ម្ចាស់ការ៉ាស់ខ្ចីធនាគារសងមិនទាន់រួចផង បែរជាឆេះឡានគេ រលា.កអស់មួយចំហៀងខ្លួនទៀត (វីដេអូ)
- ព្រៃវែង
ខេត្តព្រៃវែង ៖ អគ្គីភ័យដ៏សន្ធោសន្ធៅមួយ បានឆាបឆេះរថយន្តបែនដឹកដី១គ្រឿងអស់ទាំងស្រុង
ខេត្តព្រៃវែង ៖ អគ្គីភ័យដ៏សន្ធោសន្ធៅមួយ បានឆាបឆេះរថយន្តបែនដឹកដី១គ្រឿងអស់ទាំងស្រុង
ខេត្តព្រៃវែង ៖ អគ្គីភ័យដ៏សន្ធោសន្ធៅមួយ បានឆាបឆេះរថយន្តបែនដឹកដី១គ្រឿងអស់ទាំងស្រុង និងបានធ្វើអោយមានការភ្ញាក់ផ្អើលពេញតំបន់ប្រជុំជនផ្សារកំពង់សឹង្ហ កាលពីវេលាម៉ោង៩និង៤០នាទីព្រឹក ថ្ងៃទី២៩ មិនានេះ នៅលើកំណាត់ផ្លូវជាតិលេខ១ ស្ថិតក្នុងភូមិសឹង្ហ ឃុំកំពង់សឹង្ហ ស្រុកព្រះស្តេច ខេត្តព្រៃវែង។
តាមការរៀបរាប់របស់សាក្សីដែលបានឃើញហេតុការណ៌នេះ បានបញ្ជាក់ថា អគ្គីភ័យនេះកើតឡើងដោយសារតែម្ចាស់រថយន្ត និងជាងជួសជុលរថយន្តនាំគ្នាផ្សារជើងរ៉េស្វ័ររថយន្ត ហើយពេលផ្សារនោះអត់បានដកអាគុយរថយន្តចេញ ទើបធ្វើអោយឆ្លងចរន្តភ្លើង បណ្តាលអោយផ្ទុះធុងរ៉េស្វ័រ កើតជាអគ្គីភ័យឆាបឆេះរថយន្តទាំងមូលតែម្តង។
តាមប្រភពដដែលនេះបានបន្តថា ពេលភ្លើងឆាបឆេះរថយន្តភ្លាម ម្ចាស់រថយន្តនិងជាងជួសជុលរថយន្តឈ្មោះ ម៉យ ភេទប្រុស អាយុ២៥ឆ្នាំ បានព្យាយាមយកទឹកបា.ញ់ពន្លត់ភ្លើងដែរ ប៉ុន្តែកំសួលភ្លើងឆាបឆេះខ្លាំងពេកពន្លត់មិនបាន ហើយជាងឈ្មោះ ម៉យ ក៏ត្រូវភ្លើងឆាបឆេះរលាករលួយអស់មួយចំហៀងខ្លួន ហើយក៏មានការផ្អើលឆោឡោឡើងដោយមានអ្នកស្រុក និងអ្នកដំណើររាប់សិបនាក់បាននាំគ្នាចោមរោមមើលពីចំងាយ តែមិនមានអ្នកណាហ៊ានចូលជួយទេ បានត្រឹមជួយទាក់ទងហៅសមត្ថកិច្ចអោយជួយអន្តរាគមប៉ុណ្ណោះ។
ទោះជាយ៉ាងណាក៏ដោយ ក្រោយកើតមានអគ្គីភ័យនេះភ្លាម ត្រឹមតែជាង២០នាទីប៉ុណ្ណោះ រថយន្តពន្លត់អគ្គីភ័យចំនួន៤គ្រឿង បានបើកមកដល់កន្លែងកើតហេតុនិងជួយបាញ់ទឹកពន្លត់ជាបន្តបន្ទាប់ រហូតដល់អគ្គីភ័យត្រូវបានរលត់ជាស្ថាពរ នៅវេលាម៉ោង១០និង៣០នាទី ដោយសមត្ថកិច្ចបានប្រើប្រាស់ទឹកបាញ់ពន្លត់អស់៤រថយន្ត និងបានជួយសម្រួលចរាចរណ៌បញ្ជៀសការកកស្ទះនៅលើកំណាត់ផ្លូវជាតិលេខ១ផងដែរ។
សមត្ថកិច្ចបានអោយដឹងថា គ្រោះអគ្គីភ័យនេះបានបណ្តាលអោយរថយន្តបែនដឹកដី១គ្រឿង ត្រូវភ្លើងឆេះអស់ទាំងស្រុង រោងជាងជួលជុលរថយន្តមួយឆេះខូចខាតប្រមាណជា៥០ភាគរយ និងខ្សែភ្លើងជាច្រើនខ្សែដែលរត់តាមបង្គោលភ្លើង នៅពីលើការ៉ាស់ជួសជុលរថយន្តជាកន្លែងកើតហេតុនោះ ក៏ត្រូវភ្លើងឆេះដាច់អស់ដែរ ព្រមទាំងបានធ្វើអោយជាងជួសជុលរថយន្តម្នាក់ឈ្មោះ ម៉យ រងរបួសរលាកមួយចំហៀងខ្លួន ហើយពេលនេះកំពុងសំរាកព្យាបាលរបួសនៅក្នុងមន្ទីរពេទ្យបង្អែកអ្នកលឿង។
ដោយឡែកក្រុមគ្រួសារម្ចាស់ការ៉ាស់កន្លែងកើតហេតុនោះ បានយំរៀបរាប់ទាំងទឹកភ្នែកថា ប្អូនប្រុសរបស់គាត់ ( ម្ចាស់ការ៉ាស់ ) មានជីវភាពខ្វះខាតណាស់ ហើយបានទៅខ្ចីលុយធានាគារយកមកបើកការ៉ាស់នេះដើម្បីរកស៊ីចិញ្ចឹមជីវិត ឥឡូវលុយជំពាក់ធានាគារសងមិនទាន់រួចផង បែរមកជួបគ្រោះអកុសលបែបនេះ ខ្លួនប្រាណត្រូវភ្លើងឆេះមួយចំហៀងខ្លួន ការ៉ាស់និងសំភារៈក៏ត្រូវឆេះអស់ ហើយបើគេទារអោយសងឡាន សងខ្សែភ្លើងគេដែលឆេះនោះទៀត តើគាត់បានអីសង សូមជួយគាត់ផង៕
ចែករំលែកព័តមាននេះ