្រាបបានមួយករណីណាឡើយរហូតដល់ពេលនេះ។ ក្រុមចោរលួចគោនេះមានសកម្មភាពទ្រង់ទ្រាយធំដុំ សុទ្ធតែមានរថយន្តតាមដឹកគោទាំងហ្វូងៗ ។
ដោយសារតែសមត្ថកិច្ចបង្ក្រាបមិនបានដូច្នេះហើយ ទើបក្រុមចោរបានដៃបង្កើនសកម្មភាពកាន់តែខ្លាំងស្ទើរគ្រប់ទីកន្លែង ។ កាលពីសប្ដាហ៍មុន ក្រុមចោរលួចគោបែបនេះ ក៏បានធ្វើសកម្មភាព លួចដឹកគោអ្នកភូមិ០១ក្បាលដែរ នៅភូមិសំរោង ឃុំស្នឹង ស្រុកបាណន់ តែគោនោះបានរើបំរះដាច់ខ្សែរត់ត្រឡប់ទៅក្រោលវាវិញ ខណៈប៉ុន្មានខែមុនក្រុមចោរបានលួចក្របីចំនួន០៤ក្បាលរបស់អ្នកភូមិសំរោង ឃុំស្នឹងនេះដែរ ឡើងរថយន្តដោយសុវត្ថិភាព ។
រហូតដល់សព្វថ្ងៃនេះ គ្មានសមត្ថកិច្ចណាអើពើនឹងរឿងចោរលួចក្របីនេះទេ។ ហើយពេលនេះ ក្រុមចោរកំពុងតាមយារយីលួចគោអ្នកភូមិទៀត រហូតអ្នកភូមិមួយចំនួនដែលមានគោដេកព្រូយបារម្ភពីសុវត្ថិភាពគោរបស់ពួកគេ ហើយក៏មានអ្នកខ្លះចាប់ផ្ដើមប្រកាសលក់គោជាបណ្ដើរៗទៀតផង ៕
ចែករំលែកព័តមាននេះ