ភ្ញៀវទេសចរជិះទូកមើលអំពិលអំពែកចាប់ផ្ដើមកើនឡើងវិញ
ខេត្តកំពត ៖ អ្នកផ្ដល់សេវាកម្មជិះទូកមើលអំពិលអំពែកពេលរាត្រីនៅខេត្តកំពត បានអះអាងថា
ខេត្តកំពត ៖ អ្នកផ្ដល់សេវាកម្មជិះទូកមើលអំពិលអំពែកពេលរាត្រីនៅខេត្តកំពត បានអះអាងថា ភ្ញៀវទេសចរចាប់ផ្ដើមមានកំណើនឡើងវិញ បន្ទាប់ពីស្ងប់ស្ងាត់មួយរយៈ ក្រោយពីមានឧបទ្ទវហេតុទូកបុកគល់ឈើលិច បណ្ដាលឲ្យមានអ្នកស្លាប់កាលពីប៉ុន្មានខែមុន ។
ម្ចាស់ទូក Lovely Boat លោក អុិត សារី បានឲ្យដឹងថា ដោយសារតែមើលឃើញពីកំណើនភ្ញៀវទេសចរជាតិ និងអន្តរជាតិមកទស្សនានៅទឹកដីខេត្តកំពត ពីមួយថ្ងៃទៅមួយថ្ងៃចេះតែកើនឡើងជាហូរហែ ពិសេសការជិះទូកមើលអំពិលអំពែក និងគយគន់ទេសភាពកំពុងពេញនិយម លោកក៏បានបើកសេវាកម្មនេះ ដោយទទួលបានចំណូលគួរសម ។
លោកបន្ដថា ៖« ក្នុង១ថ្ងៃ ខ្ញុំដឹកភ្ញៀវប្រហែល៥០នាក់ ដោយក្នុង១នាក់សម្រាប់ភ្ញៀវជាតិ តម្លៃ១ម៉ឺនរៀល និងបរទេសតម្លៃ៥ដុល្លារ ។ បើគិតពីចំណូលក្នុង១ខែ ខ្ញុំអាចរកបានប្រហែល២ទៅ៣លានរៀលដែរ ប៉ុន្ដែត្រូវចំណាយច្រើនទៅលើប្រេងសាំង និងបុគ្គលិក ដែលអាចសល់បន្ដិចបន្ដួចសម្រាប់ផ្គត់ផ្គង់គ្រួសារ» ។
លោក សារី បន្តទៀតថា ៖« ទោះបីជាសេវានេះអាចថាថ្លៃបន្តិចមែន ប៉ុន្តែភ្ញៀវដែលបានជិះទូកកម្សាន្ត ពួកគាត់អាចទស្សនាទេសភាពតាមដងព្រែក គយគន់ថ្ងៃលិច ជាពិសេស ចាប់ពីម៉ោងប្រហែល៧យប់ទៅ យើងអាចមើលអំពិលអំពែកនៅតាមដងព្រែកខេត្តកំពតបានយ៉ាងប្លែកភ្នែក វាជាក្ដីបំណងរបស់ភ្ញៀវដែលគាត់មកជិះទូកកម្សាន្តពេលរាត្រី»។ លោកថា ៖« ខ្ញុំមានចិត្តសប្បាយរីករាយ និងពេញចិត្តយ៉ាងខ្លាំងក្នុងការបើកមុខរបរមួយនេះ ព្រោះវាជារបរសុចរិត និងមានពេលសប្បាយជាមួយភ្ញៀវជារៀងរាល់ថ្ងៃ ទោះបីចំណូលបានតិចតួចក៏ដោយ » ។
កញ្ញា ថន លីលី ដែលបានជិះទូកកម្សាន្ដនាពេលរាត្រីកាលពីថ្ងៃទី១៣ តុលា កន្លងទៅ បានប្រាប់ថា ៖« ខ្ញុំចូលចិត្តមកជិះទូកលេងពេលដែលខ្ញុំមានអារម្មណ៍ធុញថប់ និងពេលទំនេរពីការសិក្សា ហើយពេលខ្លះជួបជុំមិត្តភក្តិចាស់ៗម្ដងម្កាល » ។
កញ្ញាបន្តថា ៖« សម្រាប់តម្លៃអាចថា ថ្លៃគួរសមដែរ ព្រោះអីការជិះទូកនេះ គឺយើងអាចមើលទេសភាពបានគ្រប់ជ្រុងជ្រោយតាមដងព្រែក ស្រូបខ្យល់អាកាសបរិសុទ្ធ ហើយអ្វីដែលប្លែកភ្នែកនោះ គឺបានមើលអំពិលអំពែកពេលយប់ទៀតផង » ។
អ្នកលក់សំបុត្រទូក lovely Boat បាននិយាយថា ជារៀងរាល់ថ្ងៃ ទូកចេញដំណើរនៅម៉ោង៥និង៣០នាទីល្ងាច រហូតដល់ម៉ោង៧យប់ ដែលមានអាហារ និងភេសជ្ជៈសម្រាប់ទទួលទាននៅលើទូក ក្នុងតម្លៃសមរម្យបំផុត ។
បើតាមប្រធានមន្ទីរទេសចរណ៍ខេត្តកំពត បញ្ជាក់ថា មុននឹងទូកទេសចរណ៍អាចដំណើរការបាន ទូកនីមួយៗត្រូវតែបំពេញសំណុំបែបបទតាមលក្ខខណ្ឌរបស់មន្ទីរពាក់ព័ន្ធជាមុនសិន ដូចជា៖ ត្រូវមានឈៀក(លក្ខណៈបច្ចេកទេសទូក) ដែលចេញដោយមន្ទីរសាធារណការ និងដឹងជញ្ជូនខេត្ត ។ ទូកដឹកភ្ញៀវទេសចរធំៗ មិនអាចផ្ទុកភ្ញៀវលើសពី៤៥នាក់បានឡើយ។ ត្រូវសុំអាជ្ញាប័ណ្ណពីមន្ទីរទេសចរណ៍ខេត្តឲ្យបានត្រឹមត្រូវជាមុនសិន ដើម្បីមន្ទីរធ្វើការត្រួតពិនិត្យមុននឹងបម្រើសេវាកម្មដឹកភ្ញៀវ ៕
ចែករំលែកព័តមាននេះ