សម្តេចតេជោ ចង់ឲ្យជប៉ុនជួយជំរុញភាគីថៃ ដោះស្រាយជម្លោះដោយសន្តិវិធី ហើយឈរលើគោលការណ៍តុលាការអន្តរជាតិ
រាជធានីភ្នំពេញ ៖ សម្តេចតេជោ ហ៊ុន សែន ប្រធានព្រឹទ្ធសភា មានបំណងចង់ឲ្យជប៉ុន ជួយជំរុញភាគីថៃ ដោះស្រាយជម្លោះ នៃប្រទេសទាំងពីរ…
រាជធានីភ្នំពេញ ៖ សម្តេចតេជោ ហ៊ុន សែន ប្រធានព្រឹទ្ធសភា មានបំណងចង់ឲ្យជប៉ុន ជួយជំរុញភាគីថៃ ដោះស្រាយជម្លោះ នៃប្រទេសទាំងពីរ ប្រកបដោយសន្តិវិធី ហើយឈរលើគោលការណ៍តុលាការអន្តរជាតិ ។
ការបង្ហាញបំណងរបស់សម្តេចតេជោ ធ្វើឡើងខណៈដែរ សម្តេចបានអនុញ្ញាតឲ្យនាយឧត្តមសេនីយ៍ Morishita Yasunori មេបញ្ជាការកងស្វ័យការពារជើងគោកជប៉ុន ចូលជួបសម្តែងការគួរសម និងពិភាក្សាការងារ នាព្រឹកថ្ងៃទី២៥ ខែមិថុនា ឆ្នាំ២០២៥ នៅវិមានព្រឹទ្ធសភា ។
បើតាមលោក ជា ធីរិទ្ធ អ្នកនាំពាក្យព្រឹទ្ធសភា បានឲ្យដឹងថា នៅក្នុងជំនួបសម្ដេចតេជោ ហ៊ុន សែន បានប្រាប់ទៅមេបញ្ជាការទ័ពជើងគោកជប៉ុន ពីស្ថានភាពបញ្ហាពិតប្រាកដ រវាងកម្ពុជា-ថៃ ដែលកំពុងកើតមានឡើងនាពេលបច្ចុប្បន្ន បន្ទាប់ពីសម្ដេចបានអរគុណចំពោះការចូលរួមរំលែកទុក្ខពីខាងភាគីជប៉ុន ។
នៅក្នុងនោះ សម្ដេចតេជោ បានពន្យល់ថា ជាការចាប់ផ្ដើមគឺ ដោយមានទាហ៊ានថៃ ឆ្លងដែនមកបាញ់សម្លាប់យុទ្ធជនកម្ពុជា បន្ទាប់មកថៃ សម្រេចបិទច្រកព្រំដែនជាឯកតោភាគី ជាដើម និងសកម្មភាពជាច្រើនទៀត ដែលថៃបានរំលោភមកកាន់កម្ពុជាបន្ថែមទៀត ដែលជាផ្នែកមួយកម្ពុជា ត្រូវតែមានវិធានការក្នុងការទប់ស្កាត់ការឆ្លើយតបត្រឡប់ទៅវិញ យ៉ាងណាក៏ដោយ សម្ដេចតេជោ បានបញ្ជាក់ចំពោះឯកឧត្តមមេបញ្ជាការទ័ពជើងគោកជប៉ុន ដោយច្បាស់ថា ជំហររបស់កម្ពុជា គឺការដោះស្រាយបញ្ហាដោយសន្តិវិធី តាមរយៈយន្តការ នៃការចរចាទ្វេភាគី និងការដោះស្រាយតាមផ្លូវច្បាប់អន្តរជាតិ ពោលគឺការដោះស្រាយដោយយកតុលាការអន្តរជាតិ ICJ ក្នុងការដោះស្រាយបញ្ហានេះ នេះជាគោលជំហរយ៉ាងច្បាស់អំពី ភាគីកម្ពុជា ជាពិសេសជាការលើកឡើងរបស់ សម្ដេចតេជោ ពីព្រោះសម្ដេចតេជោ លោកបានបញ្ជាក់ថា លោកមិននឹកស្មានថា មានរឿងបែបនេះ ចំពោះបញ្ហាព្រំដែនរវាងប្រទេសទាំងពីរទាល់តែសោះ។ អ្វីដែលលោកចង់បានគឺ ព្រំដែនមួយដែលមានកិច្ចសហប្រតិបត្តិការល្អ មិត្តភាព ព្រំដែនដែលមានការការរួមគ្នា លោកមិនចង់ឃើញមានការផ្ទុះអាវុធ ឬសង្គ្រាមជាមួយគ្នាឡើយ គឺចង់ឃើញតែភាពសន្តិភាព ដែលបានកើតឡើង សម្រាប់ព្រំដែនប្រទេសកម្ពុជា ។
