ខេត្តកំពង់ឆ្នាំង ៖ ត្រីចិញ្ចឹមក្នុងបែជាច្រើនបែក្នុងភូមិចុងកោះ សង្កាត់ផ្សារឆ្នាំង ក្រុងកំពង់ឆ្នាំង បានពុលងា.ប់ជាបន្តបន្ទាប់ ចាប់តាំងពីថ្ងៃទី០១ រហូតដល់ថ្ងៃទី០៤ ខែមេសា ២០២៣ ។ ទោះយ៉ាងណា នៅថ្ងៃទី៥ ខែមេសា នេះ ស្ថានភាពក៏បានធូរស្រាលខ្លះហើយ បន្ទាប់ពីម្ចាស់បែត្រីបានប្រើវិធីដើម្បីជួយសង្គ្រោះត្រីរបស់ខ្លួន។ នេះបើតាមការបញ្ជាក់របស់មន្ត្រីជំនាញជលផលនៃមន្ទីរកសិកម្ម រុក្ខាប្រមាញ់ និងនេសាទខេត្តកំពង់ឆ្នាំង ។
លោក លី ឡា នាយខណ្ឌរដ្ឋបាលជលផលខេត្តកំពង់ឆ្នាំងបានឲ្យដឹងថា ត្រីពិតជាបានងា.ប់ចាប់ពីថ្ងៃទី១ ដល់ថ្ងៃទី ៤ ខែមេសា នេះពិតប្រាកដមែន ។ ប៉ុន្តែនៅថ្ងៃទី៥ ខែមេសា នេះ ស្ថានភាពបានធូរស្រាលហើយបន្ទាប់ពីក្រុមអ្នកចិញ្ចឹមត្រីទាំងនោះបានប្រើវិធីអូសបែត្រីរបស់ខ្លួនចុះឡើងៗ ដើម្បីឲ្យមានខ្យល់អុកស៊ីហ្សែនឡើងវិញ និងដើម្បីបំបាត់ក្លិនស្អុយ ដែលបណ្ដាលឲ្យត្រីពុល ។
ចំពោះមូលហេតុគឺបណ្ដាលមកពីមានភ្លៀងធ្លាក់ពីប៉ែកខាងលើ១មេ ហើយទឹកបានហូរនាំយកចំហាយក្តៅចុះចូលទន្លេ និងនាំក្លិនស្អុយមកជាមួយទើប បណ្ដាលឱ្យត្រីពុលងា.ប់អស់ជាច្រើនតោន ។
លោក លីឡា បញ្ជាក់ទៀតថា មិនទាន់ដឹងថា ចំនួនបែត្រីរបស់អ្នកភូមិចុងកោះ មានចំនួនប៉ុន្មាននោះទេ ប៉ុន្តែច្រើនអាចដល់រាប់រយបែត្រី ដែលបែត្រីនីមួយៗមានចិញ្ចឹមត្រីដូចជា ត្រីខ្យា ត្រីពោធិ៍ ត្រីសណ្ដាយ ត្រីឆ្ពិន ត្រីព្រលូង ត្រីខ្យាង និងត្រីប្រា ជាដើម ហើយក្នុងបែនីមួយៗមានត្រីចិញ្ចឹមចាប់ពី១តោន ដល់៦តោន ។ ចំណែកឯបែធំៗខ្លះទៀតមានពី២០ រហូតដល់៥០តោនឯណោះ ។
ចំពោះបរិមាណត្រីរងគ្រោះធម្មជាតិ ដែលបណ្តាលឱ្យងាប់ គឺក្នុងបែនីមួយៗងាប់អស់ប្រមាណពី១០ទៅ២០% ។ ក្រោយពីការណែនាំបច្ចេកទេសពីមន្ត្រីជំនាញ ក៏ដូចជាពួកគាត់ធ្លាប់ប្រើបានអូសបែត្រីចុះឡើងៗ តាមដងទន្លេ ដើម្បីបង្កើនឲ្យមានខ្យល់អុកស៊ីហ្សែនធ្វើឲ្យត្រីរបស់ពួកគាត់អាចស្ដារស្ថានភាពឡើងវិញបានហើយ ។
លោកបានបញ្ជាក់ថា បើស្ថានភាពធាតុអាកាសនៅតែបែបនេះ ម្ចាស់បែត្រូវចាំបាច់ត្រូវតែអូសបែត្រីរបស់ខ្លួនចុះឡើង ៗនេះបន្តទៀត ឬក៏ត្រូវដាក់ម៉ាស៊ីនបាញ់ខ្យល់បង្កើតអុកស៊ីហ្សែនក្នុងបែថែមទៀត រហូតដល់មានភ្លៀងធ្លាក់ទឹកត្រជាក់ឡើងវិញ ទើបស្ថានភាពល្អប្រសើរ ។
ចែករំលែកព័តមាននេះ