លោកពូទីន ដឹងរឿងកូរ៉េខាងជើងចាប់តាំងពីឆ្នាំ2001មកម្ល៉េះ
លោកវ្ល៉ាឌីមៀរ ពូទីន ថ្លែងថា
លោកវ្ល៉ាឌីមៀរ ពូទីន ថ្លែងថា
ប្រទេសរុស្ស៊ី-កូរ៉េខាងជើង ៖ ថ្មីៗនេះនាថ្ងៃដំបូងនៃវេទិកាអន្តរជាតិមួយក្រោមប្រធានបទ «សប្តាហ៍ថាមពលរុស្ស៊ី» ប្រធានាធិបតីរុស្ស៊ី លោកវ្ល៉ាឌីមៀរ ពូទីន ថ្លែងថា នាដើមទសវត្សឆ្នាំ២០០០ លោកគីម ជុងអុីល បិតារបស់មេដឹកនាំកូរ៉េខាងជើង បច្ចុប្បន្នលោកគីម ជុងអ៊ុន ធ្លាប់និយាយប្រាប់លោកថា កូរ៉េខាងជើងមានអាវុធនុយក្លេអ៊ែរ ។
យោងតាមលោកពូទីន ថា បណ្តាទណ្ឌកម្មរបស់ពួកលោកខាងលិច ពុំធ្វើឱ្យមានការផ្លាស់ប្តូរឡើយ ផ្ទុយទៅវិញបែរជាលើកទឹកចិត្តក្រុងព្យុងយ៉ាងឱ្យផលិតគ្រាប់បែកអីុដ្រូហ្សែន ហៅគ្រាប់បែក H ។ លោកថា កាលពីឆ្នាំ២០០១ បិតាលោកគីម ជុងអ៊ុន អះអាងប្រាប់លោកថា កូរ៉េខាងជើងមានអាវុធនុយក្លេអ៊ែរហើយ ។ លោកបន្តថា កាលពីឆ្នាំ២០០១ ពេលខ្ញុំវិលត្រឡប់មកពីជប៉ុន ខ្ញុំបានទៅកាន់កូរ៉េខាងជើង ហើយខ្ញុំបានជួបជាមួយលោកគីម ជុងអីុល បិតាលោកគីម ជុងអ៊ុន ។ លោកគីម ជុងអីុិល និយាយប្រាប់ខ្ញុំនាពេលនោះថា កូរ៉េខាងជើងមានគ្រាប់បែកនុយក្លេអ៊ែរមួយ ហើយកូរ៉េខាងជើងអាចវាយប្រហារក្រុងសេអ៊ូល ដោយស្រួលបំផុតជាមួយតែប្រព័ន្ធកាំភ្លើងធំសាមញ្ញធម្មតា ។ ពេលនោះគឺក្នុងឆ្នាំ២០០១ ហើយពេលនេះចូលដល់ឆ្នាំ២០១៧ទៅហើយ ដែលប្រទេសនេះរស់នៅក្រោមរបបដាក់ទណ្ឌកម្មជាអចិន្ត្រៃយ៍ រួចពុំត្រឹមតែគ្រាប់បែកបរមាណូទេ កូរ៉េខាងជើងឥឡូវមានដល់គ្រាប់បែកអុីុដ្រូហ្សែន ។
លោកពូទីន ក៏គូសបញ្ជាក់ផងដែរថា បណ្តាទណ្ឌកម្មរបស់ពួកលោកខាងលិចប្រឆាំងក្រុងព្យុងយ៉ាងពុំបានផ្លាស់ប្តូរសភាពការណ៍ឡើយ ហើយកាន់តែពង្រឹងថែម ពេលដែលកូរ៉េខាងជើងជិតព្រមបោះបង់ចោលកម្មវិធីនុយក្លេអ៊ែរទៅហើយ ។ គេបានរាំងខ្ទប់បណ្តាគណនីរបស់ធនាគារកូរ៉េខាងជើងទាំងឡាយ ព្រោះតែគេជឿថា ការសន្យារបស់កូរ៉េខាងជើងហាក់ពុំគួរឱ្យជឿ ដូច្នេះគេត្រូវបន្ថែមទណ្ឌកម្ម ។ តាមពិតទៅ កូរ៉េខាងជើងបានព្រមព្រៀងលើចំណុចជាច្រើន តែការដាក់ទណ្ឌកម្មបន្ថែមទីបំផុតកូរ៉េខាងជើងចាកចេញពីរាល់កិច្ចព្រមព្រៀង ហើយចាប់ផ្តើមពង្រីកកម្មវិធីនុយក្លេអ៊ែរ ។ ឥឡូវយើងបានដឹងហើយចំពោះអ្វីដែលកើតមាន ។
ក្រុងព្យុងយ៉ាងរយៈពេលប៉ុន្មានខែចុងក្រោយនេះបង្កើនការបាញ់សាកមីស៊ីលបាលីស្ទិក និងសាកល្បងនុយក្លេអ៊ែរពុំអើពើដល់ការហាមឃាត់របស់សហគមន៍អន្តរជាតិ ។
ក្រុមប្រឹក្សាសន្តិសុខ អ.ស.ប បានដាក់ទណ្ឌកម្មថ្មីៗប្រឆាំងរបបក្រុងព្យុងយ៉ាងក្រោយការសាកល្បងនុយក្លេអ៊ែរក្រោមដីលើកទី៦ កាលពីខែកញ្ញា ។ នេះជាគ្រាប់បែកនុយក្លេអ៊ែរយ៉ាងខ្លាំងបំផុតដែលកូរ៉េខាងជើងសាក ៕
ចែករំលែកព័តមាននេះ