រាជធានីភ្នំពេញ ៖ ក្រោយមានប្រតិកម្មខ្លាំងពីមន្ត្រីធំៗ អ្នកសិល្បៈ និងមហាជនអ្នកប្រើប្រាស់បណ្តាញសង្គមជាច្រើននោះ លោក ឯម រៀម ដែលគេផ្តល់រហស្សនាម «បណ្ឌិតច្នៃម៉ូដ» នោះ បានចេញសារសុំការអភ័យពីសំណាក់មហាជន ដែលលោកបានសរសេរសាររិះគន់ខុសអត្ថន័យពិតរបស់ «១លានបេះដូង» ដែលជាផ្នែកមួយនៃយុទ្ធនាការ #BeyondTheGames ឬលើសពីការប្រកួត បង្កើតការបំបែកឯតទគ្គកម្ម «បេះដូងច្រើនជាងគេលើពិភពលោក»នោះ ។
លោក ឯម រៀម ដែលត្រូវបានមហាជនជាច្រើនស្គាល់លោកតាមរយៈការច្នៃម៉ូដដ៏លេចធ្លោទាក់ទាញ ជាពិសេស ទៅលើការស្លៀកពាក់ និងតែងខ្លួនប្លែកៗ ចូលរួមកម្មវិធីផ្សេងៗជាច្រើន ហើយក៏រងការរិះគន់ច្រើនលើការច្នៃរបស់លោកនោះ បានសរសេរសារលើហ្វេសប៊ុកផ្លូវការរបស់លោកនាថ្ងៃទី១១ ខែមេសា ឆ្នាំ២០២៣នេះថា « សូមអភយ័ទោសពីបងប្អូន ដែលរូបលោក បានសរសេរសារ (Caption) កាលពីថ្ងៃទី១០ មេសា ម្សិល មិញ ខុសអត្ថន័យរបស់១លានបេះដូងកាត់បត់។
ក្រៅពីការសុំការយោគយល់ពីមហាជន លោក ឯម រៀម បណ្ឌិតច្នៃម៉ូដ ដែលពូកែខាងលេងម៉ូដពុកមាត់ផងដែរនោះ បានប្រកាសថា រូបលោកនឹងមិនធ្វើការកែច្នៃសិល្បៈក្នុងរូបភាពណាមួយដែលប៉ះពាល់ដល់សង្គមនោះ
ទេ។
លោក ឯម រៀម បានសរសេរសំណេរបន្តដែលមានខ្លឹមសារថា «ហើយខ្ញុំក៏បានកែរសំរួលរួច Caption ឡើងវិញហើយ ដូចនេះហើយសូមខន្តី និងអភ័យផង ដោយខ្ញុំមិនបានពិចារណា ហើយពីពេលនេះទៅសន្យាថានឹងធ្វើសិល្បៈរបស់ខ្ញុំ និងមិនប៉ះពាល់ដល់សង្គមឡើយ… »។
សូមបញ្ជាក់ថា ការចេញមុខមកសុំការយោគយល់និងអភ័យទោសពីសំណាក់មហាជន ត្រូវបានធ្វើឡើងបន្ទាប់មានមន្ត្រីធំៗជាច្រើនរូប រួមទាំងអ្នកសិល្បៈនិងមហាជនមួយចំនួនបានផ្ទុះប្រតិកម្មនិងព្រលៈចំៗទៅលើ បណ្ឌិតច្នៃម៉ូដ លោក ឯម រៀម ដែលបានបង្ហោះសាររិះគន់រឿង បេះដូងប្រដាស ចំនួន ១ លានដែលកម្ពុជាខិតខំដើម្បីជាធ្វើការបំបែកឯតទគ្គកម្ម តាមរយៈការបត់បេះដូងឱ្យបាន ១លានបេះដូង និងត្រូវបានរៀបចំនៅមុខប្រាសាទអង្គរវត្ត។
សារដំបូងដែលបង្កឱ្យមានប្រតិកម្មរបស់មន្ត្រីធំៗ អ្នកសិល្បៈ និងមហាជនជាច្រើនរូបនោះ គឺដោយសារតែលោក ឯម រៀម បានបង្ហោះរូបភាពបេះដូងក្រដាសចំនួន ១លានបេះដូងនៅមុខអង្គរវត្ត អមនឹងសំណេររិះគន់ធ្ងន់ៗថា «១លាន បេះដូងក្លែងក្លាយ បើថវិការដ្ឋ សូមចូលរួមសោកស្តាយ តែបើជាទឹកចិត្តរបស់បងប្អូន មិនគួរធ្វើនៅទីនេះ»។
ភ្លាមៗក្រោយបង្ហោះសារវាយប្រហាររឿង «បេះដូង ១លាន» នេះ លោកជំទាវ បាន ស្រីមុំ ដែលជាអភិបាល ខេត្តប៉ៃលិន ក៏បានផ្ទុះប្រតិកម្មដោយលោកជំទាវលើកទៅកាន់លោក ឯក រៀម ថា «សូមជំរាបលោក ឬលោក ស្រីប្អូនថា នៅក្នុងចំណោមបេះដូងពិត ១លាននេះ ក៏មានបេះដូងខ្ញុំ កូនៗ យុវជនខ្ញុំ បងប្អូនមន្ត្រីរាជការរបស់ ខ្ញុំដែរ គឺជាបេះដូងចេញពីចិត្តពិតៗ ដោយក្តីគោរពស្រលាញ់ពីបេះដូងពិតៗ សូមជ្រាប»។
