គេសង្កេតឃើញបន្លែម្ទេសហាវ៉ៃ និងបន្លែស្ពៃផ្កាស ព្រមទាំងស្ពៃខៀវ របស់ប្រជាកសិករម្នាក់ដែលដាំដុះជាលក្ខណៈបច្ចេកទេស ស្ថិតនៅភូមិភ្នំស្ពង់ ឃុំសាលាក្រៅ ស្រុកសាលាក្រៅ ខេត្តប៉ៃលិន មានការស្វិតស្រពោនបន្តិចម្តងៗ ដោយសារតែអាកាសធាតុក្តៅខ្លាំង ហើយក៏មានបញ្ហាជំងឺ
ខេត្តប៉ៃលិន ៖ រហូតមកដល់ថ្ងៃទី០៤ ខែមេសា ឆ្នាំ២០២៣នេះ គេសង្កេតឃើញបន្លែម្ទេសហាវ៉ៃ និងបន្លែស្ពៃផ្កាស ព្រមទាំងស្ពៃខៀវ របស់ប្រជាកសិករម្នាក់ដែលដាំដុះជាលក្ខណៈបច្ចេកទេស ស្ថិតនៅភូមិភ្នំស្ពង់ ឃុំសាលាក្រៅ ស្រុកសាលាក្រៅ ខេត្តប៉ៃលិន មានការស្វិតស្រពោនបន្តិចម្តងៗ ដោយសារតែអាកាសធាតុក្តៅខ្លាំង ហើយក៏មានបញ្ហាជំងឺក្រាស៊ីទៀត ខណៈម្ចាស់មិនទាន់ដឹង និងរិះរករបៀបកំចាត់ចោលនៅឡើយទេ។
បើតាមការរៀបរាប់ពីបុរសម្នាក់មានឈ្មោះ ផៃ ផានី អាយុ៤១ឆ្នាំ និងប្រពន្ធឈ្មោះ ណន សោភា រស់នៅក្នុងភូមិខាងលើ បានឱ្យដឹងថា លោកបានដាំម្ទេសហាវ៉ៃជាង១០០០ដើម និងស្ពៃ៣កន្លែងនៅក្បែរៗគ្នា ដោយម្ទេសរបស់លោកជិតដល់ពេលត្រូវប្រមូលផលដែរហើយ នៅសល់ត្រឹមតែរយៈពេល១អាទិត្យទៀតប៉ុណ្ណោះ។
លោកបន្តទៀតថា បញ្ហាប្រឈមនឹងការខូចខាតដំណាំម្ទេសហាវ៉ៃ ដែលដាំតាមលក្ខណៈបច្ចេកទេសនេះ គឺទើបតែចាប់ផ្តើមកើតមានឡើងជំងឺក្រាស៊ី បណ្តាលឱ្យស្វិតប្រពោន ដោយខាងលោកក៏មិនទាន់ដឹងថា តើត្រូវរកថ្នាំអ្វី ដើម្បីព្យាបាល ឬទប់ស្កាត់កុំឱ្យងា.ប់បានឡើយ? ពោលគឺដោយចាប់ផ្តើមងា.ប់ជាបណ្តើរៗហើយ។
លោកបន្តទៀតថា ការដាំដំណាំបន្លែតាមរបៀបបច្ចេកទេសថ្មីនេះវិញ គឺធ្វើឡើងអស់រយៈពេលជិត២ឆ្នាំមកហើយ ចំពោះការព្យាបាលដំណាំដែលកំពុងជួបបញ្ហាជំងឺនេះ ខាងលោកក៏ចាប់ផ្តើមរកវិធីសាស្ត្រផ្សេងៗ ដើម្បីព្យាបាលដោយខ្លួនឯងផងដែរ។ បញ្ហាប្រឈមមួយទៀត ចំពោះដំណាំបន្លែរបស់ខ្លួនសព្វថ្ងៃនេះ គឺអាកាសធាតុក្តៅខ្លាំង ព្រោះជិតដល់រដូវចូលឆ្នាំថ្មីប្រពៃណីជាតិ បណ្តាលឱ្យរួញស្លឹក និងជ្រុះផ្កាក្តិបអស់ជាច្រើន ជាហេតុធ្វើឱ្យមានការធ្លាក់ចុះទិន្នផលគួរឱ្យកត់សម្គាល់ផងដែរ។
ទោះបីជាមានបញ្ហាអ្វីកើតឡើងក៏ដោយ លោកនៅតែថែទាំដំណាំបន្លែនេះដដែល ព្រោះនិស្ស័យស្រឡាញ់ចូលចិត្តខាងផ្នែកកសិកម្ម។ ហើយម្ទេសហាវ៉ៃ បច្ចុប្បន្ននេះ ឈ្មួញហ៊ានទិញក្នុងតម្លៃ១គីឡូក្រាម តម្លៃ៥០០០ទៅ៦០០០រៀលប៉ុណ្ណោះ ដែលកាលពីមុនគឺមានតម្លៃខ្ពស់គ្រាន់បើ។
តែទោះបីជាយ៉ាងណា ការដាំដំណាំបន្លែលក់នេះ មិនសូវមានការខាតទុនច្រើនប៉ុន្មាននោះទេ ដោយចំណេញអាចទទួលយកបាន ព្រោះខាងលោកមានការយកចិត្តទុកដាក់ថែទាំបន្លែគ្រប់ពេលវេលា លុះពេលជិតដល់ប្រមូលផល ឈ្មួញឃើញផ្លែម្ទេសល្អៗ ក៏ទិញយកទៅលក់ដូរនៅតាមផ្សារដាច់អស់ៗតែម្តង៕
ចែករំលែកព័តមាននេះ