អាមេរិកប្រុងប្រៀបទុកជម្លៀសគ្រួសារយោធាចេញពីកូរ៉េ
ទីបញ្ជាការយោធាអាមេរិកនៅកូរ៉េរាយការណ៍នាថ្ងៃទី១៦ តុលា ថា
សហរដ្ឋអាមេរិក-ប្រទេសកូរ៉េខាងត្បូង ៖ ទីបញ្ជាការយោធាអាមេរិកនៅកូរ៉េខាងត្បូងរាយការណ៍នាថ្ងៃទី១៦ តុលា ថា ខ្លួននឹងធ្វើសមយុទ្ធមួយ ដើម្បីរៀបចំសម្រាប់ការជម្លៀសបណ្តាគ្រួសារយោធា ព្រមទាំងបុគ្គលិកស៊ីវិលចេញពីប្រទេសនេះ ។
យោងតាមមន្ទីរប៉ង់តាហ្គោនថា នេះជាសមយុទ្ធដោយទៀងទាត់មួយ ក៏ប៉ុន្តែទូរទស្សន៍កូរ៉េខាងត្បូង YTN គូសបញ្ជាក់ថា តាមធម្មតាកងយោធាអាេមរិកពុំដែលរាយការណ៍ពីព្រឹត្តិការណ៍បែបនេះឡើយ ។ ទូរទស្សន៍ YTN រៀបរាប់ថា ទីបញ្ជាការយោធាអាេមរិកនៅកូរ៉េខាងត្បូងបានផ្តល់ព័ត៌មានពីការធ្វើសមយុទ្ធបែបនេះ ដែលចូលរួមដោយបណ្តាគ្រួសារយោធា សម្រាប់រៀបចំពួកគេក្នុងការជម្លៀសចេញពីកូរ៉េខាងត្បូងក្នុងករណីមានសភាពការណ៍បន្ទាន់ ។
តាមទីបញ្ជាការនេះថា សមយុទ្ធមានឈ្មោះថា COURAGEOUS CHANNEL ជាមួយការចូលរួមរបស់ក្រសួងការពារប្រទេសកូរ៉េខាងត្បូង និងក្រសួងការបរទេសអាេមរិកនឹងប្រព្រឹត្តទៅពីថ្ងៃទី២៣ ទៅ២៧ តុលា ។ ក្នុងក្របខណ្ឌនៃសមយុទ្ធនេះ បណ្តាកងយោធា និងគ្រួសារពួកគេនឹងត្រៀមខ្លួនធ្វើសកម្មភាពក្នុងករណីមានព្រឹត្តិការណ៍ផ្សេងៗ ក្នុងនោះរួមមានការគ្រប់គ្រងវិបត្តិ ហើយជាពិសេសការជម្លៀសចេញបុគ្គលិកស៊ីវិលក្នុងករណីមានគ្រោះមហន្តរាយធម្មជាតិ ឬគ្រោះមហន្តរាយបង្កឡើងដោយសកម្មភាពរបស់មនុស្ស ។
កងយោធាអាមេរិកនិយាយម្យ៉ាងទៀតថា នេះជាសមយុទ្ធដោយទៀងទាត់មួយ ដែលពុំទាក់ទិននឹងសភាពការណ៍បច្ចុប្បន្ននៅឧបទ្វីបកូរ៉េឡើយ ។
ទោះបីយ៉ាងណា ទូរទស្សន៍ YTN គូសបញ្ជាក់ថា ទីបញ្ជាការយោធាអាេមរិកនៅកូរ៉េខាងត្បូងជាទូទៅពុំដែលចេញការប្រកាសជាសាធារណៈអំពីកាលបរិច្ឆេទនៃសមយុទ្ធដូចជាសមយុទ្ធ COURAGEOUS CHANNEL នេះជាដើមឡើយ ។
នាថ្ងៃទី១៦ តុលា កងនាវាចម្បាំងអាមេរិក និងកូរ៉េខាងត្បូងចាប់ផ្តើមធ្វើសមយុទ្ធជើងទឹកដ៏ធំមួយនៅជិតឆ្នេរសមុទ្រនៃឧបទ្វីបកូរ៉េ ដែលសមយុទ្ធនេះបន្តរហូតដល់ថ្ងៃទី២៦ តុលា ។
ក្រុងព្យុងយ៉ាងបានថ្កោលទោសយ៉ាងម៉ឺងម៉ាត់ចំពោះរាល់សមយុទ្ធយោធារួមរបស់ក្រុងវ៉ាស៊ីនតោន និងក្រុងសេអ៊ូល ៕
ចែករំលែកព័តមាននេះ