ពេលវេលាដល់ហើយសម្រាប់ក្រុមប្រឹក្សាសន្តិសុខអង្គការសហប្រជាជាតិ ចាត់វិធានការចំពោះអំពើឈ្លានពានរបស់ថៃមកលើកម្ពុជា គឺមិនគួរបណ្តោយឱ្យថៃធ្វើព្យុះ ធ្វើភ្លៀងតាមតែអំពើចិត្តដោយអាងថា ខ្លួនជាប្រទេសធំនោះទេ ពីព្រោះចាប់តាំងពីថ្ងៃទី២២ មេសា ឆ្នាំ២០១១មកទាហានថៃបានបាញ់ផ្លោងដោយគ្រាប់កាំភ្លើងជាច្រើនប្រភេទ ដូចជា ដេកា៧៥មិល្លីម៉ែត្រ ដេកា៨៣មិល្លីម៉ែត្រ កាំភ្លើងធំ១០៥មិល្លីម៉ែត្រ និងកាំភ្លើងធំ១៥៥មិល្លីម៉ែត្រ ចូលក្នុងតំបន់ប្រាសាទតាក្របី រហូតដល់ជប់គគីរ និងចូលជ្រៅចម្ងាយ២១គីឡូម៉ែត្រ ក្នុងទឹកដីកម្ពុជា ខេត្តឧត្តរមានជ័យ ។
ទង្វើដ៏ព្រៃផ្សៃរបស់កងទ័ពថៃ គឺបានរំលោភទៅលើស្មារតីនៃសេចក្តីថ្លែងការណ៍ក្រុមប្រឹក្សាសន្តិសុខអង្គការសហប្រជាជាតិចុះថ្ងៃទី១៤ កុម្ភៈ ឆ្នាំ២០១១ និងសេចក្តីថ្លែងការណ៍ប្រធានអាស៊ាន ចុះថ្ងៃទី២២ កុម្ភៈ ឆ្នាំ២០១១ ។ ការឈ្លានពានជាថ្មីនេះ បានធ្វើឱ្យមានការស្លាប់ និងរបួសកងទ័ព និងពលរដ្ឋស៊ីវិលជាច្រើននាក់ និងផ្ទះសម្បែងជាច្រើនខ្នងខូចខ្ទេចខ្ទីអស់ ។ អ្នកភូមិប្រមាណជាង៣ម៉ឺននាក់ ក្នុងចំណោមពលរដ្ឋចំនួន៥.៩២០គ្រួសារត្រូវបានជន្លៀសរត់ភៀសខ្លួនចាកចេញពីលំនៅឋាន ។
តាមរយៈការចុះផ្សាយរបស់សារព័ត៌មានថៃរ៉ាត់កាលពីថ្ងៃទី២៤ កុម្ភៈ ឆ្នាំ២០១១ បានឱ្យដឹងថា រដ្ឋាភិបាលថៃគាំទ្រកងទ័ពយ៉ាងពេញទំហឹង។ ប្រទេសថៃជ្រើសយកការបង្កសង្គ្រាមដើម្បីដោះស្រាយបញ្ហាប្រឆាំងនឹងកម្ពុជាដែលវាជាការហួសសម័យទៅហើយនៅក្នុងសតវត្សទី ២១ នេះ ។
ប្រទេសក្នុងតំបន់ក៏ដូចជាប្រទេសនានាលើសាកលលោករួមទាំងសហរដ្ឋអាមេរិក ក៏សម្តែងការព្រួយបារម្ភខ្លាំងក្នុងសង្គ្រាមដែលបង្កឡើងដោយថៃមកលើកម្ពុជាដោយបានចេញសេចក្តីថ្លែងការណ៍អំពាវនាវជាបន្តបន្ទាប់ដើម្បីបញ្ឈប់សង្គ្រាមជាអចិន្ត្រៃយ៍ ដូចជាប្រទេសចិន រុស្ស៊ី វៀតណាម សិង្ហបុរី និងលោកស៊ូរិន ពិនស៊ូវណ្ណ អតីតរដ្ឋមន្ត្រី ការបរទេសថៃ និងជាអគ្គលេខា ធិការអាស៊ានបានគាំទ្រប្រសាសន៍លោកបានគីមូន អគ្គលេខាធិការអង្គការសហប្រជាជាតិថា «សូមអំពាវនាវប្រទេសទាំងពីរបញ្ឈប់ការវាយប្រហារ ដើម្បីគិតដល់អាយុជីវិតមនុស្សពិភពលោក និងអាស៊ានដើម្បីបញ្ចប់សង្គ្រាម និងដើម្បីឱ្យបន្ថយភាពតានតឹងរវាងសមាជិកអាស៊ានរបស់យើង គឺជម្រើសចុងក្រោយចរចាជាមួយគ្នា» ។
តាមរយៈការចុះផ្សាយរបស់សារព័ត៌មានបាងកកប៉ុស្តិ៍ថ្ងៃទី២៥ មេសា ឆ្នាំ២០១១ លោកជំទាវហ៊ីល ឡារី ឃ្លីនតុន រដ្ឋមន្ត្រីការបរទេសសហរដ្ឋអាមេរិកបានមានប្រសាសន៍ដោយ ជំរុញឱ្យភាគីទាំងពីរបញ្ឈប់សង្គ្រាមជាបន្ទាន់នេះជាជំហានដ៏ចាំបាច់ក្នុងការកាត់បន្ថយភាពតានតឹងដើម្បីបញ្ជៀសសង្គ្រាមទៅអនាគត…យើងគាំទ្រយន្តការសម្របសម្រួលរបស់ប្រធានអាស៊ាន ។