សម្ដេចតេជោ បានប្រាប់ទៅកាន់ឯកឧត្តម មេបញ្ជាការទ័ពជើងគោកជប៉ុន ថាអ្វីដែលកម្ពុជាចង់បាន គឺចង់ឲ្យជប៉ុនជួយជំរុញឲ្យភាគីថៃ ដោះស្រាយជម្លោះដោយសន្តិវិធី និងគោរពទៅតាមនិយាម ឬច្បាប់អន្តរជាតិ ដែលជាជំហររបស់កម្ពុជា ដែលចង់បាន និងចង់ឃើញការដោះស្រាយដោយតុលាការអន្តរជាតិ ។
ក្នុងកិច្ចពិភាក្សា ឯកឧត្តមមេបញ្ជាការទ័ពជើងគោកជប៉ុន ក៏បានអរគុណសម្ដេចតេជោ ដែលបានបញ្ជាក់អំពីមូកហេតុ ស្ថានភាពពិត និងបញ្ហាព្រំដែនរបស់ប្រទេសកម្ពុជា ដែលមានជាមួយប្រទេសថៃ ។ ឯកឧត្តមបានបញ្ជាក់បន្ថែមថា អ្វីដែលជប៉ុនចង់បាន គឺការដោះស្រាយដោយសន្តិវិធី ក្នុងបញ្ហាព្រំដែន ។
ក្នុងឱកាសនោះ ឯកឧត្តមមេបញ្ជាការទ័ពជើងគោកជប៉ុន បានសម្ដែងនូវក្ដីអរគុណចំពោះ សម្ដេចតេជោ ហ៊ុន សែន ដែលបានចំណាយពេលវេលា និងអនុញ្ញាតឲ្យឯកឧត្តម ជាមួយសហការី បានចូលជួបសម្ដែងការគួរសម ពិភាក្សាការងារ និងស្ដាប់យោបល់របស់សម្ដេច ហើយឯកឧត្តមមេបញ្ជការតំណាងឲ្យកងទ័ពជប៉ុន ក៏បានចូលរួមរំលែកមរណទុក្ខចំពោះ ការស្លាប់របស់ យុទ្ធជនកម្ពុជា លោក សួន រ៉ោន កាលពីពេលថ្មីៗនេះ ជុំវិញបញ្ហាព្រំដែនកម្ពុជា-ថៃ ។
ជាមួយគ្នានេះ សម្ដេចតេជោ ហ៊ុន សែន បានអរគុណចំពោះ ឯកឧត្តមមេបញ្ជាការទ័ពជើងគោកជប៉ុន ដែលបានចូលរួមរំលែកមរណទុក្ខមកកាន់យុទ្ធជនកម្ពុជា ដែលត្រូវបានទាហ៊ានថៃ បាញ់សម្លាប់ កាលពីថ្ងៃទី២៨ ខែឧសភា កន្លងទៅ។ សម្ដេចតេជោ ហ៊ុន សែន បានសម្ដែងនូវក្ដីពេញចិត្តចំពោះភាពជាដៃគូយុទ្ធសាស្ត្ររបស់កម្ពុជា និងជប៉ុន ដែលបានកើតឡើងមានភាពរីកចម្រើន ជាពិសេសនៅក្នុងវិស័យការពារជាតិ ។
សម្ដេចតេជោ ហ៊ុន សែន បានសង្កេតឃើញថា នៅក្នុងផ្នែកពាណិជ្ជកម្ម និងផ្នែកវិនិយោគនៃប្រទេសទាំងពីរក៏មានការរីកចម្រើន និងមានការកើនឡើងជាបន្តបន្ទាប់ដែលជាផ្នែកមួយក្នុងការជំរុញនូវទំហំពាណិជ្ជកម្ម និងជាការរុញច្រាននូវទំនាក់ទំនងសេដ្ឋកិច្ច និងនយោបាយឲ្យទៅជាមួយគ្នា ៕
ចែករំលែកព័តមាននេះ