ភ្នំពេញ៖ ក្នុងពិធីបិទសន្និបាត​បូកសរុបការងាររបស់ក្រសួង​កសិកម្ម រុក្ខាប្រមាញ់ និងនេសាទ នារសៀលថ្ងៃទី២៤ ខែមីនានេះ សម្តេចតេជោ ហ៊ុន សែន បានប្រកាសថា ទោះជាពិភពលោក ប្រែប្រួល​យ៉ាងណាក៏ដោយ ក៏កម្ពុជា មិនខ្វះ​ស្បៀងទេ ពិសេសស្រូវ​អង្ករ។

ជាមួយនឹងប្រសាសន៍ដូច្នេះ សម្តេចតេជោ ហ៊ុន សែន ក៏បានប្រកាស ហាមដាច់ខាត មិនឱ្យ​មានការដោះដូរដី​របស់វិទ្យាស្ថានស្រាវជ្រាវ និងអភិវឌ្ឍន៍កសិកម្មកម្ពុជា ( CARDI = ​Cambodian Agricultural Research and Development Institute ) ដែលស្ថិតនៅផ្លូវជាតិលេខ៣ ក្នុងព្រំប្រទល់រវាងរាជធានីភ្នំពេញ និងស្រុកកណ្តាលស្ទឹង ក្នុងខេត្តកណ្តាលនោះទេ​។

សម្តេចតេជោ ហ៊ុន សែន បញ្ជាក់ថា «CARDI សុំ​កុំនរណា មកលូកដៃ។ កន្លងទៅ មានប្រហែលជា ២០ក្រុមហ៊ុន មកស្នើសុំ​យកដី CARDI ដើម្បីដោះដូរដីនោះ។ CARDI ជាកូនបង្កើតរបស់ខ្ញុំ ដែលខ្ញុំបង្កើតវា។ ដូច្នេះ​មិនឱ្យដោះដូរទីតាំងនោះទេ រហូតដល់ខ្ញុំងាប់ ហើយបើខ្ញុំងាប់ហើយ មានអ្នកដោះដូរ ខ្ញុំនឹងទៅតាម​កាច់កវា។ ផ្តាំទៅរដ្ឋមន្ត្រី និងនាយករដ្ឋមន្ត្រីក្រោយៗ បើខ្ញុំងាប់ទៅ ក៏ទៅតាមកាច់​យកដែរ​។ ទុកវា នៅកន្លែងហ្នឹងទៅ។ យើងបង្កើតបានពូជស្រូវល្អៗ ចេញពី CARDI ​ហ្នឹង»។

​វិទ្យាស្ថានស្រាវជ្រាវ និងអភិវឌ្ឍន៍កសិកម្មកម្ពុជា ( CARDI = Cambodian Agricultural Research and Development Institute ) បង្កើតឡើង ​កាលពីឆ្នាំ១៩៩៩ នៅតាមផ្លូវជាតិលេខ៣ ក្នុង​ព្រំដែនរវាង​រាជធានីភ្នំពេញ និងស្រុកកណ្តាលស្ទឹង ខេត្តកណ្តាល​។ CARDI ត្រូវបានបង្កើតឡើង ដើម្បីស្រាវជ្រាវ សម្រាប់អភិវឌ្ឍន៍កសិកម្ម ប្រកបដោយនិរន្តភាព ក្នុងប្រទេសកម្ពុជា រួមទាំង​បង្កើនផលិតភាពកសិកម្ម ធ្វើឲ្យប្រសើរឡើង​ពិពិធកម្ម​ដំណាំ​ និង​ធានា​បាន​នូវ​និរន្ត​ភាព​បរិស្ថាន ព្រម​ទាំង​ស្ថិរភាព​​ជីវភាព​​ជនបទ ​តាម​រយៈភាព​ជាដៃគូ ក្នុង​ការ​ស្រាវជ្រាវ ​និង​ការ​ប្រើប្រាស់​បច្ចេកទេស​កសិកម្ម។​ ក្នុងនោះ រាជរដ្ឋាភិបាល បង្កើតវិទ្យាស្ថាន CARDI ក៏ដើម្បីបង្កើត និងជំរុញការប្រើប្រាស់ឲ្យបានទូលាយនូវបច្ចេកទេសល្អៗ ដើម្បើគាំទ្រដល់កំណើនវិស័យ​កសិកម្ម នៅកម្ពុជាផងដែរ៕