គីសក្រពេញគល់រោម (Kyste Sébacé) គឺជាប្រភេទគីស ដែលកើតឡើងដោយមានការកកស្ទះរន្ធរបស់ក្រពេញបញ្ចេញសារធាតុខ្លាញ់ម្យ៉ាង (Accumulation de sébum sous la peau) ដែលស្ថិតជាប់ជាមួយរោមលើស្បែកនៃរាងកាយខ្លួនយើង ជាពិសេស
រាជធានីភ្នំពេញ ៖ គីសក្រពេញគល់រោម (Kyste Sébacé) គឺជាប្រភេទគីស ដែលកើតឡើងដោយមានការកកស្ទះរន្ធរបស់ក្រពេញបញ្ចេញសារធាតុខ្លាញ់ម្យ៉ាង (Accumulation de sébum sous la peau) ដែលស្ថិតជាប់ជាមួយរោមលើស្បែកនៃរាងកាយខ្លួនយើង ជាពិសេសលើខ្នង។ នេះជាការលើកឡើងរបស់លោកវេជ្ជបណ្ឌិត ប្លោក វុឌ្ឍី ឯកទេសវះកាត់ប្រព័ន្ធរំលាយអាហារនៃមន្ទីរពេទ្យកាល់ម៉ែត ។
លោកវេជ្ជបណ្ឌិត ប្លោក វុឌ្ឍី បានឲ្យដឹងទៀតថា ៖
ក) មូលហេតុ ៖ ការកកស្ទះនេះ បង្កឡើងដោយមេរោគ ក្អែល ឬក៏ធូលី និងកំទេចកំទីល្អិតៗផ្សេងៗ ដែលជាប់នៅលើរាងកាយ និងកត្តារួមផ្សំដទៃទៀត ដូចជាស្ត្រេស កំដៅព្រះអាទិត្យ ការជក់បារីជាដើម ។
ខ) រោគសញ្ញា ៖ កើតឡើងមានលក្ខណៈដូចជា កន្ទួលលើស្បែក រឹងពណ៌សឬលឿង។ ក្នុងដំណាក់កាលដំបូង វាមិនបង្កឱ្យឈឺចាប់អ្វីទេ ក៏ប៉ុន្តែពេលគ្មានការថែទាំ និងព្យាបាលត្រឹមត្រូវ ដុំគីសនេះនឹងវិវត្តន៍ទៅជាកន្ទួលក្រហមធំឡើងៗ និងមានសភាពឈឺចាប់ ហើយករោគ ឬធ្លាយហូរទឹករងៃ អាចមានក្លិនស្អុយចេញមកក្រៅ។
គ) ការព្យាបាល ៖ វិធីព្យាបាលប្រែប្រួលទៅតាមការវិវត្តន៍របស់គីស ៖
១- ករណីគីសនៅតូចជាង១សង់ទីម៉ែត្រ មិនមានការរំខាន ឬឈឺចាប់ គេអាចតាមដានមួយរយៈសិនបានដោយគ្រាន់តែសម្អាតរាងកាយដោយសាប៊ូធម្មតាកុំអោយរលាក និងបង្កររោគ (infection et puis abcès ) និង តាមដាន។
២- ករណីរីកធំត្រូវព្យាបាលដោយវះកាត់យកចេញអោយបានទាំងមូល កុំអោយរហែកស្រោមព្រោះវានឹងអាចកើតឡើងវិញ។
៣- ក្នុងករណីមានការរលាក និងឡើងអាប់សែរ (Abcès) គេត្រូវព្យាបាលដោយវិធីវះកាត់យកចេញ និងចំហរមុខរបូស លាងសំអាតរូតអស់ខ្ទុះនិងប្រើប្រាស់ថ្នាំសំលាប់មេរោគបន្ថែម រួចអាចដេរផ្ជិតមុខបន្ថែមទៀត។
ឃ) ការការពារ ៖
១- ត្រូវអនាម័យខ្លួនប្រាណដោយការលាង ជម្រះក្អែល ឬភាពកខ្វក់ក្រោយពីបញ្ចប់ការងារប្រចាំថ្ងៃ
២- មិនត្រូវស្លៀកពាក់តឹងចង្ទៀតពេក
៣- ព្យាយាមជ្រើសរើសយកក្រណាត់ ឬសម្លៀកបំពាក់ណា ដែលអាចជួយឲ្យស្បែកមានខ្យល់ចេញចូលបានស្រួល មិនធ្វើឲ្យក្តៅស្អុះស្អាបដល់ស្បែករបស់យើងទេ។
លោកវេជ្ជបណ្ឌិត ប្លោក វុឌ្ឍី ឯកទេសវះកាត់ប្រព័ន្ធរំលាយអាហារនៃមន្ទីរពេទ្យកាល់ម៉ែតបានបញ្ជាក់ថា ៖ ប្រសិនបើលោក លោកស្រីមានបញ្ហាប្រឈមដូចខាងលើនេះ សូមមេត្តាប្រញាប់មកពិគ្រោះជាមួយក្រុមការងារវេជ្ជបណ្ឌិតឯកទេសជំនាញនៃមន្ទីរពេទ្យកាល់ម៉ែត ដើម្បីទទួលបានរោគវិនិច្ឆ័យ និងវិធីសាស្ត្រនៃការព្យាបាលឲ្យបានឆាប់រហ័ស ប្រសិទ្ធភាពខ្ពស់ ៕
ចែករំលែកព័តមាននេះ