បង្ក្រាបបាតុកម្មយ៉ាងចាស់ដៃនៅក្នុងក្រុង

ថ្ងៃទី ១២ ខែ តុលា ឆ្នាំ ២០១៧

ម៉ោង ០៨:១៥

ប្រទេសបារាំង ៖ បាតុកម្មដែលរៀបចំធ្វើកាលពីថ្ងៃទី១០ តុលា នៅក្រុងប៉ារីសដោយបណ្តាសហជីពដើម្បីតវ៉ាប្រឆាំងបណ្តាវិធានការពុំអាចទទួលយកបានរបស់រដ្ឋាភិបាលលោក EMMANUEL MACRON រងការបង្ក្រាបយ៉ាងចាស់ដៃរបស់កងកម្លាំងប៉ូលិសដែលប្រើដំបង បាញ់ឧស្ម័នបង្ហូរទឹកភ្នែក ព្រមទាំងបាញ់គ្រាប់កៅស៊ូ ។

ពួកបាតុករត្រូវរងការវាយដំនឹងដំបងរបស់ប៉ូលិសដួលដេកលើដី នេះជារូបភាពគួរឱ្យក្តុកក្តួលនៃបាតុកម្មដែលរៀបចំធ្វើនាថ្ងៃទី១០ តុលា នោះនៅក្រុងប៉ារីស ដោយសហជីពបារាំងទាំងអស់ ។ នេះជាបាតុកម្មទ្រង់ទ្រាយធំមួយពុំធ្លាប់មានចាប់តាំងពី១០ឆ្នាំមកហើយ ។ មនុស្សច្រើនសិបនាក់ស្លៀកពាក់ខ្មៅកាលពីថ្ងៃទី១០ តុលា បាននាំគ្នាវាយប្រហារលើបណ្តាធនាគារស្ថិតនៅតាមផ្លូវនៃក្បួនដង្ហែបាតុកម្មរវាងទីលានសាធារណរដ្ឋ និងទីលានប្រជាជាតិ ។ បណ្តាមនុស្សបិទមុខបានគប់របស់របរផ្សេងៗ វាយបំបែកកញ្ចក់ និងទ្វារ ព្រមទាំងយកថ្នាំពណ៌លាបក្រវេមក្រវ៉ាម រួចប៉ូលិសបានតបតវិញ ដោយបាញ់គ្រាប់កៅស៊ូ ឧស្ម័នបង្ហូរទឹកភ្នែក ព្រមទាំងប្រើដំបង ។

វីដេអូមួយថតដោយអ្នកយកព័ត៌មានរបស់ទីភ្នាក់ងារព័ត៌មានរុស្ស៊ី SPUTNIK បង្ហាញជាពិសេសយុវជនម្នាក់ដែលក្បាលហូរឈាមត្រូវចាប់ក្រៀកដោយប៉ូលិស២នាក់ បណ្តាមនុស្សម្នាដួលដេកលើដី ដោយទទួលការទាត់ធាក់ ហើយវាយដំដោយប៉ូលិសពាក់មួកកាស់ ។

យោងតាមទូរទស្សន៍ BFMTV ថា បាតុករ៨នាក់កាន់ញញួរ និងកាំបិតត្រូវចាប់ខ្លួន ។ យោងតាមសហជីព CGT ថា មនុស្សប្រមាណជា៤៥.០០០នាក់ បានចូលរួមក្នុងការហែក្បួនបាតុកម្មនៅក្រុងប៉ារីស ។

បាតុកម្មបែបនេះត្រូវបានរៀបចំក្នុងទីក្រុងបារាំងជាច្រើន ។ សហព័ន្ធសហជីពមុខងារសាធារណៈទាំង៩ មុននេះអំពាវនាវឱ្យមានទិវាកូដកម្ម និងបាតុកម្មមួយក្នុងផ្នែកមុខងារសាធារណៈ ដើម្បីសម្តែងការប្រឆាំងយ៉ាងខ្លាំងជាមួយរដ្ឋាភិបាល ដែលគ្រោងជាពិសេសលុបចោលតំណែង១២០.០០០ រហូតដល់ផុតអាណត្តិ៥ឆ្នាំរបស់ប្រធានាធិបតីលោក EMMANUEL MACRON ផ្អាកការផ្តល់រាល់លាភការក្នុងការងារ ៕