មហាសង្រ្កាន្តឆ្នាំថោះ បញ្ចាស័កជិតចូលមកដល់ហើយ មកដឹងរណ្តាប់ទទួលទេវតាទាំងអស់គ្នា!
- ភ្នំពេញ
រាជធានីភ្នំពេញ ៖ មហាសង្ក្រាន្តឆ្នាំថោះ បញ្ចាស័ក ពុទ្ធសករាជ ២៥៦៧ គ្រិស្តសករាជ ២០២៣ តាមការគណនា ឆ្នាំថោះឥឡូវនេះ…
រាជធានីភ្នំពេញ ៖ មហាសង្ក្រាន្តឆ្នាំថោះ បញ្ចាស័ក ពុទ្ធសករាជ ២៥៦៧ គ្រិស្តសករាជ ២០២៣ តាមការគណនា ឆ្នាំថោះឥឡូវនេះ…
រាជធានីភ្នំពេញ ៖ មហាសង្ក្រាន្តឆ្នាំថោះ បញ្ចាស័ក ពុទ្ធសករាជ ២៥៦៧ គ្រិស្តសករាជ ២០២៣ តាមការគណនា ឆ្នាំថោះឥឡូវនេះ សង្ក្រាន្តចូលនៅថ្ងៃសុក្រ ៩រោច ខែចេត្រ ត្រូវនឹងថ្ងៃទី១៤ ខែមេសា វេលាម៉ោង១៦៖០០នាទី (ឬវេលាម៉ោង៤រសៀល)។
ពេលនោះព្រះអាទិត្យចេញពីមីនរាសីទៅឋិតនៅឯមេសរាសីតាមផ្លូវគោវិថី គឺផ្លូវកណ្តាលមានទេវធីតាមួយព្រះអង្គជា មគ្គនាយិកាព្រះនាម កិមិរាទេវី ជារាជបុត្រីទី៦ នៃកបិលមហាព្រហ្មគង់នៅចាតុម្មហារាជិកា ទ្រង់អម្ពរពណ៌សេត (ស) លម្អនៅព្រះកាណ៌ដោយសៀតផ្កាចង្កុលណី អភរណៈបុស្សរាគ័ម ភក្សាហារទ្រង់ចេកណាំវ៉ា ព្រះហស្តស្តាំទ្រង់ ព្រះខ័ន្ត ព្រហស្តឆ្វេងទ្រង់ពិណ ទ្រង់គង់អង្គុតពាក់ឆៀងបើកព្រះនេត្រនៅលើខ្នង មហឹង្សា (ក្របី) ជាយានពាហនៈ។
សូមជម្រាបជូនបងប្អូនថា ពេលវេលាមហាសង្ក្រាន្តឆ្នាំថោះ បញ្ចស័កឆ្នាំ២០២៣ នឹងចូលឆ្នាំនៅវេលាម៉ោង៤ល្ងាច ជាពេលល្ងាចត្រជាក់ចូលដល់សិរី ជាពេលសួស្តីរីករាយគ្រប់គ្នា ។
យ៉ាងណាមិញ ពុកម៉ែបងប្អូនពិតជាចង់ដឹងហើយថា ឆ្នាំថោះបញ្ចស័ក តើរណ្តាប់ទទួលទេវតាមានអ្វីខ្លះ ។ យោងតាមសៀវភៅ មហាសង្ក្រាន្ត ឆ្នាំថោះ បញ្ចស័ក ពុទ្ធសករាជ ២៥៦៧ គ្រិស្តរាជ ២០២៣ របស់ឯកឧត្តម អ៊ឹម បូរិន្ទ អ្នកស្រាវជ្រាវវិជ្ជាហោរាសាស្ត្រខ្មែរ ចិន សកល បានឱ្យដឹងថា«រណ្ដាប់ទទួលទេវតាតាមទំនៀមពីបុរាណរៀងរហូតមកត្រូវរៀបរានទទួលទេវតានៅខាងមុខផ្ទះមួយសម្រាប់តាំងគ្រឿងពលីការផ្សេងៗ។
បន្ទាប់មក គឺត្រូវរៀបក្រាលសំពត់ពណ៌ស ហើយរៀបចំនូវគ្រឿងសក្ការបូជា ទេវតាមានជាអាទិ៍បាយសី ៩ថ្នាក់មួយគូបាយសី ៧ថ្នាក់មួយគូបាយសី ៥ថ្នាក់មួយគូបាយសី ៣ថ្នាក់មួយគូ បាយសីប៉ាឆាមមួយគូ ស្វាធម៌មួយគូ ទឹកអប់មួយគូ ទៀន៥ ធូប៥ លាច៥ ផ្កា៥ ដាក់លើជើងពាន១គូ ចេកនួនចេកណាំវ៉ាដាក់លើជើងពានមួយគូ ផ្លែឈើ១១មុខ (១រៀបដាក់ជើងពាន១១គូ ដូងឡៅមួយគូ ទឹក ស្អាតពីរកែវ។ ស្រេចហើយនៅវេលាម៉ោងដែលទេវតាចុះមកត្រូវជួបប្រជុំក្រុមគ្រួសារ ដើម្បីថ្វាយបង្គំព្រះនមស្សការព្រះរតនៈត្រ័យ សមាទានសីល ហើយតាំងចិត្តឱ្យបានស្អាតបរិសុទ្ធ ជ្រះស្រឡះនូវមន្ទិលទាំងពួង តម្កល់ ចិត្តរំពឹង គិតទៅលើព្រះពុទ្ធ ព្រះធម៌ ព្រះសង្ឃជាទីពឹងទីរឮក លុះចប់ពិធីទទួលទេវតា។
ចំពោះបាយសី៩ថ្នាក់៧ថ្នាក់ ជាទំនៀមមានចែងនៅក្នុងសៀវភៅព្រះរាជពិធីទ្វារទសមាស និងមានអនុវត្តនៅព្រះបរមរាជវាំង តែចំពោះប្រជារាស្ត្រគួរធ្វើត្រឹម៥ថ្នាក់ចុះមក ឬរៀបត្រឹមគ្រឿងសក្ការបូជាដល់មានទៀន ធូបប្រាំស្វាធម៌កូនចេកមួយគូក៏ល្មមសមគួរដែរ។
ចំពោះផ្លែឈើសម្រាប់ប្រជារាស្ត្រគួររៀបឱ្យបានត្រឹម៣ ឬ៥មុខក៏ជាការប្រសើរ គឺរៀបទៅតាមធនធានរបស់ខ្លួន ។ នៅគ្រប់ដង្វាយទាំងអស់ត្រូវដាក់ផ្កាម្លិះភួងពីលើគ្រប់ដង្វាយនៅលើជើងពាន និងលើបាយសីត្រូវដោតទៀនហើយដុតបំភ្លឺ៕
ចែករំលែកព័តមាននេះ