តម្លៃអង្ករ៣កំណាត់វៀតណាមឈរលើកំពូលតារាងពិភពលោក វ៉ាដាច់ថៃ និងឥណ្ឌាជាគូប្រជែង
វៀតណាម ៖ យោងតាមរបាយការណ៍ពីក្រសួងឧស្សាហកម្ម និងពាណិជ្ជកម្មប្រទេសវៀតណាមបានឱ្យ
វៀតណាម ៖ យោងតាមរបាយការណ៍ពីក្រសួងឧស្សាហកម្ម និងពាណិជ្ជកម្មប្រទេសវៀតណាមបានឱ្យដឹងថា អង្ករបីកំណាត់ ៥% របស់វៀតណាម (Broken Rice) មានតម្លៃថ្លៃជាងគេបំផុតនៅលើពិភពលោកចាប់តាំងពីខែសីហាឆ្នាំមុន ដោយបានវ៉ាដាច់ប្រទេសថៃ និងឥណ្ឌា ដែលជាគូប្រជែងរបស់ខ្លួន។ នេះបើយោងតាមប្រភពពីសារព័ត៌មានវៀតណាម VnExpress ចេញផ្សាយនៅថ្ងៃទី២៣ ខែមីនា ឆ្នាំ២០២៣។
ក្នុងរយៈពេល២ខែដំបូងក្នុងឆ្នាំនេះ តម្លៃជាមធ្យមសម្រាប់អង្ករវៀតណាមមានជាង ៥១៩ដុល្លារក្នុងមួយតោន ខណៈដែលចាប់តាំងពីខែសីហាឆ្នាំមុន វាបានលើសតម្លៃអង្ករថៃពី ១៥-២៧ដុល្លារ និងតម្លៃអង្ករឥណ្ឌាពី ៤០-៥០ដុល្លារ។ ទោះបីជាបរិមាណនាំចេញអង្ករវៀតណាមបានធ្លាក់ចុះ ២០.៩% ពីមួយឆ្នាំទៅមួយឆ្នាំមកនៅត្រឹម ៤០ម៉ឺនតោនក្នុងខែមករាយ៉ាងណាក៏ដោយ ប៉ុន្តែតម្លៃបានកើនឡើងដល់ ៧% ក្នុងរយៈពេលនេះ។
កាលពីឆ្នាំមុន ការនាំចេញអង្កររបស់ប្រទេសវៀតណាម បានឡើងដល់កម្រិតខ្ពស់ក្នុងរយៈពេល១០ឆ្នាំ រហូតដល់ ៧,១លានតោន។ ប្រទេសនេះ គ្រោងនឹងនាំចេញអង្ករចំនួន ៦,៦លានតោននៅឆ្នាំនេះ ដោយចំនួន ៤,១២លានតោន ដែលគ្រោងនឹងត្រូវបញ្ជូនចេញនៅដំណាច់ពេល៦ខែដំបូង។
លក្ខខណ្ឌនាំចេញអំណោយផលត្រូវបានគេរំពឹងថា នឹងត្រលប់មកវិញនៅឆ្នាំនេះ ដោយសារតែតម្រូវការឡើងវិញពីប្រទេសឥណ្ឌូណេស៊ី និងបង់ក្លាដែស។ អ្នកទិញនឹងងាកទៅរកវៀតណាមកាន់តែខ្លាំងឡើងសម្រាប់អង្ករ ខណៈដែលឥណ្ឌាបានហាមឃាត់ការនាំចេញអង្ករបីកំណាត់ និងដាក់ពន្ធ ២០% លើអង្ករស។
ប៉ុន្តែទោះយ៉ាងណាក៏ដោយ ក្រសួងឧស្សាហកម្ម និងពាណិជ្ជកម្មវៀតណាម មានការព្រួយបារម្ភថា កង្វះការធ្វើពិពិធកម្មទីផ្សារនាំចេញ និងការពឹងផ្អែកលើប្រទេសចិន និងហ្វីលីពីន នឹងជាបញ្ហាប្រឈមចំពោះឧស្សាហកម្មនេះ ដោយសារតែអង្ករតម្លៃទាបពីប្រទេសប៉ាគីស្ថានក៏អាចបង្ហាញអំពីបញ្ហាប្រឈមក្នុងការកាន់កាប់ចំណែកទីផ្សារផងដែរ។ បន្ថែមពីលើនេះ ក្រសួងបានបញ្ជាក់ថា ខ្លួនកំពុងធ្វើការជាមួយសហភាពអឺរ៉ុប ដើម្បីណែនាំឱ្យកាន់តែប្រសើរឡើងនូវការនាំចូលអង្ករក្រអូបរបស់វៀតណាម៕
ចែករំលែកព័តមាននេះ