ចំណែក ឯកឧត្តម ហ៊ុយ វណ្ណៈ រដ្ឋលេខាធិការក្រសួងមហាផ្ទៃ និងជាប្រធានសហភាពសហព័ន្ធអ្នកសារ ព័ត៌មានកម្ពុជា ក៏បានបញ្ចេញទស្សនៈទៅលោក ឯម រៀមថា «ប្អូន EM Riem ! ប្អូនគួរលុបសារប្អូនចោលក៏ល្អដែរ។ ប្អូនកុំបំផ្លាញខ្លួនឯង និងជាតិឯងលើចំណុចនេះ! ប្អូនគួរបើកចិត្តទូលាយ និងលើកទឹកចិត្ត ដល់ការខិតខំប្រឹងប្រែងដ៏ថ្លៃថ្នូរ និងការចូលរួមដោយមិនខ្លាចការនឿយហត់ របស់ប្រជាជនយើងរាប់ម៉ឺនលាននាក់ ក្នុងការផ្សព្វផ្សាយកិត្យានុភាព និងកិត្តិនាមដ៏អស្ចារ្យរបស់មាតុភូមិយើង នៅលើឆាកអន្តរជាតិ »។
យ៉ាងណាមិញ ក្រោយលោក ឯម រៀម បានកែតម្រូវនូវខ្លឹមសារពាក់ព័ន្ធនឹង «១លានបេះដូង» នោះមក ឯកឧត្តម ហ៊ុយ វណ្ណៈ ក៏បានបញ្ចេញនូវមតិថា «ប្អូន [លោក ឯម រៀម] បានកែខ្លឹមសារ នៅរសៀលនេះ រសៀលថ្ងៃទី ១០ មេសា] ទទួលយកបាន ហើយតាមរយៈសកម្មភាពលើបញ្ហានេះ ប្អូនបានទាញទម្លាក់ជំនឿ និងតម្លៃប្អូន ឱ្យឃ្លាតឆ្ងាយពីសាធារណជនហើយ»។
ក្រោយលោក ឯម រៀម ក៏មានអ្នកប្រើប្រាស់បណ្តាញសង្គមជាច្រើនបានចូលទៅបញ្ចេញមតិចម្រុះភាព ដោយក្នុងនោះ អ្នកប្រើប្រាស់បណ្តាញសង្គមខ្លះបានលើកឡើងថា «លើកនេះបងឯងខុសមែន! ដូច្នេះបងត្រូវដឹងថាបងជាមនុស្សមាន Influence (មានឥទ្ធិពល) ក្នុងសង្គមមួយដែរ ដូច្នេះ រាល់ការផុសអ្វីមួយជាសាធារណៈទាក់ទងហ្នឹងសង្គម សូមគិតអោយបានឆ្ងាយបង។ រឿងពីក្រោយខ្នងដូចម្តេច ប្រសិនបើវាជាការពិតមែន ក៏បងមិនគួរនិយាយអីដែរ ព្រោះរដ្ឋាភិបាលធ្វើនេះក៏សម្រាប់មុខមាត់ជាតិដែរ។ អរគុណបងដែលទទួលកំហុស»។ បងប្អូនអ្នកប្រើប្រាស់បណ្តាញសង្គមផ្សេងទៀត ក៏បានបញ្ចេញមតិថា ដោយសារតែលោក ឯម រៀម ជា «អ្នកល្បីត្រូវប្រយ័ត្ន រាល់ការផុស ឬ សរសេរអ្វីមួយផុសចេញទៅ បងមានអ្នកចាប់អារម្មណ៍ទាំងអ្នកស្រលាញ់និងមិនចូលចិត្តយើង» ជាដើម។
លោក ឯម រៀម ត្រូវបានមហាជនជាច្រើនស្គាល់លោកតាមរយៈការច្នៃម៉ូដដ៏លេចធ្លោ ទាក់ទាញ ជាពិសេសទៅលើការស្លៀកពាក់ និងតែងខ្លួនប្លែកៗ ចូលរួមកម្មវិធីផ្សេងៗជាច្រើន ដែលក្នុងនោះការច្នៃម៉ូដខ្លះក៏ទទួលបានការគាំទ្រ តែក៏មានការកែច្នៃម៉ូដសម្លៀកបំពាក់មួយចំនួន ក៏ត្រូវបានរិះគន់ខ្លាំងៗពីមហាជនថា ជាការកែច្នៃប៉ះពាល់ដល់វប្បធម៌សង្គមជាដើម។
គួរបញ្ជាក់ផងដែរថា ប្រវត្តិនៃការសិក្សារបស់អ្នកច្នៃម៉ូដ ឯម រៀម ក៏មិនធម្មតាដែរ។ បន្ទាប់ពីបញ្ចប់ការសិក្សាថ្នាក់បរិញ្ញាបត្រផ្នែកគំនូរសកលវិទ្យាល័យភូមិន្ទវិចិត្រសិល្បៈ នៅប្រទេសកម្ពុជា ក្នុងឆ្នាំ ២០០០ លោក ឯម រៀម ទទួលបានអាហារូបករណ៍ទៅសិក្សាផ្នែកគ្រឿងសង្ហារិមឯប្រទេសបារាំង។ នៅប្រទេសបារាំង លោកសិក្សាបាន ៦ ឆ្នាំ គឺ ថ្នាក់បរិញ្ញាបត្រ ៥ ឆ្នាំ និងថ្នាក់បណ្ឌិត ១ ឆ្នាំ។ ជាមួយគ្នានោះផងដែរ លោក ឯម រៀម គឺបានរៀនផ្នែកច្នៃម៉ូដគ្រឿងសង្ហារិមផងដែរ ៕
ចែករំលែកព័តមាននេះ