សម្តេចអគ្គសេនាបតី ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាតែងតែស្វាគមន៍ និងអរគុណដល់បណ្តាប្រទេសទាំងនោះនូវគំនិតចេះឈឺឆ្អាលដល់កម្ពុជា ស្របជាមួយនឹងគំនិតរបស់សម្តេចតែងតែប្រកាន់ជំហរឈ្នះ=ឈ្នះដោះស្រាយតាមមាគ៌ាព្រះពុទ្ធសាសនាជាធំស្អប់ខ្ពើមសង្គ្រាម បានឱ្យកងទ័ពកម្ពុជា អត់ធ្មត់មិនបង្កសង្គ្រាមមុនឡើយ គ្រាន់តែធ្វើការបាញ់តបជាជម្រើសចុងក្រោយក្នុងគោលបំណង ស្វ័យការការពារខ្លួនតែប៉ុណ្ណោះ ។ ក្នុងសភាពការណ៍នេះប្រទេសកម្ពុជាកំពុងតែមានសន្តិភាព ស្ថេរភាពនយោបាយពេញផ្ទសប្រទេសខុសពីប្រទេសថៃដែលដឹកនាំដោយលោកអាប់ភីស៊ីត នាយករដ្ឋមន្ត្រីថៃចូលចិត្តសង្គ្រាម និងធ្វើឱ្យប្រទេសថៃវឹកវរ ចលាចលពេញផ្ទៃប្រទេស បែងចែកប្រជាជនថៃជាច្រើនក្រុម ជាច្រើនចំណែក ដូច្នេះកម្ពុជាគ្មានហេតុផលដែលខ្លួនតូចទៅមានមហច្ឆិតាណាមួយឈ្លានពានប្រទេសថៃនោះឡើយ ។
នៅក្នុងក្រសែភ្នែកជាតិ អន្តរជាតិបានកត់សម្គាល់ឃើញថា ប្រទេសថៃបានព្យាយាមប្រើល្បិចកលកមិនចេះចប់មិនចេះហើយ គ្រប់បែបយ៉ាងដើម្បីឈ្លានពានកម្ពុជាដូចជាកាលពីថ្ងៃទី១៥ កក្កដា ឆ្នាំ២០០៨, ថ្ងៃទី១៥ តុលា ឆ្នាំ២០០៨, ថ្ងៃទី៣ មេសា ឆ្នាំ២០០៩, ថ្ងៃទី៤ ដល់ថ្ងៃទី៧ កុម្ភៈ ឆ្នាំ២០១១ និងព្រឹត្តិការណ៍ចាប់ពីថ្ងៃទី២២ មេសា ឆ្នាំ២០១១ មកនេះ គឺជាសង្គ្រាមដែលថៃបើកការបាញ់ដោយទ្រង់ទ្រាយធំមកលើកម្ពុជាដោយសារតែប្រទេសថៃប្រើប្រាស់ផែនទីចោរលួចគូរដោយឯកតោភាគីគ្មានការទទួលស្គាល់ពីអន្តរជាតិ ។
កាលពីថ្ងៃទី១៤ កុម្ភៈ ឆ្នាំ២០១១ ប្រទេសថៃបានឯកភាពយល់ព្រមទទួលយកការឈប់បាញ់គ្នាជាអចិន្ត្រៃយ៍នៅមុខក្រុមប្រឹក្សាសន្តិសុខអង្គការសហប្រជាជាតិតែចាប់ពីពេលនេះមក ថៃមិនដែលយកមកអនុវត្តតាមបំណងដ៏ល្អរបស់ក្រុមប្រឹក្សាសន្តិសុខអង្គការសហប្រជាជាតិម្តងណាឡើយ ថៃមិនត្រឹមតែមាក់ងាយប្រមាថប្រធានអាស៊ានប៉ុណ្ណោះទេ ថែមទាំងរំលោភលើស្មារតីប្រជុំរបស់ក្រុមប្រឹក្សាអង្គការសហប្រជាជាតិ បើសិនជាថៃគោរពស្មារតីអង្គប្រជុំនោះថៃក៏មិនបង្កជាថ្មីដើម្បីឈ្លានពានកម្ពុជាថ្មីទេ ។ ហេតុដូច្នេះក្រុមប្រឹក្សាសន្តិសុខអង្គការសហប្រជាជាតិ គប្បីចាត់វិធានការជាបន្ទាន់ចំពោះអំពើឈ្លានពានរបស់ថៃមកលើកម្ពុជា ។
បើសិនជាក្រុមប្រឹក្សាសន្តិសុខអង្គការសហប្រជាជាតិមិនចាត់វិធានការទាន់ពេលវេលានោះទេ មានន័យថា អង្គការកំពូលមួយនេះទុកឱ្យប្រជាជនស្លូតត្រង់ទាំងពីរប្រទេស បាត់បង់អាយុជីវិតជាបន្តបន្ទាប់ហើយ ជាការរំលោភសិទ្ធិមនុស្សយ៉ាងកំរោលដែលបង្កដោយកងទ័ពឈ្លានពានថៃក្រោមបញ្ជារបស់នាយករដ្ឋមន្ត្រីថៃ អាប់ភីស៊ីត វេចាជីវ៉ា ៕
ចែករំលែកព័តមាននេះ