គេសង្កេតឃើញប្រជាពលរដ្ឋ១គ្រួសារ រស់នៅក្នុងភូមិអូរតាពុកលើ សង្កាត់ប៉ៃលិន ក្រុង-ខេត្តប៉ៃលិន កំពុងតែមមាញឹក ដោយនាំគ្នាយកដើមចេកកាត់ជាកង់ៗ ហែកស្លឹកចេកបត់ធ្វើបាយសី រួមមាន
ខេត្តប៉ៃលិន ៖ ក្នុងឱកាសពិធីបុណ្យចូលឆ្នាំថ្មី ប្រពៃណីជាតិខ្មែរ ឆ្នាំថោះ ២០២៣ ដែលនឹងចូលមកដល់នារសៀលថ្ងៃទី ១៤ មេសា ស្អែកនេះ គេសង្កេតឃើញថា អ្នកលក់បាយសី ហាក់ត្រូវប៉ាន់ជាខ្លាំង។
ជាក់ស្តែង នៅព្រឹកថ្ងៃទី១៣ ខែមេសា ឆ្នាំ២០២៣នេះ គេសង្កេតឃើញប្រជាពលរដ្ឋ១គ្រួសារ រស់នៅក្នុងភូមិអូរតាពុកលើ សង្កាត់ប៉ៃលិន ក្រុង-ខេត្តប៉ៃលិន កំពុងតែមមាញឹក ដោយនាំគ្នាយកដើមចេកកាត់ជាកង់ៗ ហែកស្លឹកចេកបត់ធ្វើបាយសី រួមមាន ទៀន ធូប និងគ្រឿងផ្សំផ្សេងៗ ដើម្បីលក់ឱ្យអ្នកភូមិរស់នៅក្នុងក្រុងប៉ៃលិន ទិញយកទៅដាក់តាំងសែនតាមរានមុខផ្ទះ ទទួលទេវតាឆ្នាំថ្មី នាឱកាសបុណ្យចូលឆ្នាំថ្មីប្រពៃណីជាតិនៅថ្ងៃស្អែកនេះ។
បើតាមការរៀបរាប់ពីលោក នួន ប៊ុនថាច បានឱ្យដឹងថា ជារៀងរាល់ឆ្នាំ លោកតែងតែទិញដើមចេក ស្លឹកចេក ទៀន ធូប និងគ្រឿងសម្ភារៈផ្សេងៗជាច្រើន យកមកវេចខ្ចប់ធ្វើជាបាយសីជាឈុតៗ ដើម្បីលក់ឱ្យប្រជាពលរដ្ឋរស់នៅតាមភូមិក្នុងក្រុងប៉ៃលិន ដែលបានកុម្មង់ទិញយកទៅសែនថ្វាយ ឬទទួលទេវតាឆ្នាំថ្មី។
លោកបន្តទៀតថា ការធ្វើបាយសីលក់នេះ គឺដាច់គួរឱ្យកត់សម្គាល់ ដោយប្រជាពលរដ្ឋភាគច្រើនអត់ចេះធ្វើបាយសីខ្លួនឯងនោះទេ ទើបនាំគ្នាទិញពីលោកយកទៅដាក់សែនថ្វាយទេវតា ឬទទួលទេវតាតែម្តង។
លោកបញ្ជាក់ថា ការលក់ដូរបាយសីសម្រាប់ទទួលទេវតាឆ្នាំថ្មីនេះ ១ឈុត តម្លៃ ៣៥០០០រៀល ដោយលោកនាំប្រពន្ធកូន បងប្អូនធ្វើលក់ឱ្យគេស្ទើរតែមិនទាន់នោះឡើយ ពោលគឺដាច់អស់រាប់រយឈុតតែម្តង។ រហូតដល់ថ្ងៃចុងក្រោយ លោកក៏បន្សល់ទុក១ឈុត ដើម្បីរៀបចំនៅខាងមុខផ្ទះ សម្រាប់ទទួលទេវតាឆ្នាំថ្មីផងដែរ។
ចំណែកប្រជាពលរដ្ឋម្នាក់មានឈ្មោះ ចែម គន្ធី ភេទស្រី រស់នៅក្នុងក្រុងប៉ៃលិន បានឱ្យដឹងដែរថា ជារៀងរាល់ឆ្នាំ គាត់តែងតែទិញបាយសីពីកសិករខាងលើ ព្រោះគាត់អត់ចេះបត់ស្លឹកចេក ឬកាត់ដើមចេក ដើម្បីធ្វើបាយសីនោះទេ ពោលគឺចាំទិញពីអ្នកធ្វើលក់ខាងលើតែម្តង ដោយណែនាំឱ្យបងប្អូនរស់នៅផ្ទះក្បែរគ្នាទិញយកទៅដាក់តាំងសែនព្រេន ចាំទទួលទេវតាឆ្នាំថ្មី។
សូមបញ្ជាក់ថា ៖ នេះគឺជាមុខរបរមួយ ដែលអាចឱ្យប្រជាពលរដ្ឋមានជំនាញអាចផលិតជាចូម ឬបាយសីលក់ដូរនាឱកាសបុណ្យទានម្តងៗ ទទួលបានថវិកាសម្រាប់ផ្គត់ផ្គង់ជីវភាពប្រចាំថ្ងៃផងដែរ៕
ចែករំលែកព័តមាននេះ