មានមនុស្សស្លា.ប់ច្រើននាក់ ក្នុងការវាយប្រហារព្រះរាជដំណាក់
ប្រទេសអារ៉ាប៊ីសាអ៊ូឌីត ៖ ព្រះរាជដំណាក់របស់ព្រះមហាក្សត្រ SALMANE នៃប្រទេសអារ៉ាប៊ី សាអ៊ូឌីត
ប្រទេសអារ៉ាប៊ីសាអ៊ូឌីត ៖ ព្រះរាជដំណាក់របស់ព្រះមហាក្សត្រ SALMANE នៃប្រទេសអារ៉ាប៊ី សាអ៊ូឌីត រងការវាយប្រហារដោយអាវុធកាលពីព្រឹកថ្ងៃទី៧ តុលា នៅទីក្រុង DJEDDAH ជាទីក្រុងធំទី២របស់ប្រទេសបណ្តាលឱ្យមនុស្សស្លាប់ច្រើននាក់។ យោងតាមរ៉យទ័រថា ជនវាយប្រហារម្នាក់ និងសមាជិកកងឆ្មាំជាតិអារ៉ាប៊ី សាអ៊ូឌីត២នាក់បានត្រូវស្លាប់។ ក្រសួងមហាផ្ទៃអារ៉ាប៊ី សាអ៊ូឌីត និយាយថា ភ្នាក់ងារសន្តិសុខ៣នាក់រងរបួស។ ភ្នាក់ងារសន្តិសុខរាយការណ៍ថា ជនវាយប្រហារជាបុរសអារ៉ាប៊ី សាអ៊ូឌីត អាយុ២៨ឆ្នាំម្នាក់។
ប៉ូលិសរកឃើញកាំភ្លើងវាយលុកធុន AK មួយដើម និងគ្រាប់បែកដៃ៣គ្រាប់ក្នុងរថយន្តរបស់ជននេះ។ ព្រះរាជដំណាក់ AL SALAM មានខុទ្ទការល័យរបស់ព្រះមហាក្សត្រ ហើយតែងប្រើជាកន្លែងប្រជុំរបស់គណៈរដ្ឋមន្ត្រី។ ព្រះមហាក្សត្រ SALMANE បច្ចុប្បន្នកំពុងបំពេញព្រះរាជទស្សនកិច្ចផ្លូវរដ្ឋមួយនៅរុស្ស៊ី។ នាថ្ងៃទី៥ តុលា ទ្រង់ជួបជាមួយប្រធានាធិបតីរុស្ស៊ី លោកវ្ល៉ាឌីមៀរ ពូទីន នៅវិមានក្រឹមឡាំង ដើម្បីពិភាក្សាពីសភាពការណ៍នៅមជ្ឈិមបូព៌ា និងនៅអាហ្វ្រិកខាងជើង ព្រមទាំងពីកិច្ចសហប្រតិបត្តិការពិសេសក្នុងវិស័យថាមពលរវាងប្រទេសទាំង២៕
ចែករំលែកព័តមាននេះ