អាជ្ញាធរជាតិអប្សរា កំពុងដុតដៃដុតជើង ដើម្បីរៀបចំ «ពិព័រណ៍វត្ថុយក្ស» ចំនួន៧យ៉ាង រួមមាន ៖ ចាប៉ីដងវែងយក្ស, កន្ទ្រង់ប្រហុកយក្ស, មួកស្លឹកត្នោតយក្ស, សម្បុក និងពងមាន់យក្ស, បំពង់ទឹកត្នោតយក្ស, អន្រុតយក្ស និង ក្បាលហនុមាន លេងសម្រាប់ល្ខោនខោល គេហៅថា
ខេត្តសៀមរាប ៖ អាជ្ញាធរជាតិអប្សរា កំពុងដុតដៃដុតជើង ដើម្បីរៀបចំ «ពិព័រណ៍វត្ថុយក្ស» ចំនួន៧យ៉ាង រួមមាន ៖ ចាប៉ីដងវែងយក្ស, កន្ទ្រង់ប្រហុកយក្ស, មួកស្លឹកត្នោតយក្ស, សម្បុក និងពងមាន់យក្ស, បំពង់ទឹកត្នោតយក្ស, អន្រុតយក្ស និង ក្បាលហនុមាន លេងសម្រាប់ល្ខោនខោល គេហៅថា «ខ្មុកយក្ស» ធ្វើឡើងក្នុងខ្លឹមសារអបអរសាទរខួប១០ឆ្នាំ នៃព្រឹត្តិការណ៍អង្គរសង្ក្រាន្ត និងចូលឆ្នាំប្រពៃណីខ្មែរ ដែលជិតឈានចូលមកដល់ ដោយពាំនាំត្រឡប់មកវិញនៅវស្នាដៃយក្ស ក្នុងព្រឹត្តិការណ៍អង្គរសង្ក្រាន្តឆ្នាំមុនៗ និងស្នាដៃដទៃទៀតដ៏គួរជាទីមោទភាពរបស់យុវជន ដែលរំលេចជាទស្សនីយភាពដ៏អស្ចារ្យ ក្នុងការចូលរួមរួមចំណែកលើកតម្កើងស្នាដៃកូនខ្មែរក្រោមពាក្យស្លោក «ខ្មែរធ្វើបាន»។
កម្មវិធី ភូមិខ្ញុំ នៅឆ្នាំ២០២៣នេះ ក្រោមប្រធានបទ «ភូមិខ្ញុំ ភូមិសុខសាន្ត» ដែលមានទីតាំងនៅខាងជើង ជាប់នឹងប្រាសាទបាយ័ន បែរមុខទៅទិសខាងលិច ទល់នឹងប្រាសាទភិមានអាកាស មានខ្លោងទ្វារពីរខាងមុខ ភូមិរចនា តុបតែងដោយក្បូរក្បាច់រចនារបៀបខ្មែរគួរឱ្យទាក់ទាញ និងហ៊ុមព័ទ្ធដោយរបបឈើជុំវិញភូមិ។
កម្មវិធី ភូមិខ្ញុំ នេះ មានសំណង់ផ្ទះខ្មែរបុរាណ ដែលមានដូចជា ៖ ផ្ទះសិល្បៈ ទស្សនីយភាព ផ្ទះសេដ្ឋី ផ្ទះនំ សាលាឆទាន និងផ្ទះចាក់ចេក។ ហើយផ្សារភូមិខ្មែរ ដែលមានលក់ម្ហូបអាហារ នំ ភេសជ្ជៈ និងវត្ថុអនុស្សាវរីយ៍ផ្សេងៗរបស់អ្នកភូមិផងដែរ ថែមទាំងមានឆាកតន្ត្រីបុរាណសម័យ និងសកម្មភាពសាសនារបស់អ្នកភូមិផងដែរ។
កម្មវិធី ភូមិខ្ញុំ នៃព្រឹត្ដិការណ៍អង្គរ ដែលបានរៀបចំឡើង ដើម្បីបង្ហាញអំពីទិដ្ឋភាពខ្លះៗនៃភូមិខ្មែរ សម្រាប់ឱ្យអ្នកទស្សនាជាតិ និងអន្តរជាតិ បានឃើញ និងនឹកដល់ជីវភាពសុខសាន្ត នៃប្រជាពលរដ្ឋខ្មែរតាំងពីសម័យអតីតកាល រហូតមកដល់បច្ចុប្បន្ន ដែលជាក្ដីស្រមៃក្តី សង្ឃឹម សម្រាប់ពលរដ្ឋខ្មែរពីភាពរីកចម្រើន ភាពសុខសាន្ត សន្តិភាព ក្នុងប្រទេសកម្ពុជា។
សូមបញ្ជាក់ថា នៅទីលានប្រាសាទជល់ដំរី នៃក្រុងអង្គរធំ មានកម្មវិធីជាច្រើនទៀត កម្មវិធី «នេះមិនមែនជាសុបិន» កម្មវិធីនេះ បានបង្ហាញក្នុងព្រឹត្តិការណ៍អង្គរសង្ក្រាន្តជានិមិត្តរូប នៃការជួបជុំបងប្អូន និងភាពសប្បាយរីករាយក្នុងមហាគ្រួសារខ្មែរ។ កម្មវិធី «សួនមុនីហទ័យ» គឺជា កម្មវិធីមួយ ដែលបង្កើតឡើងក្នុងអត្ថន័យប្រមូលផ្តុំនូវសារៈសំខាន់ និងភាពដ៏អស្ចារ្យ នៃសិល្បៈទំនៀមទម្លាប់ និងឥរិយាបថដ៏ប្រពៃរបស់ប្រជាជនខ្មែរ។ កម្មវិធី «ភូមិស៊ីហ្គេម និងអាស៊ានប៉ារ៉ាហ្គេម ២០២៣» គឺជាកម្មវិធីផ្សព្វផ្សាយទូលំទូលាយពីព្រឹត្តិការណ៍ស៊ីហ្គេមលើកទី៣២ និងអាស៊ានប៉ារ៉ាហ្គេម លើកទី១២ ក្រោមប្រធានបទ «កីឡារស់ក្នុងសន្តិភាព» ផងដែរ៕
ចែករំលែកព័តមាននេះ