សង្គ្រាមអ៊ុយក្រែន ៖ ប្រធានាធិបតីអ៊ុយក្រែន លោកវ៉ូឡូឌីមៀរ ហ្សេឡេនស្គី ប្រកាសកាលពីថ្ងៃទី៤ មករា តាមបណ្ដាញសង្គមXថា នាសប្ដាហ៍មុនរុស្ស៊ីបានវាយប្រហារអ៊ុយក្រែន ដោយគ្រាប់បែកហោះជាង១០៧០គ្រាប់…
សង្គ្រាមអ៊ុយក្រែន ៖ ប្រធានាធិបតីអ៊ុយក្រែន លោកវ៉ូឡូឌីមៀរ ហ្សេឡេនស្គី ប្រកាសកាលពីថ្ងៃទី៤ មករា តាមបណ្ដាញសង្គមXថា នាសប្ដាហ៍មុនរុស្ស៊ីបានវាយប្រហារអ៊ុយក្រែន ដោយគ្រាប់បែកហោះជាង១០៧០គ្រាប់ ប្រើដ្រូនវាយប្រហារប្រមាណជា១០០០គ្រឿង និងមីស៊ីល៦គ្រាប់ ចាប់ពីថ្ងៃទី២៩ ធ្នូ មក ។
ចំណែកអភិបាលក្រុងមូស្គូ លោកស័រហ្គេយសូប៊ីយ៉ានីនប្រកាសថា កងការពារអាកាសរុស្ស៊ីបានស្ទាក់កម្ទេចដ្រូនអ៊ុយក្រែនទាំងឡាយ ដែលហោះសំដៅមកកាន់ក្រុងមូស្គូកាលពីថ្ងៃទី៤ មករា ។ ដ្រូនយ៉ាងតិច២៥គ្រឿង ដែលហោះសំដៅវាយប្រហារក្រុងមូស្គូបានត្រូវបាញ់ទម្លាក់ ។ លោកមិនបានរៀបរាប់ពីជនរងគ្រោះឡើយ។
បណ្ដាថ្ងៃដំបូងនៃឆ្នាំ២០២៦ កំណត់តាមរយៈការបង្កើនការវាយប្រហាររបស់រុស្ស៊ីលើអ៊ុយក្រែន។ រុស្ស៊ីបានចោទប្រកាន់កងទ័ពអ៊ុយក្រែនថាវាយប្រហារដោយដ្រូន លើតំបន់ក្រុងឃ័រសុនកាន់កាប់ដោយរុស្ស៊ីបណ្ដាលឲ្យជនស៊ីវិលស្លាប់ដល់២៧នាក់ ។ ចំណែកកងទ័ពអ៊ុយក្រែនវិញអះអាងថា ការវាយប្រហារនោះរបស់ខ្លួនសំដៅលើគោលដៅយោធាមួយ ។
ជាការសងសឹករុស្ស៊ីបានវាយប្រហារលើភាគកណ្ដាលក្រុងខាគៀវ បណ្ដាលឲ្យមនុស្សយ៉ាងតិច១៩នាក់រងរបួស ។ ចំណែកកងទ័ពរុស្ស៊ីវិញអះអាងពីតុល្យការឆ្នាំ២០២៥ទើបកន្លងទៅថា អាចវាយដណ្ដើមយកទឹកដីអ៊ុយក្រែនបានច្រើនជាងបណ្ដាឆ្នាំមុនៗ។ ក្នុងឆ្នាំនោះរុស្ស៊ីដណ្ដើមដែនដីកាន់កាប់បានដល់ជាង៥.៦០០គីឡូម៉ែត្រក្រឡា។ សរុបរុស្ស៊ីមកទល់ពេលនេះដណ្ដើមកាន់កាប់ដែនដីអ៊ុយក្រែនបានដល់១៩,៤%ហើយ ដោយជិត១%ទើបដណ្ដើមយកបាននាឆ្នាំទៅមិញ៕
ចែករំលែកព័តមាននេះ