សមត្ថកិច្ចចម្រុះ ចុះត្រួតពិនិត្យទំនិញខូចគុណភាព
ខេត្តបន្ទាយមានជ័យ ៖ មនុស្សកើតមានជំងឺ គឺបណ្តាលមកពីចំណីអាហារ ដូច្នេះចំណីអាហារ
ខេត្តបន្ទាយមានជ័យ ៖ មនុស្សកើតមានជំងឺ គឺបណ្តាលមកពីចំណីអាហារ ដូច្នេះចំណីអាហារ ទន្ទឹមនឹងឲ្យមនុស្សរស់ ក៏ជាកត្តាបង្កឲ្យមនុស្សកើតមាននូវជំងឺផ្សេងៗផងដែរ នាពេលបច្ចុប្បន្ននេះ។ ដើម្បីលើកកម្ពស់នូវគុណភាពចំណី អាហារបានល្អប្រសើរនោះ នៅថ្ងៃទី១៦ ខែតុលា ឆ្នាំ២០១៧ម្សិលមិញនេះ មន្ត្រីជំនាញកាំកុងត្រូល សហការណ៍ជាមួយកម្លាំងនគរបាលប្រឆាំងបទល្មើសសេដ្ឋកិច្ច និងមន្ត្រីមន្ទីរពាណិជ្ជកម្មខេត្តបន្ទាយមានជ័យ ចានចុះធ្វើការត្រួតពិនិត្យទំនិញខូចគុណភាពទំនិញហួសកាលបរិច្ឆេទ និងផ្សព្វផ្សាយណែនាំដល់អាជីវករលក់ដូរ នៅផ្សារគុត្តសត ស្រុកអូរជ្រៅ ខេត្តបន្ទាយមានជ័យ កុំឲ្យលក់ដូរនូវចំណីអាហារខូចគុណភាព ដូចជាគ្រឿងកំប៉ុងក្រពឹតប៉ោងអាចមានច្រេះ ទំនិញហួសកាលបរិច្ឆេទប្រើប្រាស់ គ្មានស្លាកសញ្ញាត្រឹមត្រូវ និងក្លែងក្លាយជាដើម។
លោក ហុង លៀង អនុប្រធានសាខាកាំកុងត្រូល ខេត្តបានឲ្យដឹងថា៖ ការចុះត្រួតពិនិត្យ និងចុះផ្សព្វផ្សាយអប់រំណែនាំ ដល់អាជីវករលក់ដូរនៅផ្សារគុត្តសតនេះ ឲ្យគាត់បានយល់ដឹងអំពីកាលបរិច្ឆេទទំនិញ ឬចំណីអាហារដែលហួសកាលកំណត់ ទំនិញ ឬចំណីអាហារខូចគុណភាព និងទំនិញក្លែងក្លាយ មុននឹងឈានដល់ការផាកពិន័យ និងអនុវត្តតាមវិធានការរដ្ឋបាលតាមផ្លូវច្បាប់ ដែលតម្រូវឲ្យដកហូតយកទៅកម្ទេចចោល ដោយអនុវត្តតាមការណែនាំរបស់អគ្គនាយកដ្ឋានកាំកុងត្រូលកម្ពុជា។លោកអនុប្រធានក៏បានបញ្ជាក់ថា៖ ក្នុងការចុះប្រតិបត្តិការនៅក្នុងផ្សារគុត្តសតនឹងបន្តចុះត្រួតពិនិត្យផ្សារកូនដំរី សង្កាត់និមិត្ត ក្រុងប៉ោយប៉ែត មន្ត្រីជំនាញចម្រុះ បានរកឃើញ និងដកហូតនូវទំនិញខូចគុណភាពមួយចំនួន និងហាមឃាត់មិនឲ្យបន្តលក់តទៅទៀត ព្រមទាំងឲ្យធ្វើកិច្ចសន្យាផងដែរ។
ក្នុងឱកាសនោះដែរមន្ត្រីជំនាញបានធ្វើការផ្សព្វផ្សាយ និងអំពាវនាវដល់ប្រជាពលរដ្ឋទាំងអស់ មុននឹងទិញទំនិញចំណីអាហារ ត្រូវពិនិត្យឲ្យបានច្បាស់លាស់ជាមុនសិន អំពីគុណភាព កាលបរិច្ឆេទ និងការវេចខ្ចប់មិនត្រឹមត្រូវ ព្រោះវាអាចប៉ះពាល់ដល់សុខភាពរបស់យើង។ ជាងនេះទៀតមន្ត្រីជំនាញកាំកុងត្រូល បានធ្វើបទបង្ហាញអាជីវករទាំងអស់ អំពីវិធីសាស្ត្រនៃការថែរក្សា ដាក់តាំងលក់តាមលក្ខណៈត្រឹមត្រូវ និងមានអនាម័យរាល់ទំនិញ ចំណីអាហារ។ បើតាមការវាយតម្លៃពីមន្ត្រីជំនាញ ឃើញថាអាជីវករមួយចំនួន គាត់បានយល់ច្រើន ហើយបានអនុវត្តតាមការណែនាំរបស់មន្ត្រីជំនាញកន្លងមក៕
ចែករំលែកព័តមាននេះ