និស្សិតផ្នែក IT កំពុងមានទីផ្សារការងារខ្ពស់ ខណៈប្រទេសកំពុងអភិវឌ្ឍន៍
រាជធានីភ្នំពេញ ៖ ក្នុងមួយឆ្នាំៗ និស្សិតដែលបានបញ្ចប់ការសិក្សាពីសាកលវិទ្យាល័យទៅតាមជំនាញនានា មានរាប់ម៉ឺននាក់ ។ ទោះបីយ៉ាងណា
រាជធានីភ្នំពេញ ៖ ក្នុងមួយឆ្នាំៗ និស្សិតដែលបានបញ្ចប់ការសិក្សាពីសាកលវិទ្យាល័យទៅតាមជំនាញនានា មានរាប់ម៉ឺននាក់ ។ ទោះបីយ៉ាងណា និស្សិតទាំងនោះមួយចំនួនមិនប្រាកដថា ទទួលបានការងារទៅតាមមុខជំនាញដែលខ្លួនបានសិក្សានោះទេ ប៉ុន្តែមានជំនាញមួយដែលកំពុងមានទីផ្សារការងារខ្ពស់ ស្របពេលប្រទេសជាតិកំពុងរីកចម្រើន និងត្រូវការជាចាំបាច់នោះ គឺផ្នែកព័ត៌មានវិទ្យា (IT) ខណៈនិស្សិតខ្លះរៀនមិនទាន់ចប់ផង ក៏មានឱកាសចូលធ្វើការទៅហើយ ។
និស្សិតកំពុងសិក្សាឆ្នាំទី៤ ជំនាញគ្រប់គ្រងប្រព័ន្ធព័ត៌មានវិទ្យា និងជាបុគ្គលិកបម្រើការនៅក្រុមហ៊ុន Plan-B បានលើកឡើងថា ប៉ុន្មានឆ្នាំចុងក្រោយនេះ កំណើននិស្សិតដែលចាប់យកជំនាញផ្នែក IT បានកើនឡើងគួរឲ្យកត់សម្គាល់ ហើយទីផ្សារការងារសព្វថ្ងៃ ក៏មានតម្រូវការខ្ពស់ផងដែរ ខណៈដែលប្រទេសជាតិកំពុងរីកចម្រើន និងត្រូវការធនធានផ្នែកនេះ ។
កញ្ញា ឆន សុខឃីម និស្សិតឆ្នាំទី៤រូបនេះបាននិយាយថា ៖« បច្ចុប្បន្ន និស្សិតផ្នែកគ្រប់គ្រងប្រព័ន្ធព័ត៌មានវិទ្យា គឺមានឱកាសទទួលបានការងារធ្វើច្រើន ដោយសារតែប្រទេសយើងកំពុងមានការអភិវឌ្ឍ ហើយបច្ចេកវិទ្យាក៏កំពុងលូតលាស់ អីចឹង យើងរៀនផ្នែកហ្នឹងមានឱកាសច្រើន ហើយក៏មិនបារម្ភថា គ្មានការងារធ្វើដែរ តែទាមទារឱ្យយើងខិតខំរៀនធ្វើឱ្យខ្លួនឯង មានទំនុកចិត្ត ដើម្បីឆ្លើយតបទៅនឹងតម្រូវការដែលទីផ្សារចង់បាន » ។
លោក ឡុង ពន្លក នាយករងនៃវិទ្យាស្ថានស៊ីតិក មានប្រសាសន៍ថា ៖« យើងបានបណ្តុះបណ្តាលដល់និស្សិតទៅលើជំនាញចំនួន៣ រួមមាន គ្រប់គ្រងប្រព័ន្ធព័ត៌មានវិទ្យា, ប្លង់និងរចនា និងពាណិជ្ជកម្មព័ត៌មាន ។ ក្នុងនោះ ជំនាញគ្រប់គ្រងប្រព័ន្ធព័ត៌មានវិទ្យា មាននិស្សិតចូលរៀនច្រើនជាងគេ » ។
លោកបន្តថា ៖« ពេលប្រទេសមានការអភិវឌ្ឍឆ្ពោះទៅមុខកាន់តែលឿន តម្រូវការប្រើប្រាស់បច្ចេកវិទ្យាកាន់តែច្រើន ។ ដូចនេះ ខ្ញុំគិតថា មុខវិជ្ជាមួយនេះនឹងមាននិស្សិតចូលរៀនកាន់តែកើនឡើង » ។
លោក ជេត ជាលី សាកលវិទ្យាធិការនៃសាកលវិទ្យាល័យភូមិន្ទភ្នំពេញ មានប្រសាសន៍ថា ក្នុងមួយឆ្នាំៗ មាននិស្សិតចន្លោះពី១០ទៅ២០% ជ្រើសរើសមុខវិជ្ជាបច្ចេកវិទ្យាព័ត៌មាន ក្នុងចំណោមនិស្សិត៥ពាន់នាក់នៅសាកលវិទ្យាល័យភូមិន្ទភ្នំពេញ ។
លោកបន្ដថា ៖« មុខវិជ្ជានេះកំពុងពេញនិយមក្នុងចំណោមមុខវិជ្ជាផ្សេងៗ ហើយបើសិនជាក្មេង [និស្សិត] ចេះមានគំនិតច្នៃប្រឌិត និងវាងវៃបន្ថែមបន្តិច ឱកាសទទួលបានការងារស្រួលរកមែនទែន ព្រោះនៅគ្រប់កន្លែងការងារនិងអាជីវកម្ម គឺប្រើប្រាស់ដោយបច្ចេកវិទ្យា ។ នៅពេលខាងមុខឆាប់ៗនេះ យើងនឹងបើកជាមជ្ឈមណ្ឌលមួយ ភ្ជាប់ទៅនឹងជំនាញរបស់ខ្លួនយ៉ាងម៉េច ដើម្បីងាយស្រួលរកការងារ » ។
លោកបញ្ជាក់ថា ៖« និស្សិតរៀនមុខវិជ្ជា IT តាំងពីខ្ញុំចូលមកកាន់នៅទីនេះរយៈពេល៣ឆ្នាំ អត់មានការធ្លាក់ចុះទេ បើទោះបីនៅឆ្នាំប្រឡងបាក់ឌុប ដែលក្រសួងអប់រំរឹតបន្តឹងខ្លាំង ហើយសិស្សធ្លាក់ច្រើននោះ ក៏សាលាទទួលបាននិស្សិតចូលរៀនច្រើនដែរ។ អីចឹង ជំនាញនេះមានប្រជាប្រិយភាព ហើយសាលាផ្សេងទៀតក៏ទទួលបានច្រើនដូចគ្នាផងដែរ » ៕
ចែករំលែកព័តមាននេះ