រំដោះទឹកនៅបរិវេណអង្គរវត្ត ក្រោយភ្លៀង និងខ្យល់បោកបក់ខ្លាំងជាប់ៗគ្នា
ខេត្តសៀមរាប ៖ បន្ទាប់ពីមានភ្លៀងធ្លាក់និងខ្យល់បោកបក់ខ្លាំងជាប់ៗគ្នាធ្វើឨ្យជំនន់ទឹកភ្លៀងបានកើតមានក្នុងក្រុងសៀមរាប និង
ខេត្តសៀមរាប ៖ បន្ទាប់ពីមានភ្លៀងធ្លាក់និងខ្យល់បោកបក់ខ្លាំងជាប់ៗគ្នាធ្វើឨ្យជំនន់ទឹកភ្លៀងបានកើតមានក្នុងក្រុងសៀមរាប និងបណ្តាភូមិស្រុកជាច្រើនផ្សេងទៀត ។
ទឹកភ្លៀងក៏បានធ្វើឱ្យមានទឹកដក់នៅតាមប្រាសាទមួយចំនួនក្នុងឧទ្យានអង្គរផងដែរ តែការដក់ទឹកនោះមិនបានបង្កជាបញ្ហាដល់ប្រាសាទនិងរំខានដល់ការចូលទៅទស្សនារបស់ភ្ញៀវទេសចរនោះឡើយ ។
ជាក់ស្តែងនៅប្រាសាទអង្គរវត្ត រងទឹកភ្លៀងដក់នៅកន្លែងខ្លះដែរ ប៉ុន្តែក្រុមអ្នកជំនាញនៃនាយកដ្ឋានគ្រប់គ្រងទឹកបានរំដោះទឹកដក់ទាំងនោះបានយ៉ាងទាន់ពេលវេលា ។
លោកញ៉ែម រស្មី បុគ្គលិកជំនាញផ្នែកគ្រប់គ្រងទឹកបានឱ្យដឹងថា ទឹកដែលដក់នៅប្រាសាទអង្គរវត្ត ត្រូវបានក្រុមការងារនិងអ្នកលក់ដូរក្នុងប្រាសាទជួយគ្នាជីកស្តារប្រឡាយដែលជាប្រព័ន្ធផ្លូវទឹកចាស់ដើម្បីរំដោះទឹកឱ្យហូរចូលទៅស្រះទឹកក្នុងបរិវេណប្រាសាទ និងកសិន្ធុជុំវិញប្រាសាទ ។ មូលហេតុដែលធ្វើឱ្យទឹកដក់ក្នុងប្រាសាទអង្គរព្រោះកន្លែងខ្លះទាប និងការបោះសំរាមចោលដែលធ្វើឱ្យស្ទះមាត់ប្រឡាយ ទឹកហូរមិនទាន់ ។ ប៉ុន្តែក្រោយធ្វើការរំដោះទឹកចាប់ពីថ្ងៃដំបូងមកដល់ថ្ងៃទី៤ ខែតុលា ឆ្នាំ២០១៧នេះ ធ្វើឱ្យស្ថានភាពទឹកស្រកអស់ច្រើនហើយ ។
លោកហង់ ពៅ អគ្គនាយករង អាជ្ញាធរជាតិអប្សរា ទទួលបន្ទុកនាយកដ្ឋានគ្រប់គ្រងទឹកបានឱ្យដឹងថា កន្លងមកអាជ្ញាធរជាតិអប្សរាមានប្រព័ន្ធគ្រប់គ្រងទឹកជំនន់ច្បាស់លាស់ណាស់ មិនឱ្យទឹកជន់លិចក្រុងសៀមរាបនិងតំបន់ឧទ្យានអង្គរឡើយ ប៉ុន្តែនេះជាករណីជំនន់ទឹកភ្លៀង ទើបយើងមិនអាចគ្រប់គ្រងនិងរំដោះទឹករាប់ពាន់លីត្រភ្លាមៗបាន តែជំនន់ទឹកភ្លៀងនេះមិនបង្កបញ្ហាដល់ប្រាសាទ និងប៉ះពាល់ដល់ភ្ញៀវចូលមកទស្សនាទេ ។ ជាមួយនឹងការរំដោះទឹកភ្លៀងពីក្នុងប្រាសាទ ក្រុមការងារក៏បានកាយប្រឡាយដែលប្រជាជនយកដីទៅចាក់ពីលើបែបអនាធិបតេយ្យតាមបណ្តោយផ្លូវវាងរមណីយដ្ឋានអង្គរខាងលិច ស្ថិតក្នុងសង្កាត់គោកចក ដើម្បីរំដោះទឹកឱ្យហូរបានលឿនចៀសវាងការច្រាលមកលើទៀតផង ៕
ចែករំលែកព័តមាននេះ