រាជធានីភ្នំពេញ ៖ មន្ត្រីធំៗជាច្រើនរូប រួមទាំងអ្នកសិល្បៈ និងមហាជនមួយចំនួនបានផ្ទុះប្រតិកម្ម និងព្រលះ
ចំៗទៅលើបណ្ឌិតច្នៃម៉ូដ លោក ឯម រៀម ដែលបានបង្ហោះសាររិះគន់រឿងបេះដូងប្រដាសចំនួន១លាន ដែលជាផ្នែកមួយនៃយុទ្ធនាការ BeyondTheGames ឬលើសពីការប្រកួត បង្កើតការបំបែកឯតទគ្គកម្ម «បេះដូងច្រើនជាងគេលើពិភពលោក» ដើម្បីផ្សារភ្ជាប់ពលរដ្ឋខ្មែរ ទៅនឹងភាពជាម្ចាស់ផ្ទះ និងដើម្បបង្ហាញពីក្ដីស្រឡាញ់ក្នុងការគាំទ្រដល់កីឡាករ កីឡាការិនី ។ ការបំបែកឯតទគ្គកម្មនេះ នឹងបត់បេះដូងឱ្យបាន ១លានបេះដូង និងត្រូវបានរៀបចំនៅមុខប្រាសាទអង្គរវត្ត។
ដើមចមនៃប្រតិកម្មរបស់មន្ត្រីធំៗធ្វើឡើងជាបន្តបន្ទាប់ ក្រោយពីលោក លោក ឯម រៀម បានបង្ហោះរូបភាពបេះដូងក្រដាសចំនួន១លានបេះដូងនៅមុខអង្គរវត្ត អមនឹងសំណេររិះគន់ធ្ងន់ៗថា «១លាន បេះដូងក្លែងក្លាយ បើថវិការដ្ឋ សូមចូលរួមសោកស្តាយ តែបើជាទឹកចិត្តរបស់បងប្អូន មិនគួរធ្វើនៅទីនេះ»។
ភ្លាមៗក្រោយបង្ហោះសារវាយប្រហាររឿង «បេះដូង ១លាន» នេះ លោកជំទាវ បាន ស្រីមុំ ដែលជាអភិបាលខេត្តប៉ៃលិន ក៏បានផ្ទុះប្រតិកម្មដោយលោកជំទាវលើកទៅកាន់លោក ឯក រៀម ថា «សូមជំរាបលោក ឬលោកស្រីប្អូនថា នៅក្នុងចំណោមបេះដូងពិត ១លាននេះ ក៏មានបេះដូងខ្ញុំ កូនៗ យុវជនខ្ញុំ បងប្អូនមន្ត្រីរាជការរបស់ខ្ញុំដែរ គឺជាបេះដូងចេញពីចិត្តពិតៗ ដោយក្តីគោរពស្រលាញ់ពីបេះដូងពិតៗសូមជ្រាប»។
ជាមួយគ្នានោះ ឯកឧត្តម ហ៊ុយ វណ្ណៈ រដ្ឋលេខាធិការក្រសួងមហាផ្ទៃ និងជាប្រធានសហភាពសហព័ន្ធអ្នកសារព័ត៌មានកម្ពុជា ក៏បានបញ្ចេញទស្សនៈទៅលោក ឯម រៀមថា «ប្អូន EM Riem ! ប្អូនគួរលុបសារប្អូនចោលក៏ល្អដែរ។ ប្អូនកុំបំផ្លាញខ្លួនឯង និងជាតិឯងលើចំណុចនេះ! ប្អូនគួរបើកចិត្តទូលាយ និងលើកទឹកចិត្ត ដល់ការខិតខំប្រឹងប្រែងដ៏ថ្លៃថ្នូរ និងការចូលរួមដោយមិនខ្លាចការនឿយហត់ របស់ប្រជាជនយើងរាប់ម៉ឺនលាននាក់ ក្នុងការផ្សព្វផ្សាយកិត្យានុភាព និងកិត្តិនាមដ៏អស្ចារ្យរបស់មាតុភូមិយើង នៅលើឆាកអន្តរជាតិ »។
ចំណែកលោក ណាន វីសារ តារាចម្រៀងស្រស់សង្ហាមួយរូប ក៏បានចេញមុខប្រលះ ឯម រៀម យ៉ាងចាស់ដៃ ក្រោយបណ្ឌិតច្នៃម៉ូដ ហ៊ាននិយាយពាក្យទាំងនេះដាក់បេះដូងក្រដាសនៅមុខប្រាសាទអង្គរវត្ត។ ប្រាកដណាស់ កាលពីពេលកន្លងទៅថ្មីៗនេះ ទើបតែត្រូវមហាជននាំគ្នាចេញមុខមកផ្ទុះប្រតិកម្មរិះគន់យ៉ាងចាស់ដៃរឿងច្នៃឈុតដែលមនុស្សភាគច្រើនថាមិនអាចទទួលយកបាននោះ ស្រាប់តែពេលថ្មីៗនេះអ្នកច្នៃម៉ូដល្បីឈ្មោះ លោក ឯម រៀម ត្រូវមួយឈុតធំ មួយទំហឹងសាជាថ្មីម្ដងទៀត ។
