ADផ្ទាំងផ្សព្វផ្សាយពាណិជ្ជកម្ម

Picture

ខ្វះទឹក៖ រដ្ឋាករទឹក អំពាវនាវឱ្យប្រជាពលរដ្ឋ មេត្តាយោគយល់ អធ្យាស្រ័យ ខន្តីអភ័យទោស ហើយសន្សំសំចៃ រហូតដល់ខែឧសភា ទើបមាន​វិញ!

1 ឆ្នាំ មុន
  • ភ្នំពេញ

ភ្នំពេញ៖ រដ្ឋាករទឹក​ស្វ័យ​ក្រុងភ្នំពេញ បានប្រកាស​ អំពាវនាវដល់​ប្រជាពលរដ្ឋ អ្នកប្រើប្រាស់ទឹក នៅភ្នំពេញ និងក្រុងតាខ្មៅ ខេត្តកណ្តាល អំពីការខ្វះទឹកប្រើប្រាស់ នៅដើមឆ្នាំ២០២៣…

ភ្នំពេញ៖ រដ្ឋាករទឹក​ស្វ័យ​ក្រុងភ្នំពេញ បានប្រកាស​ អំពាវនាវដល់​ប្រជាពលរដ្ឋ អ្នកប្រើប្រាស់ទឹក នៅភ្នំពេញ និងក្រុងតាខ្មៅ ខេត្តកណ្តាល អំពីការខ្វះទឹកប្រើប្រាស់ នៅដើមឆ្នាំ២០២៣ នេះ។ រដ្ឋាករទឹកស្វយ័តក្រុងភ្នំពេញ បានប្រកាសអំពាវនាវដល់​ប្រជាពលរដ្ឋទាំងអស់ ដែលជួបបញ្ហាខ្វះទឹកស្អាតប្រើប្រាស់ នាពេលនេះ សូមមេត្តាយោគយល់ អធ្យាស្រ័យ ខន្តីអភ័យទោស ហើយសន្សំសំចៃទឹក​។

តាមសេចក្តីប្រកាស នៅឆ្នាំ២០២៣ នេះ តម្រូវការទឹកប្រើប្រាស់ បានកើនឡើងជាង ៨៩ម៉ឺន​ម៉ែត្រគូប ក្នុងមួយថ្ងៃ នៅពេលដែលសមត្ថភាពផលិតទឹកជាក់ស្តែង មានប្រមាណតែ ៦៤ម៉ឺនម៉ែត្រគូប ក្នុងមួយថ្ងៃ​តែប៉ុណ្ណោះ។ ដូច្នេះខ្វះទឹកផ្គត់ផ្គង់​ ចំនួន ២៥ម៉ឺនម៉ែត្រគូប ក្នុងមួយថ្ងៃ។​

សេចក្តីប្រកាស បន្តថា រហូតដល់ដើមខែឧសភា ឆ្នាំ២០២៣ នេះ រោងចក្រ​ផលិត​ទឹកស្អាតថ្មី នឹងផលិត ចែកចាយទឹកស្អាត បានក្នុងបរិមាណ ២០ម៉ឺន​ម៉ែត្រគូប ក្នុងមួយថ្ងៃ បន្ថែមលើសសមត្ថភាពផលិតបច្ចុប្បន្ន ៦៤ម៉ឺនម៉ែត្រគូប ក្នុងមួយថ្ងៃ។ ពោលគឺរដ្ឋាករទឹកស្វយ័តក្រុងភ្នំពេញ មានសមត្ថភាព​ផលិត ៨៤ម៉ឺនម៉ែត្រ​គូប ក្នុងមួយថ្ងៃ ធៀបនឹងតម្រូវការ​ទឹកស្អាត ៨៩ម៉ឺនម៉ែត្រគូប ក្នុងមួយថ្ងៃ និងមានន័យថា រដ្ឋាករទឹកស្វយ័តក្រុងភ្នំពេញ បានដោះស្រាយបញ្ហា​ ខ្វះទឹកស្អាត​បានជាង ៩០% ហើយ។

សេចក្តីប្រកាស បន្ថែមថា ចាប់ពីដើមឆ្នាំ២០២៤ រដ្ឋាករទឹកស្វយ័តក្រុងភ្នំពេញ នឹងអាចផលិត​ទឹកស្អាត បាន ២០ម៉ឺនម៉ែត្រគូបក្នុងមួយថ្ងៃបន្ថែមទៀត ដែលធ្វើឱ្យសមត្ថភាព​សរុបរបស់រដ្ឋាករទឹកស្វយ័តក្រុងភ្នំពេញ មានរហូតដល់ជាង ១លានម៉ែត្រគូប ក្នុងមួយថ្ងៃ​។

សរុបសេចក្តីមក រដ្ឋាករទឹកស្វយ័តក្រុងភ្នំពេញ បញ្ជាក់ថា ចាប់ពីដើមឆ្នាំ២០២៤ តទៅ សមត្ថភាព​ផលិតទឹកស្អាតរបស់រដ្ឋាករទឹកស្វយ័តក្រុងភ្នំពេញ មានជាង​ ១លានម៉ែត្រគូប ក្នុងមួយថ្ងៃ ធៀបនឹងការព្យាករណ៍តម្រូវការទឹក ដែលមានប្រមាណ ៩០ម៉ឺនម៉ែត្រគូប ក្នុងមួយថ្ងៃ។ មានន័យថា អតិថិជនរស់នៅភ្នំពេញ និងក្រុងតាខ្មៅទាំងអស់ មានទឹកប្រើប្រាស់គ្រប់គ្រាន់។

ក្នុងពេលខ្វះទឹកពេលនេះ រដ្ឋាករទឹកស្វយ័តក្រុងភ្នំពេញ បានប្រកាស អំពាវនាវដល់ប្រជាពលរដ្ឋ ទាំងក្នុងរាជធានីភ្នំពេញ និងនៅក្រុងតាខ្មៅ មេត្តាជួយសន្សំសំចៃទឹកស្អាត ដើម្បីផ្តល់ក្តីករុណា និងចែករំលែកទឹក ទៅដល់​អតិថិជនផ្សេងទៀត ជាពិសេសអតិថិជនរស់នៅតំបន់ជាយក្រុង។ ក្នុងនោះ អ្នកខ្វះទឹក អាចចូលរួម​ផ្តល់ព័ត៌មាន និងសាកសួរអំពីការខ្វះទឹកស្អាត មកកាន់រដ្ឋាករទឹកស្វយ័តក្រុងភ្នំពេញ ដោយផ្ទាល់ តាមរយៈលេខទូរស័ព្ទ 097 77 111 67 លោក សោម សុវណ្ណ ឬ លេខទូរស័ព្ទ 097 77 111 79 លោក ផេង ទី ឬ ហ្វេសប៊ុកផេករបស់រដ្ឋាករទឹកស្វយ័តក្រុងភ្នំពេញ៕

អត្ថបទសរសេរ ដោយ

កែសម្រួលដោយ