ដោយមានពុកម៉ែបងប្អូន ក៏ដូចជាមហាជនរិះគន់មិនតិចអ្នកនោះឡើយ សម្រុករិះគន់ដាក់ទៅចំៗយ៉ាងចាស់ដៃក្រោយ ពេលប្រទះឃើញអ្នកច្នៃម៉ូដលោក ឯម រៀមរូបនេះ នៅសុខៗលោកបែរជាបង្ហោះសារនៅលើគណនីហ្វេសបុកផេកផ្ទាល់ខ្លួនរបស់លោក រិះគន់ធ្ងន់ៗលើរូបបត់បេះដូងនៅពីមុខប្រាសាទអង្គរវត្ត។
ដោយសារតែទើសចិត្តខ្លាំងពេក តារាចម្រៀងប្រុសវ័យក្មេងលោក ណាន វីសារ ចេញមុខប្រតិកម្មភ្លាម ដោយលោកបានបង្ហោះសារព្រលយទៅវិញ និងថែមទាំងបាននិយាយបោះសម្ដីទាំងនេះទៅថា “ក្នុងនាមខ្ញុំជាជនជាតិខ្មែរមួយរូបដែលបានចូលរួមបត់បេះដូង ក៏ដូចជាប្រជាពលរដ្ឋខ្មែរដែលបានចូលរួមបត់រាប់សែននាក់ ពិតជាមានការសោកស្តាយនូវទស្សនៈរបស់លោកខ្លាំងណាស់ យើងធ្វើវាដើម្បីមុខមាត់ប្រទេសយើងមិនមែនគ្រាន់ជាសម្តែងថាស្នេហា និង ស្រឡាញ់ជាតិ តែលើបបូរមាត់ជនមួយក្រុមតូចប៉ុណ្ណោះទេ។
មើលទៅលោកមិនមែនកំពុងរិះគន់ ដើម្បីកែលម្អនោះទេគឺច្បាស់កំពុងជាន់ពន្លិចនូវការខិតខំរបស់បងប្អូនដែលខិតខំប្រឹងប្រែង ដើម្បីបង្ហាញទៅកាន់ពិភពលោក ថាខ្មែរខ្លាំង ខ្មែរអាចធ្វើបាន»។ ពេលបានឃើញសារCaption ដែលលោកឯម រៀម បង្ហោះដោយបានភ្ជាប់ជាមួយរូបភាពប៉ុន្មានសន្លឹកនិយាយទាំងគ្មានចេះគិតមិនទាន់បានប៉ុន្មានផង ក៏មានមហាជនទាំងប្រុសទាំងស្រីដែលនិយមលេងនៅក្នុងបណ្ដាញទំនាក់ទំនងសង្គមហ្វេសបុកជាច្រើនចេញមុខមកដាក់ផាំងៗទៅវិញទាំងក្ដៅឆេវ និងបាននាំគ្នាចូលទៅខមិនថា«កោតតែនិយាយចេញទៅរួច អ្នកឯងជាខ្មែរដែរទេ? ទម្រាំបានប៉ុណ្ណេសទឹកចិត្តបងប្អូនខ្មែរយើងមិនតិចនាក់ទេដែលបានចូលរួមបត់»«ថារបស់គេក្លែងក្លាយ? ការច្នៃម៉ូតរបស់បងទើបចេញពីបេះដូងពិតមែនបង? តែខ្ញុំថាទោះយ៉ាងណាក៏គេរៀបចំបានស្អាត ប្លែកម្យ៉ាង គ្រាន់តែទីតាំងអាចប្រឈមខ្យល់ ភ្លៀង ធ្វើអោយខូច តែបើគិតថាដាក់កន្លែងផ្សេង តើកន្លែងណាសាកសមបំផុត?
សំរាប់ខ្ញុំកន្លែងនឹងល្អហើយពេលថតនឹងជាប់ប្រាសាទ ទាំងប្រជាជនខ្មែរ និង បរទេសថតចែកចាយ បានផ្សព្វផ្សាយ ប្រាសាទអង្គរយើងទៀត» « ទោះកន្លែងនេះហានិភ័យ អាចធ្វើអោយខូចខាត តែផលប្រយោជន៍មានច្រើនជាង»«ចេញមកអោយតែគេជេរ រួចតាំងចេញវីដេអូយំល្ហេមល្ហាម គេគ្រប់គ្នាខំណាស់ទំរាំបានចេញជារូបរាង ចេញមកតែប៉ាភ្លេីចេះឯងបានគេជេរមិនខុសនោះ»«ខ្ញុំកំពុងតែមានអារម្មណ៍ថាមោនភាពនិងកោតសសើរបងប្អូនដែរគាត់បានរួមចំណែកធ្វើសកម្មភាពទាំងអស់នេះត្រូវការក្ដីស្រលាញ់ភាពអត់ធ្មត់ណាស់ទំរាំបានស្អាតថ្នាក់នេះហេតុអ្វីបានជាបងនិយាយបែបនេះចេញមក? ទោះវាជាបេះដូងក្រដាស តែអ្នកបត់ធ្វើចេញពីបេះដូងពិត»។
មិននៅស្ងៀម ក្រោយឃើញប្រតិកម្មដូចទឹកបាក់ទំនប់នោះ ស្រាប់តែលោកឯម រៀម ក៏ កែខ្លឹមសារនៃការបង្ហោះរបស់លោកវិញ ដោយលោកកែមកថា «១លាន បេះដូងចំរុះពណ៌» វិញ៕
ចែករំលែកព័តមាននេះ